ແນວລາວສ້າງຊາດອົງການເຕົ້າໂຮມຄວາມສາມັກຄີປວງຊົນລາວທັງຊາດ

ໂດຍ: ທິດກໍ່າ

ໃນຄວາມເປັນຈິງແລ້ວ, ວັນທີ 13 ສິງຫາ ນອກຈາກເປັນວັນສື່ມວນຊົນ ແລະ ພິມຈຳໜ່າຍແລ້ວ ຍັງເປັນວັນສ້າງຕັ້ງອົງການແນວລາວສ້າງຊາດ. ປີນີ້ຖືວ່າຄົບຮອບ 72 ປີ (13/8/1950-13/8/2022). ອົງການແນວລາວສ້າງຊາດມີຕົ້ນກຳເນີດມາຈາກອົງການແນວລາວອິດສະຫລະ ແລະ ແນວລາວຮັກຊາດ. ອັນສາເຫດກໍຍ້ອນວ່າອົງການດັ່ງກ່າວໄດ້ສ້າງຕັ້ງຂຶ້ນນັບແຕ່ມີຈັກກະພັດຝຣັ່ງເຂົ້າມາຮຸກຮານປະເທດລາວ. ຈຸດປະສົງເປົ້າໝາຍແມ່ນຕໍ່ສູ້ຕີຕ້ານຝຣັ່ງເພື່ອຍາດເອົາເອກະລາດປະທິປະໄຕມາໃຫ້ປະເທດຊາດ, ໃຫ້ຫລຸດພົ້ນອອກຈາກການເປັນຫົວເມືອງຂຶ້ນຂອງຝຣັ່ງ. ຕໍ່ມາພາຍຫລັງຝຣັ່ງປະລາໄຊໃນສົງຄາມອິນດູຈີນ ແລ້ວຈັກກະພັດອາເມລິກາກໍເຂົ້າມາແທນທີ່ ອົງການດັ່ງກ່າວກໍໄດ້ຫັນທິດປ່ຽນຊື່ມາເປັນແນວລາວຮັກຊາດ. ພາຍຫລັງປະເທດຊາດໄດ້ຮັບການປົດປ່ອຍ ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ເຊິ່ງເປັນໄລຍະສ້າງສາພັດທະນາປະເທດຊາດ ຈຶ່ງໄດ້ປ່ຽນຊື່ມາເປັນອົງການແນວລາວສ້າງຊາດ ທັງນີ້ກໍເພື່ອໃຫ້ສອດຄ່ອງກັບໄລຍະປະຫວັດສາດໃນແຕ່ລະຍຸກແຕ່ລະສະໄໝຂອງການປະຕິວັດລາວ.

ເວົ້າໄດ້ວ່າ: ນັບແຕ່ມື້ອົງການແນວລາວອິດສະຫລະ ກໍຄືອົງການແນວລາວຮັກຊາດ ຫລືວ່າ ອົງການແນວລາວສ້າງຊາດໃນປັດຈຸບັນ ໄດ້ຮັບການສ້າງຕັ້ງຂຶ້ນໄດ້ກາຍເປັນຄັນທຸງເຕົ້າໂຮມຄວາມສາມັກຄີອັນເປັນປຶກແຜ່ນຂອງປວງຊົນລາວທັງຊາດ. ນອກນັ້ນ ຍັງເປັນຄັນທຸງນຳໜ້າແຫ່ງການຕໍ່ສູ້ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ໂດຍແມ່ນປະທານ ສຸພານຸວົງ ເປັນແກນນຳ ແລະ ເປັນຄັນທຸງນຳໜ້າໃນຕະຫລອດໄລຍະແຫ່ງການຕໍ່ສູ້ປົດປ່ອຍຊາດທີ່ລະອິດລະອ້ຽວ ຈົນມາຮອດບັ້ນທ້າຍຂອງໄຊຊະນະ ກໍຄືສາມາດປົດປ່ອຍປະເທດຊາດໄດ້ຢ່າງສົມບູນ ໂຄ້ນລົ້ມລະບອບສັກດີນາປະຕິການ ແລ້ວປະກາດສ້າງຕັ້ງເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ.

ຖ້າຈະເອີ່ຍເຖິງຜົນງານຂອງອົງການແນວລາວສ້າງຊາດໃນໄລຍະ 72 ປີຜ່ານມາ ແມ່ນສຸດທີ່ຫລາກຫລາຍເຫລືອມາກ ບໍ່ອາດພັນລະນາກິໆກີໆໄດ້ ແຕ່ກໍສາມາດສັງເຂບໄດ້ເປັນ 3 ໄລຍະຄື: ໄລຍະຕໍ່ສູ້ກັບຝຣັ່ງ ແມ່ນສາມາດຍາດໄດ້ໄຊຊະນະຮ່ວມຮົບກັບສາມຊາດອິນດູຈີນ ລາວ, ຫວຽດນາມ ແລະ ກຳປູເຈຍ. ໄລຍະຕໍ່ສູ້ກັບການຮຸກຮານຂອງຈັກກະພັດອາເມລິກາ ແມ່ນສາມາດປົດປ່ອຍປະເທດຊາດໄດ້ໃນປີ 1975 ຮ່ວມກັບຫວຽດນາມ ແລະ ກຳປູເຈຍໃນປີດຽວກັນ.

ຕົກມາໃນໄລຍະສ້າງສາ ແລະ ພັດທະນາປະເທດຊາດ ອົງການແນວລາວສ້າງຊາດຍິ່ງມີບົດບາດສຳຄັນໃນພາລະກິດຂອງຊາດ ເປັນຕົ້ນເຕົ້າໂຮມຄວາມສາມັກຄີລະຫວ່າງປະຊາຊົນບັນດາເຜົ່າທີ່ຢູ່ພາຍໃນ ແລະ ຕ່າງປະເທດໃຫ້ເປັນປຶກແຜ່ນ ສຶກສາອົບຮົມບົ່ມເພາະໃຫ້ຄົນລາວທັງມວນມີຈິດໃຈຮັກຊາດຮັກບ້ານເກີດເມືອງນອນ, ຮັກຜືນແຜ່ນດິນອັນຄົບຖ້ວນຂອງເຊື້ອຊາດຊົນຊາດລາວໃຫ້ຍືນຍົງຂະນົງ ກາຍເປັນສູນລວມແຫ່ງນ້ຳໃຈຄວາມສາມັກຄີຮັກແພງອັນເປັນປຶກແຜ່ນຂອງປວງຊົນລາວທັງຊາດ. ຂໍ່ານັບຊົມເຊີຍວັນສ້າງຕັ້ງອົງການແນວລາວສ້າງຊາດຄົບຮອບ 72 ປີຢ່າງສຸດໃຈ ວັນທີ 13 ສິງຫາ ໝັ້ນຍືນ !.