(ສຕລ)ໄດ້ຈັດພິທີຈັບສະຫລາກແບ່ງກຸ່ມ ແລະ ຖະແຫລງຂ່າວ ການແຂ່ງຂັນຟຸດຊໍ ຊີງຂັນປະທານ ສະຫະພັນບານເຕະແຫ່ງຊາດລາວ

ຕອນບ່າຍ ວັນອັງຄານ 26 ກໍລະກົດ 2022 ຢູ່ທີ່ຫ້ອງປະຊຸມ ສະຫະພັນບານເຕະແຫ່ງຊາດລາວ(ສຕລ)ໄດ້ຈັດພິທີຈັບສະຫລາກແບ່ງກຸ່ມ ແລະ ຖະແຫລງຂ່າວ ການແຂ່ງຂັນຟຸດຊໍ ຊີງຂັນປະທານ ສະຫະພັນບານເຕະແຫ່ງຊາດລາວ REVIVE FUTSAL CUP 2022 ເຊິ່ງຈະຈັດຂຶ້ນໃນລະຫວ່າງວັນທີ 30 ກໍລະກົດ ຫາ 03 ກັນຍາ 2022 ເປັນກຽດເຂົ້າຮ່ວມໂດຍມີ ທ່ານ ປະສິດ ສຸພາບ ຮອງປະທານສຕລທັງເປັນຫົວຫນ້າອະນຸກຳມະການຟຸດຊໍ, ທ່ານ ນາງ ກັນຍາ ແກ້ວມະນີ ເລຂາທິການ ສຕລ, ທ່ານ ທະວັດໄຊ ອຸດົມວິໄລ ຜູ້ຈັດການກິດຈະກຳອຸປະຖຳ ບໍລິສັດ ເບຍລາວ ຈຳກັດ, ທ່ານ ພຸດດາມອນ ຈັນທະລາສີ ປະທານບໍລິສັດ ເຊຍ ສະປອດ ແອນ ເອັນເຕີເມັ້ນ ຈຳກັດ, ພ້ອມດ້ວຍວິຊາການ, ຕາງຫນ້າກຳມະການ, ບັນດາທີມ, ນັກກິລາ ແລະ ສື່ມວນຊົນ ເຂົ້າຮ່ວມ.

ການແຂ່ງຂັນຟຸດຊໍ ຊີງຂັນປະທານ ສຕລ REVIVE FUTSAL CUP 2022 ຄັ້ງນີ້ມີທີມເຂົ້າຮ່ວມ 16 ທີມຄື:

1. ສະໂມສອນ ເບ ປີ້ງແບ້

2. ສະໂມສອນ ໂຮງແຮມປານີ

3. ສະໂມສອນ ແຄນລາວ ຢູໄນເຕັດ

4. ສະໂມສອນ ບໍລິສັດ ອາສາ

5. ສະໂມສອນ ເອສອີຊີ ຢູໄນເຕັດ

6. ສະໂມສອນ ຄິງດອມ ເອັຟຊີ

7. ສະໂມສອນ ເໜືອ-ໃຕ້ ເອັຟຊີ

8. ສະໂມສອນ ຈຳປາ ເອັຟຊີ

9. ສະໂມສອນ ຈັນສີ ຂົນສົ່ງ

10. ສະໂມສອນ ເອັສທີ ທີ ເອັຟຊີ

11. ສະໂມສອນ ເອັຟ ເອັສ ແອວ ເອັຟຊີ

12. ສະໂມສອນ ນ້ຳເຕົ້າຮູ້ – ຕຸ້ຍ ຈ່ອຍ

13. ສະໂມສອນ ອໍນິວ ເອັຟຊີ

14. ສະໂມສອນ ຊາວະ ນະຄອນຫຼວງ

15. ສະໂມສອນ ເຄພີເອັສ ເອັຟຊີ

16. ສະໂມສອນ ຊັບ – ອິນ ເອັຟຊີ

ການຈັດການແຂ່ງຂັນແມ່ນນຳໃຊ້ວິທີ ແບ່ງສາຍ ( Round Robin) ຊຶ່ງແບ່ງອອກເປັນ 4 ສາຍ ເຕະຄົບກັນໝົດນັບເອົາຄະແນນທີ່ດີທີ່ສຸດ, ເອົາທີ 1 ແລະ ທີ 2 ຂອງສາຍ ແຕ່ລະສາຍ ຜ່ານເຂົ້າສູ່ຮອບກ່ອນຮອງຊະນະເລີດ.

ຜົນການຈັບສະຫລາກມີດັ່ງນີ້:

– ກຸ່ມA : ສະໂມສອນ ເບ ປີ້ງແບ້,ສະໂມສອນ ໂຮງແຮມປານີ, ສະໂມສອນ ແຄນລາວ ຢູໄນເຕັດ ແລະ ສະໂມສອນ ບໍລິສັດ ອາສາ.

– ກຸ່ມ B : ສະໂມສອນ ເອສອີຊີ ຢູໄນເຕັດ, ສະໂມສອນ ຄິງດອມ ເອັຟຊີ,ສະໂມສອນ ເຫນືອ-ໃຕ້ ເອັຟຊີ ແລະ ສະໂມສອນ ຈຳປາ ເອັຟຊີ.

– ກຸ່ມ C : ສະໂມສອນ ຈຳປາ ເອັຟຊີ, ສະໂມສອນ ຈັນສີ ຂົນສົ່ງ, ສະໂມສອນ ເອັສທີ ທີ ເອັຟຊີ,ສະໂມສອນ ເອັຟ ເອັສ ແອວ ເອັຟຊີ ແລະ ສະໂມສອນ ນ້ຳເຕົ້າຮູ້ – ຕຸ້ຍ ຈ່ອຍ.

– ກຸ່ມ D : ສະໂມສອນ ອໍນິວ ເອັຟຊີ, ສະໂມສອນ ຊາວະ ນະຄອນຫຼວງ, ສະໂມສອນ ເຄພີເອັສ ເອັຟຊີ ແລະ ສະໂມສອນ ຊັບ – ອິນ ເອັຟຊີ.

ນອກຈາກການຈັບສະຫລາກແບ່ງກຸ່ມແລ້ວຍັງມີພິທີມອບເງິນສະໜັບສະຫນູນ ໂດຍແມ່ນ ທ່ານ ທະວັດໄຊ ອຸດົມວິໄລ ຜູ້ຈັດການກິດຈະກຳອຸປະຖຳ ບໍລິສັດ ເບຍລາວ ຈຳກັດ ມອບເງິນມູນຄ່າ 105.000.000 ກີບ ກ່າວຮັບໂດຍ ແມ່ນ ທ່ານ ປະສິດ ສຸພາບ ຮອງປະທານ ສຕລ ທັງເປັນຫົວຫນ້າອະນຸກຳມະການຟຸດຊໍ.

ການແຂ່ງຂັນໃນຄັ້ງນີ້ ທີມຊະນະເລີດ ຈະໄດ້ຮັບເງິນ 10.000.000 ກີບ ພ້ອມຂັນແຊ້ມ ແລະ ຫລຽນ, ອັນດັບ 2 ຈະໄດ້ຮັບເງິນລາງວັນ 5.000.000 ກີບ, ອັນດັບ 3 ຈະໄດ້ຮັບເງິນ 3.000.000 ກີບ, ນອກຈາກນັ້ນຍັງມີລາງວັນຄູຝຶກດີເດັ່ນ, ຜູ້ຮັກສາປະຕູດີເດັ່ນ, ນັກເຕະທີ່ຍິງປະຕູສູງສຸດ ແລະ ນັກກິລາດີເດັ່ນ ແມ່ນຈະໄດ້ຮັບຂັນ.

ການແຂ່ງຂັນແມ່ນຈະເລີ່ມວັນທີ 30 ກໍລະກົດ ຫາ 03 ກັນຍາ 2022 ຢູ່ທີ່ສະໜາມຟຸດຊໍ ສະຫະພັນບານເຕະແຫ່ງຊາດລາວ.