ເຮັດແນວໃດ ບໍ່ໃຫ້ລຳບາກລູກຫລານ ແລະ ມີຄວາມສຸກໃນຕອນເຮົາເຖົ້າແກ່?
August 9, 2022 - 12:45 PM
- ຢູ່ດ້ວຍຕົວເອງ: ຄົນເຮົາເມື່ອແກ່ຕົວລົງ ກໍຍັງຕ້ອງເພິ່ງຕົວເອງ ລູກໆ ບໍ່ສາມາດຢູ່ກັບເຮົາໄດ້ຕະຫລອດໄປ ຫ້າມເອົາຄວາມຫວັງທີ່ຈະໃຫ້ລູກເບິ່ງແຍງເຮົາຕອນແກ່ໄປ ຝາກໄວ້ກັບເຂົາ ເພາະລູກໆ ກໍ່ມີໜ້າທີ່ຕ້ອງຮັບຜິດຊອບ ມີຄອບຄົວຂອງເຂົາທີ່ຕ້ອງເບິ່ງແຍງ ກໍ່ປຽບສະເໝືອນໄປເພີ່ມຄວາມກົດດັນ ໃຫ້ແກ່ພວກເຂົາ ເຮົາໄປຢູ່ກັບລູກກໍມັກຈະເວົ້າເລື່ອງທີ່ບໍ່ຄວນເວົ້າ ເຮັດໃຫ້ບໍ່ມີຄວາມສຸກ ຢູ່ທີ່ບ້ານຂອງເຮົາເອງ ໃຊ້ຊີວິດຢ່າງສະຫງົບສຸກລຽບງ່າຍໄປໃນແຕ່ລະມື້ ດ້ວຍເງິນເກັບຂອງເຮົາຕັ້ງແຕ່ໜຸ່ມສາວອາດຈະດີກວ່າ ແລະ ຢ່າແບ່ງສົມບັດໃຫ້ລູກໄວເກີນໄປ ຈື່ໄວ້ວ່າຂອງພໍ່ແມ່ແນວໃດກໍເປັນຂອງລູກ ແຕ່ຂອງລູກແນວໃດ ກໍບໍ່ແມ່ນຂອງພໍ່ແມ່ ເມື່ອເຖິງເວລາທີ່ເຮົາຈຳເປັນຕ້ອງແບມືຂໍເງິນລູກ ແລ້ວເຮົາຈະຮູ້ວ່າມັນຍາກພຽງໃດ
- ສຸຂະພາບທີ່ດີ: ການມີສຸຂະພາບທີ່ດີ ແລະ ຮ່າງກາຍແຂງແຮງເປັນສິ່ງທີ່ສຳຄັນທີ່ສຸດ ຍິ່ງແກ່ຕົວຍິ່ງສຳຄັນ ພຽງໃຫ້ມີສຸຂະພາບແຂງແຮງ ກິນອາຫານທີ່ມີປະໂຫຍດ ນອນຫລັບພຽງພໍ ຍ່າງໄດ້ເອງເມື່ອອາຍຸຫລາຍຂຶ້ນ ຕ້ອງຮັກສາສຸຂະພາບ ເອົາໃຈໃສ່ຕົວເອງໃຫ້ຫລາຍຂຶ້ນ ສົນໃຈເລື່ອງຂອງຜູ້ອື່ນໃຫ້ໜ້ອຍລົງ ອອກກຳລັງກາຍ ແລະ ຮຽນຮູ້ວິທີການເບິ່ງແຍງສຸຂະພາບໃຫ້ຖືກວິທີ
- ຊີວິດທີ່ມີສີສັນ: ເຮັດໃຫ້ຊີວິດຂອງເຮົາມີສີສັນ ແລະ ມີຊີວິດຊີວາ ເຮັດໃຫ້ຊີວິດເຕັມໄປດ້ວຍສຽງເພງ ຫາກິດຈະກຳທີ່ໜ້າສົນໃຈ ຟັງເພງທີ່ເຮົາມັກ ຢ່າເຮັດໃຫ້ຕົວເອງຮູ້ສຶກເບື່ອ ຜ່ອນຄາຍອາລົມ ຍິ້ມແຍ້ມແຈ່ມໃສ ຖິ້ມບັນຫາ ແລະ ຄວາມທຸກອອກໄປ ເຮັດແນວໃດໃຫ້ໂຕເອງມີຄວາມສຸກ
- ໝົດຄວາມກັງວົນ: ໃຊ້ຊີວິດຢ່າງໝົດກັງວົນ ເລື່ອງຂອງລູກໆ ອັນໃດທີ່ເຮົາພໍທີ່ຈະຊ່ວຍໄດ້ກໍໃຫ້ຄວາມຊ່ວຍເຫລືອແນວໃດທີ່ ບໍ່ຕ້ອງການໃຫ້ເຮົາຊ່ວຍ ກໍບໍ່ຈຳເປັນຕ້ອງກັງວົນ ດຽວຈະກາຍເປັນ “ເຮັດດີບໍ່ໄດ້ດີ” ເຮັດໃຫ້ລູກລຳຄານໄປຊື່ໆ ເລື່ອງຂອງພວກເຂົາ ຢ່າເຂົ້າໄປກ້າວກ່າຍ ຄົນເຮົາແກ່ແລ້ວຈັດການເລື່ອງຂອງເຮົາກໍພຽງພໍ ບໍ່ຕ້ອງໄປຫຍຸ້ງບັນຫາຂອງຜູ້ອື່ນ ຍິ່ງໄປຫຍຸ້ງຫລາຍແຮງເຮັດໃຫ້ໂຕເຮົາເອງລຳບາກໃຈ
- ບໍ່ທວງບຸນຄຸນ: ຄົນເຮົາເມື່ອແກ່ໂຕໄປແລ້ວ ຢ່າເອົາເລື່ອງເລັກໆ ໜ້ອຍໆ ມາເວົ້າຕະຫລອດເວລາ ອາດຈະບໍ່ສຳຄັນອີກແລ້ວວ່າທີ່ຜ່ານມາ ເຮົາເຄີຍຊ່ວຍເຫລືອໃຜໄວ້ແດ່ ຫລື ຄົນອື່ນເຮັດດີກັບເຮົາສໍ່າໃດ ປ່ອຍຜ່ານໄປເລີຍ ປ່ອຍໃຫ້ຜົນບຸນ ຜົນກຳ ສັ່ງສອນໃນສິ່ງທີ່ຄວນຈະເປັນໄປ ແລະ ຖ້າລູກ ຂໍໃຫ້ເຮົາໄປຊ່ວຍເບີ່ງຫລານ ກໍຢ່າຫງຸດຫງິດ ແລ້ວຈົ່ມຕໍ່ຫນ້າຫລານວ່າລຳບາກ ຖ້າໂຕເຮົາຢາກເຮັດກໍເຮັດ ຖ້າບໍ່ເຕັມໃຈທີ່ຈະເຮັດກໍພຽງຫາຂໍ້ອ້າງ ຫາວິທີປະຕິເສດກໍພໍ ບໍ່ຕ້ອງໄປຄິດເຖິງສິ່ງທີ່ຜ່ານມາ ແຕ່ໃຫ້ຄິດວ່າຢູ່ທາງໜ້າເຮົາຈະເຮັດຫຍັງໃຫ້ຄຸ້ມຄ່າທີ່ສຸດ
- ໃຈກວ້າງ: ແກ່ແລ້ວບໍ່ຕ້ອງເຄັ່ງຄັດກັບໂຕເອງຫລາຍ ເປີດໃຈໃຫ້ກວ້າງ ຢາກກິນຫຍັງກໍກິນ (ລະວັງບັນຫາສຸຂະພາບດ້ວຍ) ຢາກໃສ່ຫຍັງກໍໃສ່ ຢ່າຖາມຄຸນຄ່າບໍ່ຕ້ອງຢ້ານການໃຊ້ເງິນ ເປັນຊ່ວງຊີວິດທີ່ຄວນໃຊ້ເງິນເພື່ອໂຕເອງ ຖ້າບໍ່ໃຈກວ້າງກັບໂຕເອງແດ່ ສຸດທ້າຍເມື່ອເຮົາຈາກໄປເງິນກໍບໍ່ໄດ້ໄປນຳດ້ວຍ
