ມະຫາກາບ ເຈ້ທິບ ເບິ່ງຄືຈະເປັນຕອນຈົບ ແຕ່ຄວາມຈິງຫາກໍດຳເນີນເລື່ອງ
ວັນທີ 29 ກໍລະກົດ 2022ນີ້ , ເຈົ້າໜ້າທີ່ຕຳຫລວດກວດຄົນເຂົ້າເມືອງຂອງໄທ ໄດ້ບຸກເຂົ້າຈັບຕົວ ນາງ ພອນທິບ ໄຊປັນຍາ ຫລື ເຈ້ທິບ ທີ່ຄົນຮູ້ຈັກໃນນາມເຈົ້າແມ່ຂາຍອອນລາຍ ຫລື ເຈ້ທິບ ທຸລະລະກິດຂາຍເພັດ ແລະ ຮັບຝາກເງິນໂດຍໃຫ້ອັດຕາດອກເບ້ຍສູງເຖິງ 30% ເມື່ອມີຄົນຫລົງນຳເງິນມາຝາກຈຳນວນມະຫາສານ ສຸດທ້າຫອບເງິນໜີ ຈົນກາຍເປັນຄະດີດັງໃນຊ່ວງທ້າຍເດືອນມິຖຸນາ ກໍຄືວັນທີ 29 ມິຖຸນາ 2022 ທີ່ ເຈ້ທິບ ເອົາຕົວຫລົບໜີ ອອກນອກປະເທດ.
ມະຫາກາບ ເຈ້ທິບ ຄັ້ງນີ້ແມ່ນເລີ່ມເກີດຂຶ້ນວັນທີ 28 ມິຖຸນາ 2022 ທີ່ຜ່ານມາ, ມີຄົນຈຳນວນຫລາຍສິບຄົນໄດ້ຕາມຊອກຫາ ເຈ້ທິບ ພ້ອມພາກັນຫລັ່ງໄຫລເຂົ້າໄປທີ່ຮ້ານຂາຍເພັດ ເລຍາ ຕັ້ງຢູ່ບ້ານໂພນຕ້ອງສະຫວາດ ເມືອງຈັນທະບູລີ ນະຄອນຫລວງວຽງຈັນ ແຕ່ບໍ່ພົບຕົວ ຕ່າງກໍພາກັນຄິດວ່າງານນີ້ຖືກເຈ້ທິບຕົ້ມແລ້ວ, ເຈ້ທິບຫອບເງິນໜີແລ້ວແນ່ນອນ, ຈຶ່ງໄດ້ພາກັນໄປແຈ້ງຄວາມເຮັດບົດບັນທຶກຢູ່ຫ້ອງການບ້ານ ແລະ ຫ້ອງການ ປກສ ເມືອງຈັນທະບູລີ ນະຄອນຫລວງວຽງຈັນ ແລະ ກົມຕຳຫລວດຈຳນວນຫລາຍຮ້ອຍຄົນ ແລະ ມີເງິນມູນຄ່າຄວາມເສຍຫາຍທີ່ຖືກແຈ້ງໃວ້ມີຈຳນວນມະຫາສານ ແລະ ເປັນຂ່າວດັ່ງທາງສັງຄົມອອນລາຍໃນຂະນະນັ້ນ.
ໃນວັນທີ 30 ມິຖຸນາ 2022 ຜ່ານມາ, ມີຜູ້ເສຍຫາຍຄົນໜຶ່ງເຂົ້າແຈ້ງຄວາມຢູ່ຫ້ອງຕຳຫລວດ ປກສ ນະຄອນຫລວງວຽງຈັນ ວ່າໄດ້ຝາກເງິນນຳ ນາງ ພອນທິບ ໄຊປັນຍາ ຫລື ເຈ້ທິບ ແຕ່ບໍ່ໄດ້ຮັບເງິນດອກເບ້ຍຕາມທີ່ໂຄສະນາ ຈຶ່ງເຂົ້າມາແຈ້ງຄວາມຂໍ້ຫາສໍ້ໂກງຊັບພົນລະເມືອງເນື້ອໃນແຈ້ງຄວາມແມ່ນລະບຸວ່າ: ໃນເວລາ 19 ໂມງ 00 ນາທີ ຂອງວັນທີ 10/01/2022 ນາງ ພອນທິບ ໄຊປັນຍາ ຫຼື (ເຈ້ທິບ), ອາຍຸ 30 ປີ, ສັນຊາດລາວ, ອາຊີບນັກທຸລະກິດ, ປັດຈຸບັນຢູ່ບ້ານໂພນຕ້ອງສະຫວາດ, ເມືອງຈັນທະບູລີ, ນະຄອນຫຼວງວຽງຈັນ ຕົວະ ນາງ.ກ (ນາມສົມມຸດ ຂໍສະຫງວນຊື່ແທ້) ຜູ້ໄດ້ຮັບຜົນເສຍຫາຍ ອາຍຸ 27 ປີ, ສັນຊາດລາວ, ອາຊີບຄ້າຂາຍ, ປະຈຸບັນຢູ່ບ້ານຮ່ອງແກ, ເມືອງໄຊເຊດຖາ, ນະຄອນຫຼວງວຽງຈັນ ໂອນເງິນຝາກ ເອົາດອກເບ້ຍ.
ໃນຊ່ວງເວລາດັ່ງກ່າວຜູ້ກ່ຽວໄດ້ຫຼິ້ນເຟສບຸກຕາມປົກກະຕິ ຈາກນັ້ນໄດ້ໄປເຫັນນາງ ພອນທິບ ໂພດລົງໃນເຟສບຸກ ສ່ວນຕົວວ່າ ຮັບຝາກເງິນເອົາດອກເບຍ 30% ຕໍ່ເດືອນ, ຈາກນັ້ນຜູ້ກ່ຽວຈຶ່ງໄດ້ມີຄວາມສົນໃຈຢາກຈະຝາກ ຈຶ່ງໄດ້ໂທລະສັບໄປ ຕົກລົງນໍານາງ ພອນທີບ, ເມື່ອຕົກລົງກັນສຳເລັດ, ນາງ ພອນທິບ ໄດ້ບອກໃຫ້ ນາງ.ກ ໂອນເງິນມາຝາກ ຈຳນວນຫຼາຍຄັ້ງຄິດເປັນ ເງິນທັງໝົດ 2.600.000.000 ກີບ ກັບ ເງິນໂດລາ 180.000 ໂດລາ ແລະ ເງິນບາດ 3.500.000 ບາດ ຜູ້ກ່ຽວຈຶ່ງໄດ້ໂອນຫຼັງຈາກໂອນເງິນໃຫ້ນາງ ພອນທິບ ແລ້ວເມື່ອຮອດມື້ເອົາດອກເບ້ຍ ນາງ ພອນທິບ ກໍບໍ່ຈ່າຍໃຫ້ຜູ້ກ່ຽວ ຈົນມາ ຮອດວັນທີ 29/06 /2022 ຈຶ່ງໄດ້ຮູ້ວ່ານາງ ພອນທິບ ໄດ້ລັກໜີອອກຈາກປະເທດລາວແລ້ວ ແລະ ໂທລະສັບຫາກໍ່ບໍ່ໄດ້. ດັ່ງນັ້ນຈຶ່ງໄດ້ເຂົ້າມາແຈ້ງຄວາມຕໍ່ເຈົ້າໜ້າທີ່ ເພື່ອເຈົ້າເນີນຄະດີກັບນາງ ພອນທິບ ໄຊປັນຍາ ຕາມຂັ້ນຕອນຂອງກົດໝາຍ.
ວັນທີ 29 ກໍລະກົດ 2022ນີ້ ພາຍຫລັງຖືກຕຳຫລວດໄທ ກັກຕົວໄດ້ ເຈ້ທິບ ໄດ້ໃຫ້ສຳພາດກັບນັກຂ່າວໄທຫລາຍສຳນັກວ່າ: ຕົນເອງບໍ່ໄດ້ໜີ ແລະ ບໍ່ໄດ້ຫອບເງິນໜີດັ່ງທີ່ເປັນຂ່າວ ເຈ້ທິບ ກ່າວຕື່ມວ່າ ຄົນທີ່ໄປແຈ້ງຄວາມແມ່ນຕົວເລກຄິດຂຶ້ນມາເອງ ຕົວຈິງເງິນບໍ່ໄດ້ຫລາຍປານນັ້ນ ເງິນແມ່ນມີພຽງພໍໝູນແຕ່ລະເດືອນຊື່ໆ ເງິນ 4 ຮ້ອຍລ້ານບາດ ແລະ ເງິນໂດລາ ຫລາຍລ້ານໃຜຊິຫອບຂ້າມປະເທດໄດ້, ໂອນເງິນແຕ່ລະຄັ້ງຍັງຍາກແລ້ວ ການອອກມານອກປະເທດແມ່ນການມາທ່ຽວ ແລະ ມາຕັ້ງຫລັກຊື່ໆວ່າຊ້ານ….ຕາມການໃຫ້ສຳພາດປະຕິເສດຂອງ ເຈ້ທິບ ໂຈດຕໍ່ໄປພາຍຫລັງໄດ້ຕົວ ເຈ້ທິບ ມາແລ້ວ ເຈົ້າໜ້າທີ່ຝ່າຍລາວຈະສືບສວນສອບສວນຫາຈຳນວນເງິນມະຫາສານທີ່ຖືກແຈ້ງຄວາມໄວ້ນັ້ນວ່າມີຈິງ ຫລື ບໍ່? ຫລື ບໍ່ມີຈິງຄືດັ່ງ ເຈ້ທິບ ປະຕິເສດຕໍ່ສື່, ແຕ່ຖ້າທີ່ຜູ້ເສຍຫາຍໄປແຈ້ງຄວາມໄວ້ນັ້ນມີຈິງເງິນຈຳນວນມະສານດັ່ງກ່າວນັ້ນ ຕອນນີ້ຢູ່ໃສ? ຢູ່ນຳໃຜ? ເຊື່ອງຊ້ອນບ່ອນໃດແທ້?
ມະຫາກາບເລື່ອງນີ້ເບິ່ງຄືຈະຈົບ ແຕ່ຄວາມຈິງແລ້ວຫາກໍດຳເນີນເລື່ອງເທົ່ານັ້ນ ພາຍຫຼັງທີ່ໄດ້ມີການຕັ້ງເຄົ້າໂຄງໄວ້ ຕ້ອງຕິດຕາມຕອນຕໍ່ໄປວ່າເຈ້ທິບຈະຖືກສົ່ງຕົວກັບມາລາວ ແລະ ດຳເນີນຄະດີຕໍ່ຜູ້ກ່ຽວຄືແນວໃດ.
