ນະຄອນຫລວງພະບາງຫາລືແກ້ໄຂປາກົດການຊູຊີຂາຍເຂົ້າໃສ່ບາດໃຫ້ນັກທ່ອງທ່ຽວ

ວັນທີ 25 ກໍລະກົດ 2022 ນີ້ ພະແນກ ຖວທ ຫລວງພະບາງ ໄດ້ປະຊຸມປຶກສາຫາລືກ່ຽວກັບການແກ້ໄຂບັນຫາການຂາຍເຂົ້າໃສ່ບາດໃຫ້ນັກທ່ອງທ່ຽວໂດຍເປັນປະທານຂອງທ່ານວັນນະເດດ ພົງສຸດທິ ຫົວໜ້າຫ້ອງການບໍລິຫານພະແນກ ຖວທ, ມີຫົວໜ້າຫ້ອງການ ຖວທ ເມືອງຈອມເພັດ, ຮອງຫົວໜ້າຫ້ອງການ ຖວທ ນະຄອນຫຼວງພະບາງ, ບັນດາຫົວໜ້າຂະເເໜງການທີ່ກ່ຽວຂ້ອງ, ຕໍາຫຼວດທ່ອງທ່ຽວ, ປະທານກຸ່ມຜູ້ນຳທ່ຽວ, ອໍານາດການປົກຄອງບ້ານທີ່ກ່ຽວຂ້ອງພາຍໃນເທສະບານນະຄອນ ຫຼວງພະບາງ.

ກອງປະຊຸມໄດ້ແນ່ໃສ່ຊອກຫາຊ່ອງທາງແກ້ໄຂບັນຫາຫາງສຽງສັງຄົມກໍຄືປະກົດການຫຍໍ້ທໍ້ກ່ຽວກັບຄວາມບໍ່ເປັນລະບຽບຮຽບຮ້ອຍໃນການຂາຍເຂົ້າໃສ່ບາດ ໃຫ້ນັກທ່ອງທ່ຽວໃຫ້ໝົດໄປ; ເຊິ່ງໄດ້ມີຄວາມເປັນເອກະພາບກັນ, ສະເໜີໃຫ້ຫ້ອງການ ຖວທ ນະຄອນຫຼວງພະບາງສືບຕໍ່ເກັບກຳ ແລະສະໜອງຂໍ້ມູນຈໍານວນຜູ້ຂາຍເຂົ້າທັງໝົດ, ຈໍານວນທີ່ໄດ້ອອກບັດອະນຸຍາດຂາຍເຂົ້າ, ຈໍານວນທີ່ຍັງບໍ່ໄດ້ອອກບັດອະນຸຍາດຂາຍເຂົ້າ, ປະກອບມີຈັກໜ່ວຍ, ຈໍານວນເດັກນ້ອຍທີ່ມາເຄື່ອນໄຫວເກັບເຂົ້າໃສ່ບາດ, ມາຈາກບ້ານໃດ, ເພື່ອເປັນຂໍ້ມູນໃນການວາງມາດຕະການແກ້ໄຂໃນໄລຍະຕໍ່ໄປ, ບັນຫາການເຄື່ອນໄຫວຂອງຜູ້ນໍາທ່ຽວທີ່ຕິດພັນກັບແມ່ຄ້າຂາຍເຂົ້າໃຫ້ນັກທ່ອງທ່ຽວໃສ່ບາດ, ເຊິ່ງສ້າງຄວາມບໍ່ເປັນລະບຽບ, ກຸ່ມຜູ້ນໍາທ່ຽວກໍຈະປະສານກັບພາກສ່ວນກ່ຽວຂ້ອງເພື່ອແກ້ໄຂ, ສ່ວນຜູ້ນໍາທ່ຽວທີ່ມາຈາກຕ່າງແຂວງແມ່ນໃຫ້ມາຜ່ານປະທານກຸ່ມຜູ້ນໍາທ່ຽວຂອງແຂວງ, ແນະນໍາເພີ່ມຕື່ມເພື່ອໄປແນະນໍາຕໍ່ໃຫ້ນັກທ່ອງທ່ຽວ, ເປັນຕົ້ນແມ່ນດ້ານວັດທະນະທໍາຄະນົບທໍານຽມຂອງຫຼວງພະບາງ, ການໃສ່ບາດ, ແນະນໍາຂໍ້ມູນດ້ານການທ່ອງທ່ຽວ.

ສໍາລັບການຂາຍດອກໄມ້, ເຂົ້າຫຼາມ, ໄຄແຜ່ນ, ເຂົ້າໜົມຕ່າງໆແມ່ນສະເໜີໃຫ້ຫ້ອງການອຸດສາຫະກໍາ ແລະການຄ້ານະຄອນ ຫຼວງພະບາງ ແລະຫ້ອງການອຸດສາຫະກໍາ ແລະການຄ້າເມືອງຈອມເພັດ ປະສານກັນເພື່ອຊອກຈຸດວາງຂາຍ ແລະອອກບັດອະນຸຍາດຂາຍເຄື່ອງເພື່ອເຫຼີກເວັ້ນອາຫານທີ່ບໍ່ມີຄຸນນະພາບ, ບັນຫາຄວາມບໍ່ສະດວກໃນການຂາຍເຄື່ອງ ແລະການຈອດລົດຮັບສົ່ງນັກທ່ອງທ່ຽວກີດຂວາງການສັນຈອນ, ສະຖານທີ່່ທ່ອງທ່ຽວແມ່ນໃຫ້ຫ້ອງການ ຖວທ ນະຄອນຫຼວງພະບາງປະສານພາກສ່ວນກ່ຽວຂ້ອງລົງຈັດສັນຄືນຕື່ມອີກ.

ເຫັນດີໃຫ້ຜູ້ຂາຍເຂົ້າໃຫ້ນັກທ່ອງທ່ຽວໃສ່ບາດ ນັ່ງຂາຍຢູ່ບ່ອນເກົ່າ, ເວລານັກທ່ອງທ່ຽວໃສ່ບາດໝົດກໍມາຊື້ໃໝ່ດ້ວຍຕົນເອງ, ຫ້າມບໍ່ໃຫ້ຜູ້ຂາຍເຂົ້າໃສ່ບາດ ເຄື່ອນໄຫວຍັດຍອກຊູຊີຂາຍໃຫ້ນັກທ່ອງທ່ຽວດ້ວຍຄວາມບໍ່ພໍໃຈ, ເຊິ່ງທັງໝົດນັ້ນ, ກໍເພື່ອສ້າງພາບພົດຄວາມສວຍງາມປະດັບເອ້ໃຫ້ແກ່ແຫຼ່ງທ່ອງທ່ຽວທີ່ຕິດພັນກັບວັດທະນະທຳທີ່ເປັນເອກະລັກສະເພາະຂອງຊາວຫຼວງພະບາງເມືອງມໍລະດົກໂລກໃຫ້ມີຄວາມຍືນຍົງຕະຫຼອດໄປ.

ສ່ວນມາດຕະການໃນການແກ້ໄຂບັນຫາຫາງສຽງຂອງສັງຄົມກໍຄືປະກົດການຫຍໍ້ທໍ້ນັ້ນ, ພາກສ່ວນກ່ຽວຂ້ອງຈະໄດ້ເອົາໃຈໃສ່ສຶກສາອົບຮົມຜົນໄດ້ຜົນເສຍຂອງຄວາມບໍ່ເປັນລະບຽບຮຽບຮ້ອຍ, ການຂາຍເຄື່ອງຊະຊາຍ, ການວາງລາຄາບໍ່ສົມເຫດສົມຜົນ ແລະອື່ນໆ, ໂດຍພື້ນຖານແມ່ນເຫັນດີເປັນເອກະພາບກັບກົດລະບຽບຂອງເຈົ້ານະຄອນວາງອອກຄືລະເມີດຄັ້ງທີ 1 ແມ່ນສຶກສາອົບຮົມປັບໃໝ 500.000 ກີບ (ຫ້າແສນກີບ) ແລະຢຸດບໍ່ໃຫ້ຂາຍ 6 ເດືອນ, ລະເມີດຄັ້ງທີ 2 ແມ່ນປັບໃໝ 1.000.000 ກີບ (ໜຶ່ງລ້ານກີບ) ແລະບໍ່ໃຫ້ຂາຍເລີຍ ແລະຖ້າຫາກລະເມີດຄັ້ງທີ 3 ແມ່ນດໍາເນີນຄະດີຕາມລະບຽບກົດໝາຍ