ທຸກຄົນສາມາດອອກແບບຊີວິດຢ່າງມີຄວາມສຸກໄດ້ດ້ວຍຕົນເອງ ເພື່ອຊີວິດຂອງເຮົາ ເພື່ອບໍ່ເປັນພາລະຜູ້ອື່ນ
ມີພຽງບໍ່ເທົ່າໃດຄົນເຂົ້າໃຈວ່າ ເປັນໄປໄດ້ແນວໃດທີ່ຈະອອກແບບຊີວິດຕົນເອງໄດ້ ແລະ ມັນຍາກຫລາຍທີ່ຈະສົມດັ່ງປາຖະໜາທີ່ຕັ້ງໄວ້, ແຕ່ໃນຄວາມຈິງແລ້ວ ທຸກຄົນສາມາດອອກແບບຊີວິດຂອງຕົນເອງໄດ້ຢ່າງງ່າຍດາຍ ແລະ ເປັນໄປຕາມຄວາມຕ້ອງການ ຂໍພຽງຄິດວ່າໃນຖານະເປັນຄົນໆໜຶ່ງໂຕໃດສາມາດເຮັດໄດ້ເພື່ອຊີວິດຂອງເຮົາ ເພື່ອບໍ່ເປັນພາລະຜູ້ອື່ນ ຄວນຍິນດີເຮັດ…
ແນ່ນອນວ່າບາງເລື່ອງມັນກໍຢູ່ເໜືອການຄວບຄຸມຂອງເຮົາເອງ, ແຕ່ການທີ່ເຮົາບໍ່ກຽມພ້ອມລ່ວງໜ້າຕໍ່ການໃຊ້ຊີວິດແຕ່ລະມື້ອາດເປັນການປະໝາດຕົນເອງເກີນໄປ ຊຶ່ງມີບາງເລື່ອງບໍ່ຄວນເບິ່ງຂ້າມເຊັ່ນເລື່ອງການມີ ສຸຂະພາບແຂງແຮງໂດຍນອກຈາກອອກກຳລັງກາຍສະໝໍ່າສະເໝີທີ່ເປັນການສະສົມຕົ້ນທຶນຂອງສຸຂະພາບ ເພື່ອຮັບມືກັບສະພາບຮ່າງກາຍທີ່ປ່ຽນແປງໄປຕາມໄວແລ້ວ ອາຫານທີ່ບໍລິໂພກກໍຕ້ອງມີປະໂຫຍດທັງນອນຫລັບພັກຜ່ອນໃຫ້ພຽງພໍ.
ສະຫລຸບການເບິ່ງແຍງສຸຂະພາບເປັນເລື່ອງສຳຄັນ ທີ່ບໍ່ຕ້ອງລໍຖ້າໃຜມາບັງຄັບ. ເລື່ອງການມີສຸຂະພາບຈິດໃຈ ເມື່ອໃດມີສຸຂະພາບຈິດໃຈດີ ການແກ້ໄຂບັນຫາຕ່າງໆທີ່ເກີດຂຶ້ນກໍຈະງ່າຍ. ແນວໃດກໍດີປັດຈຸບັນເຖິງວ່າຈະພະຍາຍາມຍິ້ມຫົວມ່ວນຊື່ນ ພັດພົບບາງບັນຫາ ບາງເຫດການທີ່ການຮັບມືເປັນເລື່ອງອ່າວຍາກ, ແຕ່ຕ້ອງຄວບຄຸມສະພາບອາລົມໃຫ້ໄດ້ບໍ່ໃຫ້ເກີດຂຶ້ນດົນ ແລະ ຮ້າຍແຮງໄປກວ່າຈະຮັບມືມັນໄດ້.
ເລື່ອງການມີເງິນ ຫລາຍທ່ານທັງປວດຫົວທັງວິຕົກກັງວົນໜ້ອຍຫລາຍຕ່າງກັນ ຫລາຍທ່ານກໍວ່າ ຂໍພຽງແຕ່ມີໃຊ້ຈ່າຍແຕ່ລະມື້ແຕ່ລະເດືອນກໍດີແລ້ວ. ແນວໃດກໍດີການວາງແຜນເລື່ອງການມີເງິເປັນເລື່ອງທີ່ຕ້ອງເອົາໃຈໃສ່ເພື່ອຄວາມໝັ້ນຄົງທັງການເງິນ ແລະ ຊີວິດ ໝາຍວ່າຕ້ອງຮູ້ກ່ອນວ່າເຮົາພວມປະສົບບັນຫາການເງິນເລື່ອງໃດ ຈະຫາທາງແກ້ໄຂແນວໃດ ປະຢັດກວ່າທີ່ມີຢູ່ກໍບໍ່ໄຫວຈະຕັດຄ່າໃຊ້ຈ່າຍບໍ່ຈໍາເປັນອອກກໍຍັງບໍ່ພໍໃຊ້ຈ່າຍຢູ່ດີ…
ການຫາອາຊີບເສີມຄວບຄູ່ກັບອາຊີບຫລັກໄປນຳເປັນອີກໜຶ່ງທາງເລືອກຂອງການມີເງິນ ເນື່ອງຈາກຄ່າໃຊ້ຈ່າຍຂອງການດຳລົງຊີວິດບໍ່ຄືເມື່ອກ່ອນແລ້ວ ບໍ່ວ່າຈະເປັນການຄ່າປິ່ນ ປົວ ຄ່າຄອງຊີບ… ເລື່ອງການມີຄົນທີ່ຮັກມັນສາມາດທຳລາຍຄວາມໂສກເສົ້າຄວາມເຫງົາໄດ້ເປັນຢ່າງດີ ຊຶ່ງພວກເຮົາບໍ່ສາມາດປະຕິເສດໄດ້ວ່າ ຄວາມເຫງົາແມ່ນໜຶ່ງຕົ້ນເຫດຂອງບັນຫາສຸຂະພາບຈິດໃຈ ຍິ່ງຢູ່ໃນເມືອງໃຫຍ່ທີ່ຕ່າງຄົນຕ່າງຢູ່ ຕ່າງດີ້ນຮົນທຳມາຫາກິນເພື່ອໃຫ້ມີຊີວິດດີຂຶ້ນ ຫລາຍຄົນກົ້ມໜ້າກົ້ມຕາເຮັດວຽກຈົນເກືອບບໍ່ມີເວລາເອົາໃຈໃສ່ຄົນທີ່ເຮົາຮັກ, ບາງທ່ານອາດຈະຜະເຊີນບັນຫາຊີວິດຢ່າງໜັກໜ່ວງຮ້າຍແຮງຊຶ່ງການມີຄົນທີ່ໄວ້ເນື້ອເຊື່ອໃຈຄົນທີ່ເຮົາຮັກ ແລະ ຮັກເຮົາຢູ່ຄຽງຂ້ອງຄອຍເປັນກຳລັງໃຈຊ່ວຍເຫລືອເກື້ອກູນຈະຊ່ວຍໃຫ້ສາມາດຜ່ານເວລາຫຍຸ້ງຍາກລຳບາກ ໂສກເສົ້າເປົ່າປ່ຽວໄດ້.
ການອອກແບບຊີວິດໃຫ້ມີຄວາມສຸກ ເບິ່ງຢ່າງໜຶ່ງຄືເປັນເລື່ອງຍາກ, ແຕ່ບໍ່ໝາຍຄວາມວ່າບໍ່ມີທາງເຮັດໄດ້ ຖ້າກຽມມາດີ ແລະ ລົງມືເຮັດ ທັງເຂົ້າໃຈວ່າ ເຮົາບໍ່ຈຳເປັນຕ້ອງໃຊ້ຊີວິດຄືຜູ້ອື່ນ ຂໍພຽງແຕ່ຮູ້ວ່າຄວາມສຸກຂອງເຮົາຄືຫຍັງ? ຢາກມີຊີວິດແບບໃດ? ເຮັດແນວໃດຈຶ່ງຈະໄປເຖິງຈຸດນັ້ນລະຫວ່າງທາງອາດຈະປະສົບເລື່ອງທີ່ບໍ່ຄາດຄິດເກີດຂຶ້ນ ມີທັັງທຸກທັງສຸກປະສົມປະສານກັນ ເພາະຊີວິດມີຫລາຍເລື່ອງໃຫ້ສຶກສາຮຽນຮູ້ຢູ່ສະເໝີ.
