ຟີລິບປິນພົບຜູ້ຕິດເຊື້ອໝາກສຸກລີງຄົນທຳອິດ ມີປະຫວັດເດີນທາງໄປພື້ນທີ່ລະບາດ ຜູ້ສຳຜັດໃກ້ຊິດຍັງບໍ່ພົບຕິດເຊື້ອ
ຟີລິບປິນຢືນຢັນພົບຜູ້ຕິດເຊື້ອໝາກສຸກລີງ (Monkeypox) ຄົນທຳອິດ ເປັນພົນລະເມືອງທີ່ເດີນທາງກັບມາຈາກຕ່າງປະເທດ.
ກະຊວງສາທາລະນະສຸກຟີລິບປິນເປີດເຜີຍວ່າ: ພົບຜູ້ຕິດເຊື້ອພະຍາດໝາກສຸກລີງຄັ້ງທຳອິດໃນປະເທດ ໂດຍຜູ້ຕິດເຊື້ອເປັນຊາຍອາຍຸ 31 ປີ ເດີນທາງກັບມາຈາກຕ່າງປະເທດໃນວັນທີ 19 ກໍລະກົດຜ່ານມາ ແລະ ມີຜົນການກວດຢືນຢັນວ່າຕິດເຊື້ອໃນວັນທີ 28 ກໍລະກົດ.
ທ່ານ ເບເວີລີ ໂຮ ຮອງໂຄສົກກະຊວງສາທາລະນະສຸກຟີລິບປິນ ລະບຸວ່າ: ຜູ້ຕິດເຊື້ອຄົນດັ່ງກ່າວມີປະຫວັດການເດີນທາງໄປປະເທດທີ່ມີການລະບາດຂອງພະຍາດໝາກສຸກລີງກ່ອນກັບມາຟີລິບປິນ ໂດຍໄດ້ເຂົ້າສູ່ຂະບວນການປິ່ນປົວ ແລະ ຫາຍດີແລ້ວ. ປັດຈຸບັນກຳລັງກັກຕົວຢ່າງເຂັ້ມງວດຢູ່ເຮືອນ, ສ່ວນຜູ້ສຳຜັດໃກ້ຊິດກັບຜູ້ຕິດເຊື້ອຈຳນວນ 10 ຄົນ ລວມທັງສະມາຊິກໃນຄອບຄົວ 3 ຄົນ ຍັງບໍ່ມີໃຜສະແດງອາການໃດໆ.
ອ້າງອີງ:
https://www.philstar.com/…/philippines-detects-first…
https://www.reuters.com/…/philippines-detects-first…/
