ສີລັງກາຂຶ້ນຄ່າໄຟຟ້າຄັ້ງທຳອິດໃນຮອບ 9 ປີ ສູງເຖິງ 264%
ໜ່ວຍງານລັດວິສາຫະກິດດ້ານໄຟຟ້າຂອງສີລັງກາ ປັບຂຶ້ນຄ່າໄຟຟ້າເປັນຄັ້ງທຳອິດ ນັບແຕ່ປີ 2013 ໃນອັດຕາສູງເຖິງ 264% ເພື່ອບັນເທົາການຂາດທຶນ.
ວັນທີ 11 ສິງຫາ 2022, ສຳນັກຂ່າວຕ່າງປະເທດລາຍງານວ່າ: ຄະນະກຳມະການໄຟຟ້າຊີລອນ (CEB) ເຊິ່ງເປັນລັດວິສາຫະກິດ ແລະ ເປັນຜູ້ຜູກຂາດການຜະລິດກະແສໄຟຟ້າພຽງແຫ່ງດຽວຂອງສີລັງກາ ປະກາດປັບຂຶ້ນຄ່າໄຟຟ້າໃນອັດຕາ 264% ສຳລັບຜູ້ໃຊ້ກະແສໄຟຟ້າໜ້ອຍທີ່ສຸດ.
ທັງນີ້, ຖືເປັນຄັ້ງທຳອິດໃນຮອບ 9 ປີທີ່ CEB ປັບຂຶ້ນຄ່າໄຟຟ້າ ໂດຍມີການໃຫ້ເຫດຜົນວ່າ: ເພື່ອບັນເທົາຄວາມຮຸນແຮງຂອງວິກິດການຂາດທຶນ ເຊິ່ງຕອນນີ້ມີຕົວເລກສະສົມຢ່າງໜ້ອຍ 616 ລ້ານໂດລາສະຫະລັດ.
ຂະນະທີ່ແຫລ່ງຂ່າວໃຫ້ຂໍ້ມູນອີກວ່າ: ກ່ອນໜ້ານີ້ CEB ຕ້ອງການປັບເພີ່ມອັດຕາຄ່າໄຟຟ້າສູງເຖິງ 800% ແຕ່ຄະນະກຳມະການກວດສອບສາທາລະນູປະໂພກກຳນົດເພດານໄວ້ສູງສຸດ 264%. ເຖິງຢ່າງໃດກໍຕາມ, ປະມານສອງໃນສາມຈາກ 7,8 ລ້ານຄອບຄົວ ເຊິ່ງໃຊ້ກະແສໄຟຟ້າໜ້ອຍກວ່າ 90 ກິໂລວັດຕໍ່ເດືອນ ຈະໄດ້ຮັບຜົນກະທົບຈາກມາດຕະການດັ່ງກ່າວຫລາຍທີ່ສຸດ ໂດຍຈາກທີ່ຈ່າຍຄ່າໄຟຟ້າຢູນິດລະ 2,50 ຣູປີສີລັງກາ, ຄ່າທຳນຽມຈະເພີ່ມແບບກ້າວກະໂດດເປັນ 8,0 ຣູປີສີລັງກາຕໍ່ 1 ຢູນິດ.
ສ່ວນຄອບຄົວທີ່ໃຊ້ໄຟຟ້າຫລາຍກວ່ານັ້ນ ຕ້ອງຈ່າຍເພີ່ມເປັນ 75 ຣູປີສີລັງກາຕໍ່ຢູນິດ ຈາກຢູນິດລະ 45 ຣູປີສີລັງກາ ຫລື ເພີ່ມຂຶ້ນປະມານ 80%.
ປັດຈຸບັນ ມູນຄ່າໜີ້ຕ່າງປະເທດຂອງສີລັງກາສະສົມມີ 51.000 ລ້ານໂດລາສະຫະລັດ ແລະ ມີກຳນົດຕ້ອງຊຳລະຄືນປະມານ 25.000 ລ້ານໂດລາສະຫະລັດ ລະຫວ່າງປີ 2022-2026.
