ປະທານສານປະຊາຊົນເນັ້ນ ວຽກງານແກ້ໄຂດີຕ້ອງຖືກຕ້ອງ, ວ່ອງໄວ ແລະ ໂປ່ງໃສ

ວັນທີ 1 ສິງຫາ 2022 ນີ້ ໄດ້ມີກອງປະຊຸມສໍາມະນາ ຜູ້ບໍລິຫານລະດັບສູງໃນອົງການຈັດຕັ້ງຂອງລັດ ທີ່ມີການສ້າງຕັ້ງຄະນະສານປົກຄອງ ໂດຍການເປັນປະທານຂອງທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານ ປະຊາຊົນສູງສຸດ, ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ, ທ່ານ ສຸຊາດ ມົງຄົນເລີດລົບ ຮອງປະທານສານປົກຄອງສູງສຸດ ແຫ່ງຣາຊະອານາຈັກໄທ ບັນດາທ່ານປະທານ, ຮອງປະທານສານປະຊາຊົນພາກກາງ, ນະຄອນຫຼວງວຽງຈັນ, ຜູ້ຕາງໜ້າຈາກກະຊວງ, ອົງການ, ລັດວິສາຫະກິດ ແລະ ແຂກທີ່ເຂົ້າຮ່ວມ.

ກອງປະຊຸມ ສຳມະນາລົງເລິກໃນຫົວຂໍ້:
(1) ການໃຊ້ອຳນາດທາງປົກຄອງຂອງເຈົ້າໜ້າທີ່ອົງການຈັດຕັ້ງລັດ;
(2) ຫຼັກການພື້ນຖານຂອງກົດໝາຍປົກຄອງ ແລະ ອຳນາດທາງປົກຄອງຂອງເຈົ້າໜ້າທີ່ອົງການຈັດຕັ້ງລັດ;
(3) ລັດຖະບັນຍັດຂອງປະທານປະເທດ ສະບັບເລກທີ 001/ປທ, ລົງວັນທີ 19 ມີນາ 2021 ວ່າດ້ວຍການດໍາເນີນຄະດີປົກຄອງ.

ທ່ານ ນາງ ວຽງທອງ ສີພັນດອນ ໄດ້ກ່າວວ່າ: ລັດຖະບານ ຍາມໃດກໍຖືເອົາການຄຸ້ມຄອງລັດ ແລະ ຄຸ້ມຄອງສັງຄົມ ດ້ວຍກົດໝາຍເປັນບັນຫາສຳຄັນ ໄປຄ່ຽງຄູ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມໝັ້ນຄົງທາງດ້ານການເມືອງ, ເສດຖະກິດມີການຂະຫຍາຍຕົວ, ສັງຄົມສີວິໄລ ແລະ ປົກປັກຮັກສາສິ່ງແວດລ້ອມໃຫ້ມີຄວາມຍືນຍົງ. ສະແດງອອກ ລັດໄດ້ກໍານົດລະບຽບການ, ສະໜອງງົບປະມານ, ສ້າງ ແລະ ຝຶກອົບຮົມບຸກຄະລາກອນ, ອໍານວຍຄວາມສະດວກດ້ານພາຫະນະ ແລະ ອຸປະກອນ ເພື່ອໃຫ້ການພິຈາລະນາແກ້ໄຂ ຫຼື ຕັດສິນຄະດີ ມີຄວາມຖືກຕ້ອງ, ວ່ອງໄວ, ໂປ່ງໃສ ແລະ ຍຸຕິທຳ ຕາມທີ່ໄດ້ກຳນົດໄວ້ໃນແຜນພັດທະນາລະບົບສານປະຊາຊົນໃນໄລຍະ 5 ປີ (2021-2025) ທີ່ໄດ້ຮັບຮອງ.

ໃນໄລຍະຜ່ານມາສະພາແຫ່ງຊາດ ໄດ້ຮັບຮອງເອົາກົດໝາຍຫຼາຍສະບັບໃນທຸກຂົງເຂດວຽກງານ ເພື່ອເປັນບ່ອນອີງໃນການຈັດຕັ້ງ ແລະ ເຄື່ອນໄຫວຂອງອົງການລັດແຕ່ລະຂັ້ນ ລວມທັງການເຄື່ອນໄຫວພົວພັນທາງສັງຄົມ ທີ່ນັບມື້ນັບຂະຫາຍຕົວຢ່າງເລິກເຊິ່ງ, ກວ້າງຂວາງ, ສະຫຼັບສັບຊ້ອນຫຼາຍຂຶ້ນກວ່າເກົ່າ. ບັນຫາປະກົດການຫຍໍ້ທໍ້ ແລະ ຂໍ້ຂັດແຍ່ງ ໃນສັງຄົມກໍນັບມື້ເກີດຂຶ້ນຫຼາຍທີ່ພົວພັນເຖິງຄະດີອາຍາ, ຄະດີແພ່ງ, ຄະດີຄອບຄົວ ແລະ ອື່ນໆ ຊຶ່ງຈຳນວນໜຶ່ງແມ່ນພົວພັນເຖິງດ້ານປົກຄອງ ຫຼື ທາງບໍລິຫານລະຫວ່າງອົງການຈັດຕັ້ງລັດ, ພະນັກງານ-ລັດຖະກອນ, ອົງການຈັດຕັ້ງ ແລະ ພົນລະເມືອງ.

ຈຸດປະສົງຂອງການດຳເນີນຄະດີປົກຄອງ ແມ່ນເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ພະນັກງານ-ລັດຖະກອນ, ອົງການຈັດຕັ້ງລັດ ພາຍໃຕ້ລັດຖະທໍາມະນູນ ແນໃສ່ເພີ່ມທະວີນິຕິທຳ, ຈຳກັດ ແລະ ສະກັດກັ້ນການລະເມີດກົດໝາຍ, ສຶກສາອົບຮົມສະຕິເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ປະກອບສ່ວນໃນການພັດທະນາເສດຖະກິດ-ສັງຄົມຂອງຊາດ ແລະ ສ້າງລັດທີ່ປົກຄອງດ້ວຍກົດໝາຍ.

ການດຳເນີນຄະດີປົກຄອງ ແມ່ນການເຄື່ອນໄຫວ ແລະ ຄວາມຮັບຜິດຊອບຂອງຄະນະສານປົກຄອງ, ອົງການໄອຍະການປະຊາຊົນ ແລະ ຜູ້ເຂົ້າຮ່ວມໃນການດຳເນີນຄະດີ ເພື່ອພິຈາລະນາແກ້ໄຂ ຫຼື ຕັດສິນຄະດີປົກຄອງ ຕາມທີ່ໄດ້ກຳນົດໄວ້ ໃນລັດຖະບັນຍັດຂອງປະທານປະເທດ ສະບັບເລກທີ 001/ປທ, ລົງວັນທີ 19 ມີນາ 202 ຊຶ່ງຄະນະປະຈໍາສະພາແຫ່ງຊາດ ໄດ້ອອກມະຕິ ສະບັບເລກທີ 15/ຄປຈ, ລົງວັນທີ 7 ກຸມພາ 2019 ຮັບຮອງການສ້າງຕັ້ງຄະນະສານປົກຄອງຢູ່ສານປະຊາຊົນສູງສຸດ, ສານປະຊາຊົນພາກກາງ ແລະ ສານປະຊາຊົນນະຄອນຫຼວງວຽງຈັນ.