ນັກວິໄຈຄົ້ນພົບໄວຣັສຊະນິດໃໝ່ໃນຈີນ ເປັນການແພ່ຈາກສັດສູ່ຄົນ ມີຜູ້ຕິດເຊື້ອແລ້ວ 35 ຄົນ

ທີມນັກວິທະຍາສາດນາໆຊາດພົບໄວຣັສເລວີລະບາດທາງຕາເວັນອອກຂອງຈີນ ເບື້ອງຕົ້ນຍັງບໍ່ພົບຫລັກຖານວ່າແພ່ຈາກຄົນສູ່ຄົນໄດ້.

ງານວິໄຈທີ່ໄດ້ຮັບການຕີພິມລົງໃນວາລະສານທາງການແພດ New England Journal of Medicine ລະບຸເຖິງການຄົ້ນພົບການລະບາດຂອງໄວຣັສຊະນິດໃໝ່ມີຊື່ວ່າ: ເລວີ (LayV) ຫລື ຊື່ເຕັມວ່າ: Langya henipavirus ທາງພາກຕາເວັນອອກຂອງປະເທດຈີນ ໂດຍຄາດວ່າເປັນການລະບາດຈາກໜູຜີ ຫລື ຊຣູ (Shrew) ມາສູ່ມະນຸດ.

ສຳລັບໄວຣັສຊະນິດນີ້ຖືກພົບເປັນຄັ້ງທຳອິດໃນທ້າຍປີ 2018 ແລະ ມາຮອດປັດຈຸບັນມີຜູ້ໄດ້ຮັບການຢືນຢັນວ່າຕິດເຊື້ອທັງໝົດ 35 ຄົນ ສ່ວນຫລາຍເປັນກະສິກອນ ແລະ ບໍ່ມີຜູ້ເສຍຊີວິດ.

ໃນຜູ້ຕິດເຊື້ອທັງໝົດ ມີ 26 ຄົນທີ່ພົບວ່າຕິດເຊື້ອໄວຣັສເລວີພຽງຊະນິດດຽວ ທັງໝົດມີອາການໄຂ້, ໄອ, ອ່ອນເພຍ, ຈຳນວນເມັດເລືອດຂາວຫລຸດລົງ ແລະ ກຸ່ມທີ່ມີອາການໜັກຈະມີອາການຕັບ ແລະ ໄຕເຮັດວຽກຜິດປົກກະຕິ.

ໂດຍທີມນັກວິໄຈທີ່ປະກອບມີນັກວິທະຍາສາດຈາກຈີນ, ສິງກະໂປ ແລະ ອົດສະຕຣາລີ ຍັງບໍ່ພົບຫລັກຖານວ່າເຊື້ອໄວຣັສເລວີມີການຕິດຕໍ່ຈາກຄົນສູ່ຄົນ ເນື່ອງຈາກຜູ້ຕິດເຊື້ອແຕ່ລະຄົນບໍ່ໄດ້ມີການສຳຜັດໃກ້ຊິດ ຫລື ຈຸດຮ່ວມໃດໆ, ແຕ່ເນື່ອງຈາກຍັງມີຕົວຢ່າງໜ້ອຍເກີນໄປ ຈຶ່ງຍັງບໍ່ສາມາດຕັດໂອກາດໃນການແພ່ເຊື້ອໃນມະນຸດນຳກັນໄດ້ທັງໝົດ.

ເຖິງວ່າໄວຣັສເລວີຈະຍັງບໍ່ໄດ້ມີອັນຕະລາຍ ຫລື ອັດຕາການແພ່ລະບາດທີ່ວ່ອງໄວ, ແຕ່ສິ່ງທີ່ໜ້າກັງວົນຄື ງານວິໄຈນີ້ເປັນອີກຕົວຢ່າງໃນການເຕືອນວ່າ: ຍັງມີເຊື້ອພະຍາດອີກຈຳນວນຫລາຍທີ່ວົນວຽນຢູ່ໃນສັດ ເຊິ່ງອາດມີໂອກາດຈະແພ່ມາສູ່ມະນຸດໄດ້.

ອ້າງອີງ:

https://fortune.com/…/new-china-virus-langya…/

https://www.washingtonpost.com/…/langya-virus-china…/