ສິງກະໂປຢືນຢັນ “ອະດີດປະທານາທິບໍດີສີລັງກາ” ເດີນທາງອອກຈາກສິງກະໂປແລ້ວ ກຳລັງມຸ່ງໜ້າມານະຄອນຫລວງບາງກອກ

ສຳນັກງານຕຳຫລວດກວດຄົນເຂົ້າເມືອງສິງກະໂປເຜີຍ “ທ່ານ ໂກຢາບາຢາ ຣາຊປັກສາ” ອະດີດປະທານາທິບໍດີສີລັງກາ ໄດ້ເດີນທາງອອກຈາກສິງກະໂປແລ້ວໃນວັນທີ 11 ສິງຫາ ໂດຍກຳລັງມຸ້ງໜ້າມານະຄອນຫລວງບາງກອກ.

ໜັງສືພິມສເຕຣດທາມຂອງສິງກະໂປລາຍງານວ່າ: ອະດີດຜູ້ນຳສີລັງກາຂຶ້ນເຮືອບິນອອກຈາກສິງກະໂປໃນຕອນແລ້ງວັນທີ 11 ສິງຫາ ຫລັງຈາກທາງການໄທອອກມາຢືນຢັນວ່າທ່ານ ຣາຊປັກສາ ຈະເດີນທາງອາໄສໃນປະເທດໄທຊົ່ວຄາວ ກ່ອນຫາພື້ນທີ່ລີ້ໄພຕໍ່ໄປ.

ທ່ານ ພົນເອກ ປະຍຸດ ຈັນໂອຊາ ນາຍົກລັດຖະມົນຕີ ແລະ ລັດຖະມົນຕີວ່າການກະຊວງປ້ອງກັນປະເທດ ເປີດເຜີຍຕໍ່ສື່ມວນຊົນໃນວັນທີ 10 ສິງຫາວ່າ: ການເດີນທາງມາອາໄສໃນປະເທດໄທຂອງອະດີດປະທານາທິບໍດີສີລັງກາເປັນເລື່ອງຂອງມະນຸດສະທຳ ແລະ ໄດ້ມີການສັນຍາກັນຮຽບຮ້ອຍແລ້ວວ່າ: ຢູ່ໄດ້ເປັນການຊົ່ວຄາວເພື່ອກຽມຫາພື້ນທີ່ລີ້ໄພຕໍ່ໄປ ໂດຍຈະບໍ່ມີການຫຍຸ້ງກ່ຽວ, ພົບປະ ແລະ ຕ້ອງບໍ່ມີການເຄື່ອນໄຫວໃດໆທັງໝົດ.

ສ່ວນທ່ານ ດອນ ປໍລະມັດວິໄນ ລັດຖະມົນຕີວ່າການກະຊວງການຕ່າງປະເທດ ອອກມາລະບຸໃນວັນດຽວກັນວ່າ: ອະດີດປະທານາທິບໍດີປະເທດສີລັງກາ ຖືໜັງສືເດີນທາງທາງການທູດທີ່ໄດ້ຮັບການສະໜັບສະໜູນຈາກລັດຖະບານສີລັງກາທີ່ເປັນມິດກັບໄທ ຈຶ່ງສາມາດມາອາໄສໃນປະເທດໄທໄດ້ ແຕ່ຕ້ອງເປັນໄປຕາມຂອບເວລາບໍ່ເກີນ 90 ວັນ ແລະ ເບິ່ງວ່າເລື່ອງນີ້ບໍ່ເປັນບັນຫາ ເພາະຍັງບໍ່ມີການຄັດຄ້ານຈາກລັດຖະບານສີລັງກາ ແຕ່ບັນຫາອາດມີຢູ່ພຽງບັນຫາດຽວຄື ປະຊາຊົນຊາວສີລັງກາທີ່ບໍ່ແມ່ນລັດຖະບານ.

ລັດຖະມົນຕີຕ່າງປະເທດເນັ້ນວ່າ: ອະດີດປະທານາທິບໍດີຈະສາມາດມາອາໄສຢູ່ໄທໄດ້ໃນເວລາຈຳກັດ ຕາມກົດເກນຂອງໄທ ບໍ່ແມ່ນຈະຢູ່ດົນຊໍ່າໃດກໍໄດ້, ສ່ວນຈະອາໄສຢູ່ໃສນັ້ນຂຶ້ນຢູ່ກັບການຈັດການຂອງທ່ານເອງ ສາມາດຈະຢູ່ບ່ອນໃດກໍໄດ້ ບໍ່ວ່າຈະເປັນການເຊົ່າອາພາດເມັນ ຫລື ເຮືອນພັກ.

ສຳລັບອະດີດຜູ້ນຳສີລັງກາໜີອອກຈາກປະເທດໃນວັນທີ 13 ກໍລະກົດຜ່ານມາ ດ້ວຍເຮືອບິນທະຫານໄປມັລດີຟ ກ່ອນຈະເດີນທາງຕໍ່ໄປປະເທດສິງກະໂປ ພາຍຫລັງເກີດເຫດການປະທ້ວງຮຸນແຮງ ເນື່ອງຈາກວິກິດເສດຖະກິດຄັ້ງຮຸນແຮງ ໂດຍຜູ້ປະທ້ວງຈຳນວນຫລາຍໄດ້ບຸກເຂົ້າຢຶດເຮືອນພັກ ແລະ ສຳນັກງານປະທານາທິບໍດີເພື່ອກົດດັນໃຫ້ທ່ານລາອອກຈາກຕຳແໜ່ງ.

ອ້າງອີງ:

https://www.straitstimes.com/…/gotabaya-rajapaksa…