ຈຳນວນຜູ້ເສຍຊີວິດຈາກພະຍາດ ໄຂ້ຫວັດໃຫຍ່ສາຍພັນໃໝ່ ຢູ່ມຽນມາເພີ່ມເປັນ 25 ຄົນ
ສຳນັກຂ່າວມຽນມາລາຍງານໃນວັນທີ 16 ສິງຫາວ່າ: ຈຳນວນຜູ້ເສຍຊີວິດຈາກການຕິດເຊື້ອໄວຣັດໄຂ້ຫວັດໃຫຍ່ສາຍພັນໃໝ່ຊະນິດ A (H1N1) 2009 ໃນປະເທດ ເພີ່ມຂຶ້ນເປັນ 25 ຄົນແລ້ວ ນັບແຕ່ເຊື້ອໄວຣັດເລີ່ມແຜ່ລະບາດໃນເດືອນຜ່ານມາ.
+ ຈຳນວນຜູ້ເສຍຊີວິດຈາກພະຍາດ ໄຂ້ຫວັດໃຫຍ່ສາຍພັນໃໝ່ ຢູ່ມຽນມາເພີ່ມເປັນ 10 ຄົນ
+ ມຽນມາຂໍໃຫ້ອົງການອະນາໄມໂລກ ຊ່ວຍຄວບຄຸມການລະບາດໄຂ້ຫວັດໃຫຍ່
+ ມຽນມາຮຽກຮ້ອງປະຊາຊົນ ຢ່າແຕກຕື່ນໄວຣັສໄຂ້ຫວັດໝູ
ສຳນັກຂ່າວມຽນມາລາຍງານໂດຍອ້າງກະຊວງສາທາລະນະສຸກ ແລະ ກິລາ ລະບຸວ່າ: ປັດຈຸບັນພົບຜູ້ຕິດເຊື້ອໄຂ້ຫວັດໃຫຍ່ສາຍພັນດັ່ງກ່າວໃນປະເທດແລ້ວທັງໝົດ 242 ຄົນ ໂດຍໄດ້ຮັບຄຳຢືນຢັນຜູ້ຕິດເຊື້ອລາຍໃໝ່ 7 ຄົນໃນໄລຍະສອງວັນຜ່ານມາ. ເຖິງຢ່າງໃດກໍດີ, ຍັງບໍ່ພົບເຈົ້າໜ້າທີ່ສາທາລະນະສຸກຄົນໃດຕິດເຊື້ອໄວຣັດຈາກການໃຫ້ບໍລິການປິ່ນປົວຄົນເຈັບ. ກະຊວງດັ່ງກ່າວເຕືອນໃຫ້ປະຊາຊົນທີ່ຢູ່ໃນກຸ່ມສ່ຽງ ເຊິ່ງປະກອບມີຜູ້ອາຍຸສູງ, ເດັກນ້ອຍ, ຍິງຖືພາ ແລະ ຜູ້ປ່ວຍພະຍາດຊ້ຳເຮື້ອ ແລະ ມີພູມຕ້ານທານຕໍ່າ ປະຕິບັດຕາມຄຳແນະນຳຂອງກະຊວງຢ່າງເຄັ່ງຂັດ ເພື່ອປ້ອງກັນບໍ່ໃຫ້ຕິດເຊື້ອ ລວມທັງຖ້າພົບວ່າມີອາການປ່ວຍ ໃຫ້ເດີນທາງພົບແພດຢູ່ສະຖານທີ່ບໍລິການໃກ້ທີ່ສຸດທັນທີ.
ຂະນະທີ່ບັນດາສະມາຊິກສະພາຜູ້ແທນລາສະດອນຂອງມຽນມາເດີນໜ້າຊຸກຍູ້ຍັດຕິຮຽກຮ້ອງໃຫ້ລັດຖະບານເລັ່ງໃຫ້ຄວາມຮູ້ ເພື່ອສະກັດກັ້ນການແຜ່ລະບາດຂອງເຊື້ອໄວຣັສ H1N1 ໃນປະເທດ ລວມທັງໃຫ້ມີການປຸກລະດົມສັກວັກແຊງປ້ອງກັນການຕິດເຊື້ອນຳອີກ.
