ແຊັມເກົ່າ ແມນ ຊິຕີ້ ບຸກຊະນະ ເວສແຮມ 2-0 ຄວ້າໄຊນັດເປີດສະໜາມ ພຣີເມຍລີກ
ແມນເຊັສເຕີ ຊິຕີ້ ແຊ້ມເກົ່າ ພຣີເມຍລີກ ແລະ ແຊ້ມ 2 ສະໄໝຕິດຕໍ່ກັນ ເປີດເກມລີກນັດທໍາອິດຢ່າງສະຫງ່າງາມດ້ວຍການເອົາຊະນະ ເວສແຮມ 2-0 ທີ່ສະຫນາມກິລາລອນດອນ, ບວກກັບນັກເຕະຄົນໃໝ່ ເອີລິງ ຮາແລນ ງັດຟອມໂຫດເໝົາຄົນດຽວ 2 ປະຕູ
ເກມນີ້ລູກທີມຂອງ ເປບ ກວາດີໂອລາ ໄດ້ປະຕູທໍາອິດຈາກລູກໂທດຂອງ ຮາແລນ ໃນນາທີ 36 ແລະ ຈົບເຄິ່ງທໍາອິດດ້ວຍສະກໍນີ້, ຈາກນັ້ນເກມໃນເຄິ່ງເວລາທີ 2 ທີມເຈົ້າບ້ານ ເວສແຮມ ພັບສະໜາມບຸກຢ່າງໜັກ ໂດຍທີ່ນັກເຕະ “ເຮືອໃບສີຟ້າ” ຊອກຫາຈັງຫວະເພື່ອສວນກັບ ຈາກນັ້ນພວກເຂົາກໍໄດ້ປະຕູເພີ່ມອີກໃນນາທີ 65 ເມື່ອ ເດີ ບຣອຍ ຈ່າຍຜ່ານຊ່ອງໃຫ້ ຮາແລນ ຫລຸດດ່ຽວເຈົ້າໄປຍິງດ້ວຍຊ້າຍຢ່າງສວຍງາມ.
ໃນຊ່ວງ 10 ນາທີສຸດທ້າຍ ແມນເຊັສເຕີ ຊິຕີ້ ຄອງບານໄດ້ຝ່າຍດຽວ ຂະນະທີ່ ເວສແຮມ ຢືນຕັ້ງໂຊນຈົນບໍ່ສາມາດບຸກຂຶ້ນໄດ້ ກ່ອນໝົດເວລາ 90 ນາທີ ກາຍເປັນແຊ້ມເກົ່າ ທີ່ເອົາຊະນະໄປ 2-0 ໂດຍນັດຕໍ່ໄປ ແມນເຊັສເຕີ ຊິຕີ້ ຈະກັບມາເປີດບ້ານພົບກັບ ບອນມັດ ໃນວັນທີ 13 ສິງຫາ ເວລາ 21:00 ໂມງ, ສ່ວນ ເວສແຮມ ຈະໄປຢາມ ນໍຕິງແຮມ ຟໍເຣດ ວັນອາທິດທີ 14 ສິງຫາ ເວລາ 20:00 ໂມງ.
