ສະພາຄວາມໝັ້ນຄົງແຫ່ງສະຫະປະຊາຊາດ ຮຽກປະຊຸມດ່ວນ ກໍລະນີການສູ້ຮົບໃນເຂດກາຊາ
ວັນທີ 9 ສິງຫາ 2022, ສຳນັກຂ່າວຕ່າງປະເທດລາຍງານວ່າ: ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ຮຽກປະຊຸມວາລະສຸກເສີນກໍລະນີການສູ້ຮົບໃນເຂດກາຊາ ລະຫວ່າງກອງທັບອິດສະລາແອນ ແລະ ກອງກຳລັງອິສລາມນິຮາດຂອງຊາວປາແລັສຕິນ ທີ່ກັບມາຮຸນແຮງອີກ.
ໂດຍກອງທັບອິດສະລາແອນໂຈມຕີໃສ່ເຂດກາຊາຕໍ່ເນື່ອງ 3 ວັນ ນັບແຕ່ທ້າຍອາທິດຜ່ານມາ ເບື້ອງຕົ້ນມີຊາວປາແລັສຕິນເສຍຊີວິດແລ້ວຢ່າງໜ້ອຍ 44 ຄົນ ເກືອບເຄິ່ງໜຶ່ງເປັນພົນລະເຮືອນ ແລະ ໃນຈຳນວນນີ້ 15 ຄົນເປັນພຽງເດັກນ້ອຍທີ່ຍັງບໍ່ບັນລຸນິຕິພາວະ ຖືເປັນການເປີດການໂຈມຕີໃສ່ເຂດກາຊາຮຸນແຮງທີ່ສຸດ ຕໍ່ຈາກສົງຄາມ 11 ວັນເມື່ອປີ 2021 ທີ່ຂ້າຊີວິດປະຊາຊົນຢ່າງໜ້ອຍ 250 ຄົນ.
ເຖິງວ່າການສູ້ຮົບ ແລະ ຄວາມຂັດແຍ່ງເບິ່ງຄືສະຫງົບລົງຈາກຄວາມພະຍາຍາມໃນການເຈລະຈາຢຸດຍິງ ໂດຍມີອີຢິບທີ່ໄດ້ຮັບການປະສານການຊ່ວຍເຫລືອຈາກສະຫະປະຊາຊາດ ແລະ ລັດຖະບານກາຕາ ຊ່ວຍອຳນວຍຄວາມສະດວກໃນການເຈລະຈາຢຸດຍິງລະຫວ່າງອິດສະລາແອນ ແລະ ປາແລັສຕິນໃນຄັ້ງນີ້.
ເຖິງຢ່າງໃດກໍຕາມ, ທູດພິເສດຂອງສະຫະປະຊາຊາດ ປະຈຳພາກພື້ນຕາເວັນອອກກາງ ລະບຸຜ່ານວີດີໂອກ່ອນຈະເລີ່ມຕົ້ນວາລະກອງປະຊຸມວ່າ: ການເຈລະຈາຢຸດຍິງເປັນສິ່ງເບາະບາງ ການກັບມາເລີ່ມສູ້ຮົບກັນໃໝ່ບໍ່ພຽງແຕ່ຈະສ້າງຜົນທາງລົບຕໍ່ອິດສະລາແອນ ແລະ ປາແລັສຕິນເທົ່ານັ້ນ, ແຕ່ຍັງເຮັດໃຫ້ປັດໄຈແວດລ້ອມທາງການເມືອງຊັບຊ້ອນຍິ່ງຂຶ້ນ.
ໂດຍກອງປະຊຸມໄດ້ສະແດງຄວາມກັງວົນວ່າ: ເຫດການນີ້ຈະນຳໄປສູ່ການຜະເຊີນໜ້າກັນທາງທະຫານທີ່ຮຸນແຮງຍິ່ງຂຶ້ນ ແລະ ຍິ່ງເຮັດໃຫ້ສະຖານະການດ້ານມະນຸດສະທຳໃນເຂດກາຊາຮ້າຍແຮງລົງໄປອີກ ຈຶ່ງຮຽກຮ້ອງໃຫ້ທຸກຝ່າຍທີ່ກ່ຽວຂ້ອງເລັ່ງຫາທາງອອກທີ່ເປັນຮູບປະທຳ ແລະ ຍືນຍົງໃຫ້ວິກິດຄວາມຂັດແຍ່ງທີ່ຊຳເຮື້ອນີ້.
ອ້າງອີງ:
- https://www.aljazeera.com/news/2022/8/9/un-security-council-holds-emergency-meeting-over-gaza-fighting
- https://www.news18.com/news/world/un-security-council-to-meet-over-gaza-fighting-5714593.html
- https://www.france24.com/en/middle-east/20220809-un-holds-emergency-meeting-on-gaza-fighting
