ໂຮງໝໍມິດຕະພາບ ສະຫຼຸບ 6 ເດືອນຕົ້ນປີ 2022
August 5, 2022 - 11:05 AM
ວັນທີ 4 ສິງຫາ 2022 ໂຮງໝໍມິດຕະພາບ (150 ຕຽງ) ໄດ້ຈັດກອງປະຊຸມສະຫຼຸບວຽກງານການຈັດຕັ້ງປະຕິບັດແຜນພັດທະນາໂຮງໝໍ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ເປັນປະທານຂອງ ທ່ານ ສອນໄຊ ລາດຊະວົງ ຜູ້ອຳນວຍການໂຮງໝໍມິດຕະພາບ, ມີຄະນະອໍານວຍການ, ຫົວໜ້າພະແນກ, ພະນັກງານແພດໝໍ ແລະ ວິຊາການພາຍໃນໂຮງໝໍເຂົ້າຮ່ວມ.
ທ່ານຜູ້ອຳນວຍການໂຮງໝໍມິດຕະພາບ ໄດ້ລາຍງານວ່າ: ການເຄື່ອນໄຫວໃນ 6 ເດືອນຕົ້ນປີຜ່ານມາ ຄະນະນໍາຂອງໂຮງໝໍ ໄດ້ນໍາພາພະນັກງານ ຈັດຕັ້ງປະຕິບັດວິໄສທັດຂອງໂຮງໝໍ ໃຫ້ສອດຄ່ອງກັບແນວທາງປະຕິບັດນະໂຍບາຍ 5 ດີ 1 ພໍໃຈ ທີ່ກະຊວງສາທາລະນະສຸກວາງອອກ ໃຫ້ແທດເໝາະກັບວຽກງານຕົວຈິງ ແລະໄດ້ພ້ອມກັນຜ່ານຜ່າເຮັດໜ້າທີ່ການເມືອງ ແລະ ໜ້າທີ່ວິຊາສະເພາະຂອງຕົນ ທີ່ການຈັດຕັ້ງມອບໝາຍໃຫ້, ຖືເອົາວຽກງານສຶກສາອົບຮົມແນວຄິດ-ການເມືອງ, ຈັນຍາບັນແພດ-ພະຍາບານເປັນສໍາຄັນ, ໄດ້ປຸກລະດົມຂະບວນການແຂ່ງຂັນຮັກຊາດ-ພັດທະນາ. ໃນ 6 ເດືອນຜ່ານມາໄດ້ກວດ ແລະ ປິ່ນປົວຄົນເຈັບຢູ່ຫ້ອງກວດເຂດນອກໄດ້ທັງໝົດ 64.177 ເທື່ອ/ຄົນ ຍິງ 36.418 ເທື່ອ/ຄົນ, ຮັບຄົນເຈັບສຸກເສີນ 17.723 ຄົນ ຍິງ 8.165 ຄົນ, ຮັບຄົນເຈັບເຂົ້ານອນ 8.734 ຄົນ ຍິງ 3.499 ຄົນ, ເດັກເກີດໃໝ່ 684 ຄົນ ຍິງ 371 ຄົນ, ຜ່າຕັດທັງໝົດ 3.691 ຄົນ, ຟອກໄຂ່ຫຼັງ 2.320 ເທື່ອ/ຄົົົນ, ອັດຕາການໝູນໃຊ້ຕຽງ 99.52%, ຄົນເຈັບສາຍແສງປິ່ນປົວມະເຮັງ 3.194 ເທື່ອ/ຄົນ.
ພ້ອມກັນນັ້ນ ໂຮງໝໍໄດ້ເອົາໃຈໃສ່ການປະຕິບັດໜ້າທີ່ວຽກງານການຕອບໂຕ້, ສະກັດກັ້ນ ແລະ ຄວບຄຸມແກ້ໄຂການລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ໂຄວິດ-19 ຊຶ່ງໄດ້ເກັບຕົວຢ່າງຄົນເຈັບທີ່ເຂົ້າກໍລະນີສົງໄສທັງໝົດ 21.123 ຄົນ ແລະ ໄດ້ເປີດກວ້າງໃນການສັກວັກຊິນປ້ອງກັນພະຍາດໂຄວິດ-19 ຊຶ່ງມີຜູ້ມາຮັບສັກວັກຊິນທັງໝົດ 20.544 ເຂັມ. ໄດ້ປະຕິບັດນະໂຍບາຍວຽກງານປະກັນສຸຂະພາບ, ມີຜູ້ປະກັນຕົນມາຮັບບໍລິການທັງໝົດ 25.802 ຄົນ ແລະ ໄດ້ມີນະໂຍບາຍການປິ່ນປົວໂດຍບໍ່ເສຍຄ່າແກ່ຜູ້ທຸກຍາກອານະຖາ, ນັກບວດ, ນັກຮຽນ-ນັກສຶກສາ ແລະ ນະໂຍບາຍຫຼຸດຄ່າຟອກເລືອດໃຫ້ຄົນເຈັບຜູ້ທຸກຍາກ. ກອງປະຊຸມຍັງໄດ້ຜ່ານແຜນການ 6 ເດືອນ ທ້າຍປີ 2022 ກວມເອົາການເມືອງແນວຄິດ, ວຽກງານທີ່ຈະມາເຖິງ ແລະ ມອບໃບຍ້ອງຍໍຜົນງານປີ 2021 ໃຫ້ພະແນກດີເດັ່ນ ປະເພດ I ແລະ ບຸກຄົນດີເດັ່ນ ປະເພດ II ຕື່ມອີກ.
