5 ສິ່ງທີ່ທ່ານຄວນເຮັດເມື່ອໝົດໄຟໃນການເຮັດສິ່ງຕ່າງໆ.

ທ່ານອາດຈະພົບພໍ້ແຮງບັນດານໃຈໄດ້ທົ່ວໄປໃນຊີວິດປະຈຳວັນ ບໍ່ວ່າຈະເປັນການເບິ່ງຮູບເງົາ, ອ່ານໜັງສື, ຟັງເພງ ຫລື ລົມກັບໃຜຈັກຄົນ, ແຕ່ແຮງບັນດານໃຈນັ້ນມັນບໍ່ໄດ້ມາຫາເຮົາຕະຫລອດເວລາ ບາງເທື່ອທ່ານອາດຈະຮູ້ສຶກວ່າຕອນນີ້ບໍ່ມີຈິດໃຈຈະເຮັດຫຍັງເລີຍ ມັນເຮັດໃຫ້ຊີວິດຂອງທ່ານເຊື່ອງຊ້າລົງກ່ວາທີ່ຄວນຈະເປັນ ເພາະແຮງບັນດານໃຈນັ້ນເປັນສິ່ງສຳຄັນທີ່ຈະຊ່ວຍໃຫ້ເຮົາເລີ່ມຕົ້ນສິ່ງໃໝ່ໆ ແລະ ກ້າວໄປຂ້າງໜ້າໄດ້.

ຖ້າທ່ານຮູ້ສຶກວ່າຕົນເອງກຳລັງຂາດແຮງບັນດານໃຈ ເຮົາມີວິທີງ່າຍໆມາແນະນຳທ່ານ ສຳລັບເອີ້ນແຮງບັນດານໃຈກັບມາອີກຄັ້ງ.

1. ເຮັດສະມາທິ : ການເຮັດສະມາທິນັ້ນມີຜົນຕໍ່ສະພາບທາງຈິດ ມັນຊ່ວຍໃຫ້ເຮົາສາມາດທົບທວນອາລົມຕ່າງໆໄດ້ ເຊັ່ນ : ຄວາມຄຽດ, ຄວາມໃຈຮ້າຍ ຫລື ແມ່ນແຕ່ຄວາມຮັກ.​ ໃນທາງຈິດຕະວິທະຍາແລ້ວມີການຄົ້ນພົບວ່າ ການເຮັດສະມາທິຈະຊ່ວຍຫລຸດຄວາມວິຕົກກັງວົນ ແລະ ເຮັດໃຫ້ອາລົມຂອງເຮົາໝັ້ນຄົງຂຶ້ນ. ເຖິງວ່າການເຮັດສະມາທິຈະບໍ່ໄດ້ເປັນບໍ່ເກີດຂອງແຮງບັນດານໃຈໂດຍກົງ,​ ແຕ່ມັນຈະຊ່ວຍໃຫ້ຮ່າງກາຍ ແລະ ຈິດໃຈຂອງທ່ານພ້ອມ ແລະ ແຂງແຮງ ເພາະທຸກມື້ນີ້ຜູ້ຄົນມັກຈະຕ້ອງພົບກັບອາການທາງຈິດທີ່ຄອຍລົບກວນພວກເຂົາຢູ່ຕະຫລອດເວລາ ແລະ ເມື່ອຕ້ອງພົບກັບເລື່ອງແບບນັ້ນ ມັນກໍຍາກທີ່ຈະຫາແຮງບັນດານໃຈ. ທ່ານສາມາດເລີ່ມຝຶກສະມາທິໄດ້ເລີຍໃນທັນທີ ເຖິງວ່າທ່ານຈະເປັນພຽງແຕ່ຜູ້ເລີ່ມຕົ້ນ ແຕ່ມັນຈະເຫັນໄດ້ທັນຕາເລີຍ ທ່ານຈະຮູ້ສຶກສະຫງົບ ແລະ ຜ່ອນຄາຍຫລາຍຂຶ້ນ ແລະ ບໍ່ແນ່ວ່າແຮງບັນດານໃຈທີ່ຫາຍໄປກໍອາດຈະກັບຄືນມາອີກຄັ້ງ.
2. ຢຸດໃຊ້ Social Media : ການຢຸດໃຊ້ສື່ສັງຄົມອອນລາຍຕ່າງໆ ບໍ່ວ່າຈະເປັນໃນໂທລະສັບ ຫລື ຄອມພິວເຕີ ທັງນີ້ກໍເພື່ອທີ່ຈະໃຫ້ໂຕທ່ານເອງໄດ້ພັກຜ່ອນແດ່ ຈື່ໄວ້ວ່າເມື່ອກ່ອນໃນອະດີດທີ່ຍັງບໍ່ມີໂທລະສັບ ຜູ້ຄົນກໍຍັງມີວິທີການຕັ້ງຫລວງຫລາຍໃນການຜ່ອນຄາຍ ຫລື ສ້າງຄວາມມ່ວນຊື່ນ ບາງເທື່ອອາດຈະເປັນການລົມກັບໝູ່ ຫລື ອອກໄປຍ່າງຫລິ້ນ. ມີຜົນການວິໄຈພົບວ່າ ຄົນທີ່ໃຊ້ອຸປະກອນເທົ່າທີ່ຈຳເປັນນັ້ນສາມາດເຮັດວຽກໄດ້ມີປະສິດທິພາບຫລາຍຂຶ້ນ ທຸກມື້ນີ້ສື່ດິຈິຕອລນັ້ນມີຜົນຕໍ່ເຮົາຫລາຍເກີນໄປ ແລະ ສ່ວນຫລາຍກໍຈະເປັນໃນທາງລົບ ການຢຸດໃຊ້ຈັກໄລຍະຈະຊ່ວຍໃຫ້ທ່ານຄິດ ຫລື ຫາແຮງບັນດານໃຈໃໝ່ໆໄດ້ງ່າຍຂຶ້ນ.
3. ເຮັດຊີວິດໃຫ້ຊ້າລົງແດ່ : ທຸກມື້ນີ້ເປັນເລື່ອງປົກກະຕິໄປແລ້ວທີ່ຜູ້ຄົນມັກຈະຟ້າວຟັ່ງເຮັດສິ່ງຕ່າງໆໃຫ້ສຳເລັດ ຈົນພວກເຂົາບໍ່ມີເວລາໃຫ້ຮ່າງກາຍກັບສະໝອງໄດ້ພັກຜ່ອນ ໃນທາງສຸຂະພາບແລ້ວ ຄົນເຮົາຄວນມີເວລາພັກຜ່ອນຈາກວຽກທີ່ເໝາະສົມ ເພື່ອເປັນການຟື້ນຟູສະໝອງນັ້ນເອງ. ເຮົາມັກຈະຄິດຫຍັງບໍ່ອອກເວລາທີ່ອິດເມື່ອຍອ່ອນເພຍຫລາຍໆ ແລະ ນັ້ນເປັນສັນຍານວ່າທ່ານຄວນຈະຢຸດພັກຈັກໄລຍະໜຶ່ງ ເຮົາຕ້ອງຄຳນຶງໄວ້ສະເໝີວ່າຖ້າເຮົາບໍ່ຍອມພັກ ຮ່າງກາຍ ແລະ ຈິດໃຈກໍຈະບໍ່ມີເວລາໃນການຟື້ນຟູ ແລະ ນັ້ນໝາຍຄວາມວ່າເຮົາຈະບໍ່ສາມາດຫາແຮງບັນດານໃຈໄດ້ເລີຍ.
4. ປະຕິຫານແຫ່ງດົນຕີ : ດົນຕີນັ້ນມີຜົນທັງຕໍ່ສະໝອງ ແລະ ຫົວໃຈ ເພາະເວລາທ່ານຟັງດົນຕີ ໂດຍສະເພາະເພງທີ່ທ່ານມັກ ມັນຈະເປັນສິ່ງທີ່ຊ່ວຍໃຫ້ທ່ານຜ່ອນຄາຍທາງອາລົມ ແລະ ເຊື່ອມຕໍ່ສະໝອງກັບຈິດສຳນຶກຂອງທ່ານເຂົ້າກັນ ບາງເທື່ອທ່ານອາດຈະຟັງເພງແຈສເບົາໆ ເພື່ອເປັນການຜ່ອນຄາຍຈາກເລື່ອງເຄັ່ງຄຽດ. ນອກຈາກນີ້, ດົນຕີຍັງມີຜົນຕໍ່ອາລົມຂອງທ່ານຫລາຍ ຖ້າທ່ານໄດ້ຟັງດົນຕີມ່ວນໆໃນມື້ທີ່ທ່ານຮູ້ສຶກບໍ່ດີ ຮັບຮອງໄດ້ເລີຍວ່າທ່ານຈະອາລົມດີຂຶ້ນໄດ້ ແລະ ສາມາດຄົ້ນຫາແຮງບັນດານໃຈໃໝ່ໆໄດ້ງ່າຍຂຶ້ນນຳ.
5. ຮ້ອງອອກມາດັງໆ : ຈິດໃຈຂອງຄົນເຮົາປຽບໄດ້ກັບກ່ອງໃສ່ຂີ້ເຫຍື້ອ ຖ້າທ່ານບໍ່ລະບາຍສິ່ງເຫລົ່ານັ້ນທີ່ຢູ່ໃນໃຈອອກມາແດ່ ທ່ານກໍຈະຮູ້ສຶກເມື່ອຍ ແລະ ເຄັ່ງຄຽດຫລາຍເກີນໄປ ຫາກພຽງແຕ່ທ່າຮ້ອງອອກມາດັງໆ ຂີ້ເຫຍື້ອທີ່ຢູ່ໃນໃຈກໍຈະຖືກທຳລາຍໃຫ້ຫາຍໄປໄດ້ຄືກັນ. ເວລາທີ່ທ່ານຮູ້ສຶກຂາດແຮງບັນດານໃຈ ຢາກໃຫ້ທ່ານລອງເຮັດວິທີນີ້ເບິ່ງ (ຢ່າລືມວ່າຕ້ອງບໍ່ມີຄົນຢູ່ໃກ້ໆທ່ານໃນຕອນນັ້ນ) ແລ້ວທ່ານຈະຮູ້ສຶກແປກໃຈເຖິງຜົນຂອງມັນ ຄວາມຈິງແລ້ວມະນຸດກໍເປັນສິ່ງທີ່ມີຄູ່ມືຕິດມານຳ ພຽງແຕ່ທ່ານຕ້ອງຮູ້ວິທີອ່ານຄູ່ມືເຫລົ່ານັ້ນໃຫ້ເປັນ.