ເຈົ້າຄອງນະຄອນຫລວງວຽງຈັນ ລົງຕິດຕາມສະພາບນໍ້າຖ້ວມຂັງພົບ 25 ບ້ານ 839 ຄອບຄົວໄດ້ຮັບຜົນກະທົບ ພ້ອມຊີ້ນຳໃຫ້ເມືອງເລັ່ງແກ້ໄຂຢ່າງຮີບດ່ວນ

ຂ່າວໜັງສືພິມວຽງຈັນໃໝ່ລາຍງານໃຫ້ຮູ້ວ່າ: ວັນທີ 8 ສິງຫາ 2022 ຜ່ານມານີ້ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ລົງຕິດຕາມກວດກາສະພາບນໍ້າຖ້ວມຂັງ ຢູ່ເມືອງສີໂຄດຕະບອງ ນວ ເພື່ອເລັ່ງ ແກ້ໄຂສະພາບ.

ການລົງຕິດຕາມຄັ້ງນີ້ ທ່ານເຈົ້າຄອງໄດ້ຕິດຕາມກວດກາເບີ່ງຈຸດພື້ນທີ່ມີນໍ້າຖ້ວມອັ່ງ-ຂັງຫຼາຍທີ່ສຸດ ໂດຍສະເພາະຈຸດນ້ໍາຖ້ວມ-ຂັງບໍລິເວນ ບ້ານລຽບຖະໜົນ 13 ເໜືອ ຈຸດບ້ານໜອງໜ້ຽວ-ໜອງແຕ່ງ ເຂດຕະຫຼາດລາວອົດຊີ ແລະ ຈຸດໜອງອໍ້, ບ້ານໂນນແກ້ວ ຈາກນັ້ນ ໄດ້ຕິດຕາມ ເບິ່ງຈຸດຄອງລະບາຍນ້ໍາເຂດບ້ານຫຼັກຫີນ ສືບຕໍ່ຕິດຕາມປະຕູນ້ໍາ ຫ້ວຍນ້ໍາບ້ານໜອງດາ-ເກົ້າລ້ຽວ ແລະ ປະຕູນ້ໍາລະບາຍນ້ໍາຫ້ວຍມູນ.

ປັດຈຸບັນ ທົ່ວເມືອງສີໂຄດຕະບອງມີນໍ້າຖ້ວມ-ຂັງທັງໝົດ 29 ຈຸດ ໃນຈໍານວນ 25 ບ້ານ ມີທັງໝົດ 839 ຄອບຄົວ ທີ່ຖືກຜົນກະທົບ ແຕ່ລະຈຸດມາຮອດຕອນບ່າຍຂອງວັນທີ 8 ສິງຫາ 2022 ສະພາບນ້ໍາແມ່ນໄດ້ຫຼຸດລົງພຽງເລັກຫນ້ອຍ ແລະ ບາງຈຸດຍັງຄົງທີ່.

ສາເຫດອັນເນື່ອງມາຈາກປະລິມານນ້ໍາຝົນໄດ້ເພີ່ມຂຶ້ນ ເຮັດໃຫ້ການລະບາຍນໍ້າສູ່ຫ້ວຍນ້ໍາ ແລະ ຮ່ອງທໍາມະຊາດບໍ່ສະດວກ ມີການອຸດຕັນແລວທາງ ນ້ໍາ ແລະ ອື່ນໆ.

ທ່ານເຈົ້າຄອງນະຄອນຫຼວງວຽງຈັນ ໄດ້ຊີ້ນໍາໃຫ້ອໍານາດການປົກຄອງເມືອງ ແລະ ພາກສ່ວນກ່ຽວຂ້ອງ ເອົາໃຈໃສ່ຕິດຕາມເຝົ້າລະວັງຢ່າງໃກ້ຊິດ ພ້ອມຊີ້ນໍາໃຫ້ແກ້ໄຂຮ່ອງລະບາຍນ້ໍາອອກ ຈຸດທີ່ມີການອຸດຕັນທາງນໍ້າໄຫຼລົງສູ່ຮ່ອງທໍາມະຊາດ ເພື່ອລະບາຍນ້ໍາອອກບໍ່ມີໃຫ້ນໍ້າສູງຂຶ້ນຕື່ມ ໂດຍສະເພາະ ຈຸດຖະໜົນສາຍຫຼັກເຂດບ້ານສີໄຄ ຈຸດບ້ານໜອງຫນ້ຽວ-ໜອງແຕ່ງ ເຂດຕະຫຼາດລາວອົດຊີ ແລະ ຈຸດໜອງອໍ້, ບ້ານໂນນແກ້ວ ທີ່ໄດ້ຮັບຜົນກະທົບຫຼາຍທີ່ສຸດ ໂດຍມອບອົງການປົກຄອງເມືອງ ແລະ ພະແນກການ ກ່ຽວຂ້ອງ ປະສານສົມທົບກັນແກ້ໄຂຢ່າງຮີບດ່ວນ.

ພ້ອມນັ້ນ ຍັງໄດ້ຊີ້ນໍາໃຫ້ແຕ່ລະພາກສ່ວນກໍານົດແຜນການແກ້ໄຂໃຫ້ລະອຽດ ທັງໃນໄລຍະສັ້ນ ແລະ ໄລະຍະຍາ ຊີ້ນໍາໃຫ້ກວດຄືນບັນຫາການຖົມດິນທີ່ປິດແລວງທາງນໍ້າໄຫຼແກ້ໄຂຈຸດທີ່ມີຄວາມສ່ຽງທີ່ອາດເກີດເພີ່ມຂຶ້ນໃນຈຸດຕ່າງໆ ເພື່ອແນໃສ່ຫຼຸດຜ່ອນຜົນກະທົບຕໍ່ການດໍາລົງຊີວິດຂອງປະຊາຊົນໃຫ້ຫຼຸດລົງ.

ຂໍ້ມູນຂ່າວ: ໜັງສືພິມວຽງຈັນໃໝ່