ຊົມເຊີຍວັນລັດຖະທຳມະນູນແຫ່ງ ສປປ ລາວ ວັນທີ 15 ສິງຫາ ຄົບຮອບ 31 ປີຢ່າງສຸດໃຈ
ລັດຖະທຳມະນູນເປັນກົດໝາຍພື້ນຖານຂອງຊາດ ເປັນການຫັນແນວທາງປ່ຽນແປງໃໝ່ຮອບດ້ານທີ່ມີຫຼັກ ການຂອງພັກປະຊາຊົນປະຕິວັດລາວເປັນກົດໝາຍພື້ນຖານຂອງລະບອບປະຊາທິປະໄຕ ປະຊາຊົນ ເພື່ອສຶກສາອົບຮົມປະຊາຊົນລາວບັນດາເຜົ່າໃຫ້ຍົກສູງນໍ້າໃຈຮັກຊາດຮັກລະບອບໃໝ່ ເພີ່ມທະວີຄວາມສາມັກຄີທົ່ວປວງຊົນລາວທັງຊາດເຊີດຊູບົດບາດປົກປັກຮັກສາ ແລະ ສ້າງສາພັດທະນາປະເທດຊາດຕາມຈຸດໝາຍ ທິ່ພັກກຳນົດໄວ້.
ການປະກາດໃຊ້ລັດຖະທຳມະນູນເປັນເຫດການການເມືອງທີ່ສຳຄັນຂອງຊາດທັງເປັນຂີດໝາຍໃໝແຫ່ງການຫັນໄປສູ່ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ແລະ ສ້າງລັດແຫ່ງກົດໝາຍເທື່ອລະກ້າວສ່ອງແສງໃຫ້ເຫັນລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວຂອງລະບອບປະຊາ ທິປະໄຕປະຊາຊົນພາຍໃຕ້ການນຳພາທີ່ສະຫຼາດສ່ອງໃສຂອງພັກປະຊາຊົນປະຕິວັດລາວທັງເປັນການຢັ້ງ ຢືນຕໍ່ໂລກໃຫ້ຮັບຮູ້ຄວາມເປັນເອກະລາດ ແລະ ຜືນແຜ່ນດິນອົນຄົບຖ້ວນຂອງ ສປປ ລາວ.
ທາດແທ້ຂອງລັດຖະທຳມະນູນແຫ່ງສປປ ລາວ ແມ່ນການສ້າງສະຕິຊາດເອກະພາບໜຶ່ງດຽວກັນພາຍໃຕ້ການນຳພາຂອງພັກ, ເປັນພາຫະນະດ້ານນິຕິກຳທີ່ສຳຄັນເພື່ອສຶກສາອົບຮົມປະຊາຊົນຍົກສູງນໍ້າໃຈຮັກຊາດ ຮັກລະບອບປະຊາທິປະໄຕປະຊາຊົນ, ແມ່ນການເພີ່ມທະວີຄວາມສາມັກຄີປອງດອງທົ່ວປວງຊົນທັງຊາດ,ເປັນເຊີດຊູບົດບາດ ແລະ ຄວາມສາມາດເປັນເຈົ້າປະເທດຊາດຂອງປະຊາຊົນລາວບັນດາເຜົ່າເພື່ອພ້ອມກັນສຸມທຸກກຳລັງແຮງ ແລະ ຄວາມສາມາດຂອງຕົນປະກອບສ່ວນໃນພາລະກິດປົກປັກຮັກສາ ແລະ ສ້າງ ສາພັດທະນາປະເທດຊາດ ເຮັດໃຫ້ປະເທດຊາດມັ່ງຄັ່ງເຂັ້ມແຂງ ປະຊາຊົນຮັ່ງມີຜາສຸກ ສັງຄົມສາມັກຄີປອງດອງ ປະຊາທິປະໄຕ ຍຸຕິທຳ ແລະ ສີວິໄລ.
ນັບແຕ່ປະກາດໃຊ້ລັດຖະທຳມະນູນປີ 1991 ເປັນຕົ້ນມາ, ຂະບວນການສ້າງກົດໝາຍຂອງລາວມີຄວາມຄືບໜ້າ ແລະ ເປັນລະບົບຄົບຊຸດຢ່າງຈະແຈ້ງ ສະແດງອອກພາຍຫຼັງກອງປະຊຸມຄັ້ງປະຖົມມະລືກຂອງສະ ພາແຫ່ງຊາດຊຸດທີ 8 ໄດ້ພິຈາລະນາຮັບຮອງເອົາແຜນການສ້າງ ແລະ ປັບປຸງກົດໝາຍ 5 ປີ 105 ສະ ບັບ ໃນນີ້ກົດໝາຍສ້າງໃໝ່ 50 ສະບັບ ແລະ ກົດໝາຍປັບປຸງ 55 ສະບັບໂດຍໄດ້ແບ່ງເປັນ 5 ຂົງເຂດຄື ຂົງເຂດການປົກຄອງ ແລະ ຍຸຕິທຳ 21 ສະບັບ, ເສດຖະກິດແຜນການ ແລະ ການເງິນ 51 ສະບັບ, ວັດທະນະທຳສັງຄົມ 29 ສະບັບ, ການປ້ອງກັນຊາດປ້ອງກັນຄວາມສະຫງົບ 2 ສະບັບ, ການຕ່າງປະ ເທດ 2 ສະບັບ. ປັດຈຸບັນປະເທດເຮົານອກຈາກມີກົດໝາຍຫລາຍ 100 ສະບັບທີ່ປະກາດໃຊ້ແລ້ວ,ລັດຖະບານກໍຄືກະຊວງ ແລະ ອົງການທຽບເທົ່າຍັງໄດ້ອອກນິຕິກຳໃຕ້ກົດໝາຍເພື່ອຮັບໃຊ້ການປະຕິບັດໜ້າທີ່ວຽກງານຂອງຕົນຫຼາຍກວ່າ 100 ສະບັບ.
ແນວໃດກໍດີຜ່ານມາ ເຖິງວ່າການສ້າງ ແລະ ປັບປຸງກົດໝາຍຄືບໜ້າ, ແຕ່ຫຼາຍໆກົດໝາຍທີ່ຜ່ານການຮັບຮອງ ແລະ ປະກາດໃຊ້ຢ່າງເປັນທາງການແລ້ວ ເຫັນວ່າຍັງບໍ່ທັນຮັບປະກັນໄດ້ຄຸນນະພາບເທົ່າທີ່ຄວນເນື່ອງຈາກຫຼາຍສາເຫດເປັນຕົ້ນການຄົ້ນຄວ້າ, ການເກັບກຳຂໍ້ມູນ, ການກຳເນື້ອໃນຈຸດສຸມຂອງກົດໝາຍຍັງບໍ່ທັນໜັກແໜ້ນ, ບາງກົດໝາຍພິຈາລະນາໃນວົງແຄບ ແລະ ມີລັກສະນະຟ້າວຟັ່ງເຮັດໃຫ້ການສ້າງ ຫຼື ປັບປຸງກົດໝາຍບໍ່ທັນຄົບຖ້ວນ, ຮອບດ້ານ ແລະ ພາວະວິໄສ.
ລັດຖະທຳມະນູນ ແລະ ກົດໝາຍປຽບເໝືອນເຄື່ອງມືສຳຄັນທີ່ນຳໃຊ້ເຂົ້າໃນການຄຸ້ມຄອງລັດ, ຄຸ້ມຄອງ ສັງຄົມໃຫ້ມີຄວາມຍຸຕິທຳ, ສະຫງົບ ແລະ ເປັນລະບຽບຮຽບຮ້ອຍ, ກົດໝາຍບໍ່ອາດມີຜົນສັກສິດໄດ້ຖ້າທຸກຄົນໃນສັງຄົມຂາດສະຕິ ແລະ ລະເມີດລະບຽບກົດໝາຍ ຊຶ່ງໃນໂອກາດວັກລັດຖະທຳມະນູນວັນທີ 15 ສິງ ຫາຄົບຮອບ 31 ປີ ຮຽກຮ້ອງປະຊາຊົນລາວບັນດາເຜົ່າຈົ່ງຮ່ວມກັນເຊື່ອມຊຶມ ແລະ ກຳແໜ້ນ, ນຳໃຊ້ກົດ ໝາຍເພື່ອປົກປ້ອງສິດຜົນປະໂຫຍດອັນຊອບທຳ ແລະ ປະຕິບັດພັນທະຂອງຕົນຢ່າງຖືກຕ້ອງ.
