ຍີ່ປຸ່ນຕິດໂຄວິດວັນດຽວເຖິງ 2,3 ແສນຄົນ ຜູ້ຕິດເຊື້ອເຂົ້າໂຮງໝໍເພີ່ມຕໍ່ເນື່ອງ ເປັນຫ່ວງລະບົບສາທາລະນະສຸກເລີ່ມເຄັ່ງຕຶງ
ຍີ່ປຸ່ນພົບຜູ້ຕິດເຊື້ອໂຄວິດ-19 ໃໝ່ເຖິງ 2,3 ແສນຄົນ, ຈຳນວນຜູ້ຕິດເຊື້ອປະຈຳວັນສູງເປັນປະຫວັດສາດສອງວັນຕິດຕໍ່ກັນ ລະບົບສາທາລະນະສຸກເລີ່ມເຂົ້າສູ່ສະພາບເຄັ່ງຕຶງ ຫລັງມີຜູ້ຕິດເຊື້ອເຂົ້າປິ່ນປົວໃນໂຮງໝໍເພີ່ມຂຶ້ນຕໍ່ເນື່ອງ.
ທາງການຍີ່ປຸ່ນເປີດເຜີຍວ່າ: ພົບຜູ້ຕິດເຊື້ອໂຄວິດ-19 ໃໝ່ຈຳນວນ 233.100 ຄົນໃນວັນທີ 28 ກໍລະກົດ ເຊິ່ງເປັນການຕິດເຊື້ອປະຈຳວັນສູງສຸດເປັນປະຫວັດສາດຕໍ່ເນື່ອງເປັນວັນທີສອງ ທ່າມກາງຄວາມກັງວົນວ່າລະບົບສາທາລະນະສຸກຂອງປະເທດກຳລັງເລີ່ມເຂົ້າສູ່ສະພາບເຄັ່ງຕຶງ ຫລັງຈຳນວນຜູ້ຕິດເຊື້ອເຂົ້າປິ່ນປົວໃນໂຮງໝໍເພີ່ມຂຶ້ນຕໍ່ເນື່ອງ.
ໂດຍນະຄອນຫລວງໂຕກຽວພົບຜູ້ຕິດເຊື້ອໃໝ່ເຖິງ 40.000 ຄົນເປັນຄັ້ງທຳອິດໃນວັນທີ 28 ກໍລະກົດ ໂດຍມີລາຍງານຍອດຕິດເຊື້ອ 40.406 ຄົນ ແຊງສະຖິຕິເກົ່າຂອງວັນທີ 22 ກໍລະກົດ ເຊິ່ງພົບຜູ້ຕິດເຊື້ອໃໝ່ຈຳນວນ 34.995 ຄົນ.
ທັງນີ້, ຍີ່ປຸ່ນກຳລັງຜະເຊີນການລະບາດຂອງພະຍາດໂຄວິດ-19 ຮອບທີ 7 ຈາກໄວຣັສສາຍພັນໂອມິຄຣອນ ສາຍພັນຍ່ອຍ BA.5 ເຊິ່ງສາມາດແພ່ກະຈາຍ ແລະ ຫລົບຫລີກພູມຕ້ານທານໄດ້ດີກວ່າໄວຣັສສາຍພັນກ່ອນໆ ສົ່ງຜົນໃຫ້ຈຳນວນຜູ້ຕິດເຊື້ອເພີ່ມຂຶ້ນຕໍ່ເນື່ອງ.
ສຳນັກງານເລຂາທິການຄະນະລັດຖະມົນຕີຂອງຍີ່ປຸ່ນລະບຸວ່າ: ອັດຕາການຄອງຕຽງໃນໂຮງໝໍຂອງຜູ້ຕິດເຊື້ອໂຄວິດ-19 ໃນອາທິດນີ້ເພີ່ມຂຶ້ນກວ່າເທົ່າຕົວຈາກອາທິດກ່ອນໜ້າ ໂດຍຂໍ້ມູນຫລ້າສຸດໃນວັນທີ 27 ກໍລະກົດ ມີຜູ້ຕິດເຊື້ອຄອງຕຽງໃນໂຮງໝໍຫລາຍກວ່າ 50%.
ຈາກການເປີດເຜີຍຂອງອົງການອະນາໄມໂລກ (WHO) ໃນອາທິດຜ່ານມາຈົນຮອດວັນທີ 24 ກໍລະກົດ ຍີ່ປຸ່ນມີຈຳນວນຜູ້ຕິດເຊື້ອໂຄວິດ-19 ສູງທີ່ສຸດໃນໂລກ ໂດຍພົບຜູ້ຕິດເຊື້ອໃນໄລຍະເວລາດັ່ງກ່າວຫລາຍກວ່າ 969.000 ຄົນ, ຮອງລົງມາແມ່ນອາເມລິກາ ເຊິ່ງຢູ່ໃນອັນດັບ 2 ມີລາຍງານຜູ້ຕິດເຊື້ອປະມານ 860.000 ຄົນ ແລະ ເຢຍລະມັນເປັນອັນດັບ 3 ພົບຜູ້ຕິດເຊື້ອປະມານ 570.000 ຄົນ.
ຂະນະທີ່ຈຳນວນຜູ້ເສຍຊີວິດຈາກໂຄວິດ-19 ໃນອາທິດຜ່ານມາມີລາຍງານຫລາຍກວ່າ 12.600 ຄົນ ໂດຍອາເມລິກາເປັນປະເທດທີ່ມີຜູ້ເສຍຊີວິດຫລາຍທີ່ສຸດປະມານ 2.600 ຄົນ, ຮອງລົງມາແມ່ນເບຣຊິນພົບຜູ້ເສຍຊີວິດປະມານ 1.400 ຄົນ, ສ່ວນຍີ່ປຸ່ນມີລາຍງານຜູ້ເສຍຊີວິດໃນອາທິດຜ່ານມາຈຳນວນ 272 ຄົນ.
ອ້າງອີງ:
https://english.kyodonews.net/…/685658039a68-breaking…
https://asia.nikkei.com/…/Japan-daily-COVID-cases-top…
