ພາຍຫລັງຖືກຈັບ ຮັບສາລະພາບວ່າ ໄດ້ລັກລົດຈັກ ແລະ ຊັບຄົນອື່ນ

ຂ່າວ ປກສ ນະຄອນຫລວງວຽງວຽງຈັນ ລາຍງານໃຫ້ຮູ້ວ່າ: ວັນທີ 15 ກໍລະກົດ 2022 ເວລາ 15:10 ໂມງ ປກສ ກຸ່ມໜອງດ້ວງ ໄດ້ຮັບແຈ້ງວ່າ: ມີຄົນຮ້າຍງັດປະຕູເຂົ້າມາຫ້ອງເຊົ່າ ຢູ່ບ້ານດົງນາໂຊກໃຕ້ ເມືອງສີໂຄດຕະບອງ ມີລົດຈັກ 1 ຄັນ ຍີ່ຫໍ້ຮອນດາເວບ 100 ສີຂຽວດໍາ ທະບຽນ ຈຣ 9140 ອອກຊື່ ນາງຈັນດີ ເຮືອງເດດ, ໂທລະສັບ 1 ເຄື່ອງ oppo S11 pro ມູນຄ່າ 2.800.000 ກີບ, ເງິນກີບ 19.000 ກີບ ຫຼັງໄດ້ຮັບແຈ້ງຄວາມ ປກສ ກຸ່ມໜອງດ້ວງ ຈິ່ງລົງກວດກາສະຖານທີ່ ພົບເຫັນຮ່ອງຮອຍການກະທໍາຜິດ ຈຶ່ງໄດ້ສືບຄົ້ນຫາ ສາມາດຈັບຜູ້ຖືກສົງໄສໄດ້ຊື່ ທ້າວ ຈັນວຽງໄຊ ອາຍຸ 21 ປີ ກໍາມະກອນ ຢູ່ບ້ານນາຄໍາ ໜ່ວຍ 4 ເມືອງສີໂຄດຕະບອງ ແລ້ວເອົາຕົວມາດຳເນີນສອບສວນເອົາຄຳໃຫ້ການເບື້ອງຕົ້ນ.

ຜ່ານການສອບສວນເບື້ອງຕົ້ນ ທ້າວຈັນວຽງໄຊ ຮັບສາລະພາບວ່າ : ໄດ້ລັກລົດຈັກ ແລະ ໂທລະສັບ ຂອງນາງ ຈັນດີ ເຮືອງເດດ ດ້ວຍວິທີງັດແງະ ບານປ່ອງຢ້ຽມ ແລ້ວປົດລັອກບານປະຕູອອກ, ຈາກນັ້ນກໍເຂົາໄປລັກເອົາຊັບ. ປັດຈຸບັນ ຄະດີລາຍນີ້ ຖືກສົ່ງ ປກສ ເມືອງສີໂຄດຕະບອງ ດຳເນີນຕາມຂັ້ນຕອນ.