ໄມເຄິ້ນ ໄວ ຜູ້ພິສູດໃຫ້ເຫັນວ່າຄູຝຶກທີ່ເກັ່ງ ເຮັດໃຫ້ທີມມີໄຊໄດ້ກວ່າເຄິ່ງ
ໂດຍ: ທິດກໍ່າ
ເມື່ອເອີ່ຍເຖິງວົງການບານເຕະລາວເຮົາ ໃນສາມສີ່ປີຜ່ານໆມາເບິ່ງຄືວ່າຢ້ຳເທົ້າ ຫລື ອາດເວົ້າໄດ້ວ່າເກືອບຖອຍຫລັງໄປຫລາຍເຕີບ. ທິດກໍ່າ ຍັງອົດຄິດເຫັນບໍ່ໄດ້ ໃນຕອນນັກກິລາບານເຕະທີມຊາດລາວລຸ້ນໃຫຍ່ທີ່ໄດ້ໄປຮ່ວມແຂ່ງຂັນໃນລາຍການຊີງແຊ້ມຊຸຊູກິຄັບ 2020 (AFF SUZUKI CUP 2022) ເຊິ່ງນຳທີມໂດຍທ່ານ ເຊວາໄຣ ເວັນກາດາຣາມ ຄູຝຶກຊາວສິງກະໂປ ແລະ ຈັດຂຶ້ນທີ່ປະເທດສິງກະໂປເອງ.
ໃນຄັ້ງນັ້ນຄົນທັງຫລາຍໃຜກໍມີຄວາມຫວັງນຳບິນລີ້ ເກດແກ້ວພົມພອນ ເຊິ່ງເປັນນັກກິລາຕົວເຕັງທີ່ເດີນທາງມາແຕ່ຝຣັ່ງ ເພື່ອເຂົ້າຮ່ວມໃນລາຍການນີ້, ແຕ່ກໍອະນິຈາ ! ສຸດທ້າຍມາ ບິນລີ້ ກໍບໍ່ສາມາດເຮັດຫຍັງໄດ້ ເພາະທຸກຢ່າງການແຂ່ງຂັນເຕະບານມັນກໍຕ້ອງໄດ້ອາໄສກຳລັງທັງໝົດໃນທີມ. ສະຫລຸບແລ້ວ ໃນການເຂົ້າຮ່ວມແຂ່ງຂັນໃນຄັ້ງນັ້ນລາວບໍ່ສາມາດຍິງໄດ້ຈັກປະຕູ ແລະ ກໍບໍ່ໄດ້ຈັກຄະແນນ.
ຢ່າງໃດກໍດີ, ຖ້າພວກເຮົາຫາກພ້ອມກັນຄົ້ນຄວ້າຊອກຫາສາເຫດສ່ວນໃຫຍ່ແລ້ວມັນກໍມາຈາກ !! ຄູຝຶກ !! ເພາະວ່າຄູຝຶກເປັນຫົວຫອກໃນການວາງແຜນຍຸດທະສາດໃນການແຂ່ງຂັນຕໍ່ສູ້ເພື່ອຍາດເອົາໄຊຊະນະມາຢູ່ໃນກຳມືເໜືອຄູ່ແຂ່ງ. ນອກຈາກນັ້ນແລ້ວ ຄູຝຶກຍັງເປັນຜູ້ອອກເຫື່ອເທແຮງໃນການສິດສອນເຕັກນິກ, ຍຸດທະວິທີ, ສິລະປະຍຸດ ທັງໃກ້ຊິດຕິດແທດ, ກຳໄດ້ຈິດຕະສາດ, ຈຸດພິເສດຂອງນັກກິລາແຕ່ລະຄົນທີ່ມີຄວາມຊຳນິຊຳນານໃນແຕ່ລະຕຳແໜ່ງ ຕະຫລອດຮອດການປຸກກຳລັງໃຈໃຫ້ນັກກິລາແຕ່ລະຄົນມີຄວາມກະຕືລືລົ້ນ ເພື່ອກະຫາຍເອົາໄຊຊະນະມາໃຫ້ທີມຂອງຕົນ ເພື່ອກຽດສັກສີ ແລະ ນຳເອົາຊື່ສຽງມາໃຫ້ປະເທດຊາດດ້ວຍຄວາມຫວັງອັນສູງສົ່ງ.
ນອກຈາກທີ່ກ່າວມານີ້ແລ້ວ ໃນເວລາແຂ່ງຕົວຈິງກໍຕ້ອງມີວິທີກະຕຸ້ນໃຫ້ລູກທີມ ດ້ວຍການອອກຄຳສັ່ງ ຫລື ວາງວາທະສິນ, ສັ່ງຂຶ້ນ, ສັ່ງບຸກ ເພື່ອເຮັດໃຫ້ນັກເຕະທຸກຄົນບຸກທະລຸຍາດເອົາໄຊຊະນະມາຢູ່ໃນກຳມື.
ເຖິງຢ່າງໃດກໍດີ, ພາຍຫລັງສະຫະພັນບານເຕະແຫ່ງຊາດລາວໄດ້ຕັດສິນໃຈຍົກເລີກຈ້າງຄູຝຶກຄົນເກົ່າ ທ່ານ ເຊວາໄຣ ແລ້ວຫັນມາຈ້າງເອົາຄູຝຶກຄົນໃໝ່ ທ່ານ ໄມເຄີ້ນໄວ ຄົນເຢຍລະມັນ ເຫັນວ່າບານເຕະທີມຊາດລາວໄດ້ພິກປີ້ນປະຫວັດສາດໜ້າໃໝ່ຈາກມີແຕ່ເສຍກັບເສຍຫັນມາໄດ້ໄຊຊະນະ ຫລື ຢ່າງໜ້ອຍກໍສະເໝີ ຫລື ເສຍກໍແມ່ນມີໜ້ອຍຄັ້ງ ດັ່ງທີມຊາດອາຍຸບໍ່ເກີນ 19 ປີ ທີ່ໄປແຂ່ງຂັນຊີງແຊ້ມອາຊຽນແມ່ນຊະນະລວດ ແລະ ສາມາດເຂົ້າໄປຊີງຊະນະເລີດກັບມາເລເຊຍ ແລະ ໄດ້ຮອງແຊ້ມມາສູ່ປະເທດຊາດອັນເປັນການສ້າງກຽດຊື່ສຽງໃຫ້ປະເທດຊາດ ແລະ ວົງການບານເຕະລາວຢ່າງໃຫຍ່ຫລວງ.
ຈາກຜົນງານໂດດເດັ່ນທີ່ກ່າວມານີ້ແມ່ນມາຈາກການມີຄູຝຶກທີ່ດີດັ່ງທ່ານ ໄມເຄີ້ນໄວ ຜູ້ສ້າງປະຫວັດສາດໜ້າໃໝ່ໃຫ້ວົງການກິລາບານເຕະລາວໃຫ້ເຕີບໃຫຍ່ຂະຫຍາຍຕົວ ແລະ ເຂັ້ມແຂງໃນອະນາຄົດ.
