ແບບຢ່າງການຈັດສັນຄວາມເປັນລະບຽບ ຮຽບຮ້ອຍຂອງຕົວເມືອງຫລວງພະບາງ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ເມື່ອຕົ້ນອາທິດນີ້ ຂ້າພະເຈົ້າໄດ້ມີໂອກາດໄປເຮັດວຽກຢູ່ແຂວງຫລວງພະບາງຮ່ວມກັບທ່ານຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ພວກເຮົາໄດ້ພັກຢູ່ໂຮງແຮມແຫ່ງໜຶ່ງໃນໃຈກາງຕົວເມືອງຫລວງພະບາງ. ໃນ 2-3 ມື້ນັ້ນ ເຖິງວ່າຢູ່ເມືອງມໍລະດົກໂລກແຫ່ງນີ້ຈະເປັນໄລຍະຝົນຕົກ, ແຕ່ຕົວເມືອງກໍຍັງຄົງຄວາມເປັນລະບຽບຮຽບຮ້ອຍ ແລະ ສະອາດຈົບງາມຢູ່ສະເໝີ, ໄປໃສມາໃສກໍສະດວກສະບາຍ ແລະ ເຖິງຈະເປັນຕົວເມືອງນ້ອຍແຕ່ເບິ່ງແລ້ວຜູ້ໃຊ້ລົດໃຊ້ຖະໜົນຂ້ອນຂ້າງມີລະບຽບ ແລະ ຈັນຍາບັນດີ, ເຂົາເຈົ້າຄ່ອຍໄປຄ່ອຍມາຕາມລະບຽບຈະລາຈອນ, ການຈອດລົດລາພາຫະນະຕ່າງໆກໍເຂົ້າສູ່ລະບຽບ ບໍ່ເກີດມີສະພາບລົດແອອັດ ແລະ ບັນຫາອຸປະຕິເຫດເກີດຂຶ້ນ ແລະ ສິ່ງທີ່ໜ້າຍົກຍ້ອງ ແລະ ເອົາເປັນບົດຮຽນທີ່ສຸດນັ້ນ ແມ່ນການຈັດສັນຕົວເມືອງ ໂດຍບໍ່ໃຫ້ມີຜູ້ສວຍໃຊ້ແຄມຖະໜົນຫົນທາງເປັນບ່ອນຂາຍເຄື່ອງ ແລະ ຈອດລົດຊະຊາຍຢ່າງເດັດຂາດ ແລະ ໃນຈຸດນີ້ໄດ້ຊ່ວຍໃຫ້ການຈັດຕັ້ງປະຕິບັດ ສ.ສະອາດ ແລະ ສ.ສະຫງົບ ຂອງເມືອງມໍລະດົກໂລກກາຍເປັນທີ່ຍອມຮັບຂອງສັງຄົມ ແລະ ແຂກບ້ານແຂກເມືອງຜູ້ມາທ່ຽວຢ້ຽມຢາມ.
ນັກຂ່າວແຂວງດັ່ງກ່າວໄດ້ເລົ່າສູ່ຟັງວ່າ: ກ່ອນຈະໄດ້ມາໃນບັນຍາກາດນີ້ກໍບໍ່ແມ່ນເລື່ອງງ່າຍພໍປານໃດ, ອຳນາດການປົກຄອງ ແລະ ອົງການບໍລິຫານ ແລະ ພັດທະນາຕົວເມືອງ ຕ້ອງໄດ້ເສຍເຫື່ອເສຍແຮງເຮັດວຽກງານໂຄສະນາປຸກລະດົມປະຊາຊົນໃຫ້ມີຄວາມຕື່ນຕົວປະຕິບັດພັນທະ ແລະ ລະບຽບກົດໝາຍ, ພ້ອມນັ້ນກໍໄດ້ອອກແຮງຈັດສັນຄວາມເປັນລະບຽບຮຽບຮ້ອຍແກ້ໄຂສະພາບນຳໃຊ້ທາງຍ່າງໃນສາຍທາງຫລັກເປັນບ່ອນຂາຍເຄື່ອງ ແລະ ເຮັດການບໍລິການຕ່າງໆຢ່າງເດັດຂາດ, ຖ້າໃຜລະເມີດກໍຈະນຳມາສຶກສາອົບຮົມ ແລະ ດຳເນີນຄະດີຕາມຄວາມຜິດ ແລະ ສິ່ງສຳຄັນແມ່ນໄດ້ມອບໃຫ້ແຕ່ລະບ້ານແຕ່ລະຄົວເຮືອນຜູ້ຢູ່ຕິດທາງຫລວງຕ້ອງເປັນເຈົ້າການຈັດຕັ້ງປະຕິບັດລະບຽບການດັ່ງກ່າວໃຫ້ມີປະສິດທິຜົນ ໂດຍສະເພາະແມ່ນຂອດອະນາໄມ ແລະ ຄວາມຕື່ນຕົວບໍ່ນຳໃຊ້ໜ້າບ້ານແຄມທາງເປັນບ່ອນຂາຍເຄື່ອງ ແລະ ເຮັດການບໍລິການຕ່າງໆ ຈາກຈຸດນີ້ຈຶ່ງຄ່ອຍໆສ້າງໃຫ້ສັງຄົມມີສະຕິໃນການຮັກສາອະນາໄມ ແລະ ການຮັກສາຄວາມເປັນລະບຽບຮຽບຮ້ອຍຂອງຕົວເມືອງຫລວງດັ່ງເປັນຢູ່ໃນປັດຈຸບັນ, ສົມກັບເປັນເມືອງມໍລະດົກໂລກອັນງົດງາມ ແລະ ໜ້າຢູ່.
