ເຊບີຢາ ກຽມເປີດຕົວ ອິສໂກ ເປັນນັກເຕະໃຫມ່ ກຽມກວດຮ່າງກາຍ-ເຊັນສັນຍາ

ເຊບີຢາ ກຽມເປີດຕົວ ອິສໂກ ເປັນນັກເຕະໃຫມ່ໃນສັງກັດ ຫລັງສະໂມສອນຖະແຫລງຢືນຢັນບັນລຸຂໍ້ຕົກລົງກັນໄດ້ແລ້ວ ຕອນນີ້ຖ້າກວດຮ່າງກາຍ ແລະ ເຊັນສັນຍາເປັນທາງການ.

ປັດຈຸບັນ ອິສໂກ ຢູ່ໃນສະຖານະບໍ່ມີສັງກັດ ຫລັງຫມົດສັນຍາກັບ ຣຽວ ມາດຣິດ ທີມຮ່ວມໃນ ລາ ລີກາ  ເມື່ອສິ້ນສຸດລະດູການ ທີ່ແລ້ວ ເຊິ່ງລາວຈະສາມາດຍ້າຍທີມໄດ້ແບບບໍ່ມີຄ່າຕົວ.

ຖະແຫລງການຈາກ ເຊບີຢາ ລະບຸວ່າ : ‘‘ ເຊບີຢາ ບັນລຸຂໍ້ຕົກລົງເບື້ອງຕົ້ນກັບ ອິສໂກ ເຊິ່ງຕອນນີ້ລາວຢູ່ທີ່ເມືອງເຊບີຢາ ເພື່ອກຽມເຂົ້າຮັບການກວດຮ່າງກາຍ ຖ້າທຸກຢ່າງເປັນໄປດ້ວຍດີ ລາວຈະໄດ້ເຊັນສັນຍາເປັນເວລາ 2 ປີ ’’.

ຫາກ ອິສໂກ ເປີດຕົວເປັນນັກເຕະໃຫມ່ ເຊບີຢາ ແທ້ ນັກເຕະຄົນນີ້ກໍຈະໄດ້ຮ່ວມງານກັບຄູເຝິກຄົນປັດຈຸບັນຂອງທີມຢ່າງ ຄູເລນ ໂລເປເຕກີ ອີກຄັ້ງຫນຶ່ງ ໂດຍ ໂລເປເຕກີ ເຄີຍເປັນເຈົ້ານາຍຂອງ ອິສໂກ ໃນຍຸກຮັບບົດບາດຜູ້ຈັດການທີມຊາດສະເປນ ແລະ ມາດຣິດ ເມື່ອກ່ອນໜ້ານີ້.

ສຳລັບ ອິສໂກ ອາຍຸ 30 ປີ ຍ້າຍຈາກ ມາລາກາ ທີມໃນສະເປນ ມາສູ່ ຣຽວ ມາດຣິດ ເມື່ອປີ 2013 ເຖິງວ່າຈະໄດ້ແຊ໊ມກັບ ຣຽວ ມາດຣິດ ທັງ ລາ ລີກາ 3 ສະໄຫມ, ໂກປາ ເດລ ເຣ 1 ສະໄຫມ, ຢູຟາ ແຊ໊ມປຽນ  ລີກ 5 ສະໄຫມ ແລະ ອື່ນໆ ແຕ່ລາວກໍຖືວ່າບໍ່ແມ່ນ ຜູ້ຫລິ້ນຄົນສຳຄັນຂອງທີມ ເນື່ອງຜົນງານບໍ່ສະໝຳ່ສະເໝີ ແລະ ບາດເຈັບຕະຫລອດ.