ເອລລຽດ ຕໍ່ສັນຍາສະບັບໃຫມ່ກັບ ລີເວີພູລ ເຖິງປີ 2027
ລີເວີພູລ ປະກາດວ່າ ຮາວີ ເອລລຽດ ກອງກາງດາວຮຸ່ງໄດ້ຕໍ່ສັນຍາສະບັບໃຫມ່ກັບທີມອອກໄປຈົນເຖິງປີ 2027 ເປັນທີ່ຮຽບຮ້ອຍ.
ສຳລັບ ເອລລຽດ ຍ້າຍຈາກ ຟູແລ່ມ ມາຢູ່ກັບ ລີເວີພູລ ເມື່ອເດືອນກຸມພາ 2019 ເຊິ່ງລາວກໍໄດ້ຮັບໂອກາດລົງສະໜາມໃຫ້ທີມ ໄປທັງຫມົດ 22 ນັດທຸກລາຍການ.
ຂະນະທີ່ໃນລະດູການນີ້ດາວເຕະອາຍຸ 19 ປີໄດ້ລົງສະຫນາມໃນເກມເປັນທາງການໄປແລ້ວ 2 ນັດຄືເກມຊະນະ ແມນເຊສເຕີ ຊິຕີ 3-1 ໃນການແຂ່ງຂັນ ຄອມມິວນີຕີ ຊິລ ແລະ ສະເຫມີ ຟູແລ່ມ 2-2 ໃນເກມພຣີເມຍລີກ ນັດເປີດລະດູການ.
ຈົນຫລ້າສຸດ ລີເວີພູລ ໄດ້ອອກຖະແຫລງການຜ່ານເວັບໄຊວ່າ ເອລລຽດ ໄດ້ເຊັນສັນຍາສະບັບໃຫມ່ກັບທີມ ເຊິ່ງສົ່ງຜົນໃຫ້ລາວຈະ ຫລິ້ນໃນຖິ່ນ ແອນຟິລ ເຖິງປີ 2027 ເຖິງວ່າປີກາຍລາວຫາກໍຕໍ່ສັນຍາກັບ ລີເວີພູລ ໄປເຖິງປີ 2026 ກໍຕາມ.
‘‘ ເປັນເລື່ອງດີສະເຫມີທີ່ຮູ້ວ່າ ຂ້ອຍຈະຢູ່ນີ້ໄປອີກຫລາຍປີ ແລະ ບໍ່ມີຫຍັງໃນໂລກນີ້ທີ່ເຮັດໃຫ້ຂ້ອຍມີຄວາມສຸກ ແລະ ຕື່ນເຕັ້ນ ຫລາຍກວ່ານີ້ແລ້ວ ’’ ເອລລຽດ ລະບຸຫລັງຕໍ່ສັນຍາ.
