ຊິເຢກ ກຽມລາ ເຊລຊີ ຫວັງໄປຢູ່ກັບທີມດັງອິຕາລີ ຫລັງບໍ່ຢູ່ໃນແຜນຂອງ ທູເຄິລ

ເວັບໄຊບານເຕະອິຕາລີ ລາຍງານວ່າ : ເອຊີ ມິລານ ທີມແຊ໊ມເກ່ົາຂອງ ເຊເຣຍ ອາ ອິຕາລີ ກຽມແຜນຍື່ນຂໍ້ສະເຫນີຄວ້າຕົວ ຮາຄິມ ຊິເຢກ ປີກທີມຊາດໂມຣ໊ອກໂກ ຂອງ ເຊລຊີ ມາເສີມທີມ.

ນັກເຕະອາຍຸ 29 ປີລາຍນີ້ ຍັງມີສັນຍາກັບ ເຊລຊີ ຈົນເຖິງປີ 2025 ແຕ່ເບິ່ງຄືວ່າລາວຈະບໍ່ຢູ່ໃນແຜນການເຮັດທີມຂອງ ໂທມັສ ທູເຄິລ ແນວໃດກໍຕາມລາວຍັງໄດ້ຮັບຄວາມສົນໃຈຈາກທີມດັງຂອງອິຕາລີ ຢ່າງ ເອຊີ ມິລານ.

ໂດຍຫລ້າສຸດມີການເປີດເຜີຍວ່າທາງເອຊີ ມິລານ ໄດ້ເຮັດການເຈລະຈາຮອບໃຫມ່ກັບເຊລຊີແລ້ວ ແລະຄາດວ່າພວກເຂົາຈະຄວ້າ ຕົວ ຊິເຢກ ມາເສີມຄວາມແຂງແກ່ນດ້ວຍສັນຍາຢືມຕົວ.

ສຳລັບມິລານ ຕອນນີ້ພວກເຂົາມີຕົວເລືອກໃນຕຳແຫນ່ງປີກຂວາຢູ່ແລ້ວ 2 ຄົນ ຄື ອາເລັກຊິສ ເຊເລເມເກີສ ກັບ ຈູເນຍ ເມສຊິອາສ ເຊິ່ງການເຂົ້າມາຂອງ ຊີເຢກ ຈະເພີ່ມການແຂ່ງຂັນກັນໃນທີມເພີ່ມຂຶ້ນອີກ.