ແມນຢູ ພ້ອມຈ່າຍຄ່າເມື່ອຍມະຫາສານຊື້ໃຈ ເດິ ຢອງ ຮ່ວມທີມ

ສື່ສະເປນລາຍງານວ່າ ແມນເຊສເຕີ ຢູໄນເຕັດ ພ້ອມຈ່າຍຄ່າເມື່ອຍເຖິງ 450,000 ປອນ/ອາທິດ ບວກກັບໃຊ້ຫນີ້ທີ່ ບາເຊໂລນາ ຕິດຄ້າງຢູ່ໃຫ້ ເພື່ອອ່ອຍໃຈ ເດິ ຢອງ ມາຮ່ວມທີມ.

ສຳລັບ ເດິ ຢອງ ຄືເປົ້າຫມາຍອັນດັບຫນຶ່ງໃນການເສີມທີມຂອງ ແມນເຊສເຕີ ຢູໄນເຕັດ ຕະຫລາດລະດູການນີ້ ແຕ່ການຊື້ ຂາຍດັ່ງກ່າວຍັງບໍ່ມີຄວາມຄືບຫນ້າປານໃດ.

ໂດຍຫນຶ່ງໃນສາເຫດສຳຄັນຄື ນັກເຕະອາຍຸ 25 ປີ ລາຍນີ້ບໍ່ຕ້ອງການຍ້າຍອອກຈາກບາເຊໂລນາ ເຖິງວ່າຕົ້ນສັງກັດກໍພ້ອມຈະປ່ອຍ ກໍຕາມ ຫລັງກ່ອນຫນ້ານີ້ມີລາຍງານວ່າທັງ 2 ສະໂມສອນບັນລຸຂໍ້ຕົກລົງເລື່ອງຄ່າຕົວກັນໄດ້ແລ້ວທີ 74 ລ້ານປອນ.

ຈົນຫລ້າສຸດ ‘‘ Sport ’’  ສື່ໃນສະເປນເປີດເຜີຍວ່າ ແມນຢູ ກຽມຍື່ນຂໍ້ສະເຫນີແບບເຖິງໃສເຖິງກັນໃນການເຊັນສັນຍາ ເດິ ຢອງ ດ້ວຍການໃຫ້ຄ່າເມື່ອຍເຖິງ 450,000 ປອນ/ອາທິດ ເຊິ່ງຈະເຮັດໃຫ້ລາວກາຍເປັນນັກເຕະທີ່ມີຄ່າຈ້າງສູງທີ່ສຸດຂອງສະໂມສອນ ອັນດັບ 2 ໂດຍເປັນຮອງພຽງ ຄຣິສຕຽນໂນ ໂຣນັລໂດ ຄົນດຽວເທົ່ານັ້ນ.

ນອກຈາກນັ້ນ ແມນຢູ ຍັງຈະຈ່າຍຄ່າຈ້າງຈຳນວນ 17 ລ້ານປອນ ທີ່ບາເຊໂລນາຕິດຄ້າງ ເດິ ຢອງ ຢູ່ໃຫ້ກັບນັກເຕະເອງນຳອີກ.