ຢືດ ແລະ ທຳລາຍ ໜັງຄວາຍ ນຳເຂົ້າບໍ່ຖືກກົດໝາຍ ຈຳນວນ 680 ກິໂລ

ວັນທີ 29 ກໍລະກົດ 2022, ພະແນກຕໍາຫລວດປ້ອງກັນເສດຖະກິດ ຫ້ອງຕໍາຫລວດ ປກສ ນະຄອນຫລວງວຽງຈັນ ໄດ້ສົມທົບກັບ ພະແນກອຸດສາຫະກຳການຄ້າ ນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ ທໍາລາຍສິນຄ້ານໍາເຂົ້າບໍ່ຖືກຕ້ອງປະເພດ ໜັງຄວາຍ ລວມມີ 17 ເປົາ, ຈຳນວນ 680 ກິໂລກຣາມ, ຢູ່ບ້ານຈໍາປາ ເມືອງສີໂຄດຕະບອງ ນະຄອນຫຼວງວຽງຈັນ, ໂດຍມີ ພັຕ ບຸນພອນ ຈິດຕະວົງ ຫົວໜ້າກອງປ້ອງກັນເສດຖະກິດ ຫ້ອງຕໍາຫຼວດ ປກສ ນວ ພ້ອມດ້ວຍພະນັກງານ ທີ່ກ່ຽວຂ້ອງເຂົ້າຮ່ວມ.

ທ່ານ ພັຕ ບຸນພອນ ຈິດຕະວົງ ໃຫ້ຮູ້ວ່າ: ໃນວັນທີ 27 ກໍລະກົດ 2022 ໄດ້ຮັບການລາຍງານຂໍ້ມູນວ່າຈະມີລົດບັນທຸກຂົນສົ່ງນໍາເຂົ້າໜັງຄວາຍໂດຍບໍ່ຖືກຕ້ອງມາທາງ ເຂດບ້ານດົງສ້າງຫີນ ເມືອງໄຊທານີ ນະຄອນຫລວງວຽງຈັນ. ຈາກນັ້ນ, ເຈົ້າໜ້າ ຈຶ່ງໄດ້ອອກຕິດຕາມ, ກວດກາພົບເຫັນລົດຄັນດັ່ງກ່າວ ແກ່ເຄື່ອງປະເພດໜັງຄວາຍ ທີ່ລະເມີດລະບຽບການກ່ຽວກັບລະບອບພາສີອາກອນຂອງລັດ ທີ່ກຳນົດໄວ້ໃນປະມວນກົດໝາຍອາຍາມາດຕາ 283 ທີ່ກໍານົດໄວ້ວ່າ: ບຸກຄົນໃດ ຫາກລະເມີດກ່ຽວກັບລະບົບພາສີ, ອາກອນຂອງລັດ ດ້ວຍການຫລົບຫລີກ ເຊື່ອງອໍ່າ ບໍ່ເສຍພັນທະຕໍ່ລັດ ຫລື ເສຍບໍ່ຖືກຕ້ອງຕາມຫລັກການທີ່ກຳນົດໄວ້. ສະນັ້ນ, ເພື່ອຮັບປະກັນບໍ່ໃຫ້ສິນຄ້າດັ່ງກ່າວຖືກຈໍາໜ່າຍໃນທ້ອງຕະຫລາດ ແລະ ໃຫ້ຄົນລາວບໍລິໂພກ ເຈົ້າໜ້າທີ່ ຈຶ່ງໄດ້ທໍາລາຍໜັງຄວາຍດັ່ງກ່າວນັ້ນຖີ້ມ. ຕໍ່ກັບເຈົ້າຂອງລົດ ເຈົ້າໜ້າທີ່ຕໍາຫລວດປ້ອງກັນເສດຖະກິດ ໄດ້ສຶກສາອົບຮົມ ແລະ ປັບໃໝຕາມລະບຽບກົດໝາຍ.