ສ່ວຍສາອາກອນເມືອງໄຊເສດຖາ ຕິດຕັ້ງໂປຣແກຣມບັນຊີ ສາມາດພິມໃບເກັບເງິນອາກອນມູນຄ່າເພີ່ມ ພ້ອມຝຶກອົບຮົມໃຫ້ຟຣີ

ວັນທີ 22 ກໍລະກົດ 2022 ຜ່ານມານີ້ ສ່ວຍສາອາກອນ ເມືອງໄຊເສດຖາ ອອກແຈ້ງການແຈ້ງເຖິງທ່ານ ຜູ້ປະກອບການ, ຜູ້ອໍານວຍການ ວິສາຫະກິດ ສ່ວນບຸກຄົນ, ນິຕິບຸກຄົນ ທີ່ເປັນ ນັກລົງທຶນ ທັງພາຍໃນ ແລະ ຕ່າງປະເທດ ພາຍໃນເມືອງໄຊເສດ ການຕິດຕັ້ງໂປຣແກຣມບັນຊີ ສາມາດພິມໃບເກັບເງິນອາກອນມູນຄ່າເພີ່ມ.

ເພື່ອລະດົມ, ຊຸກຍູ້ ແລະ ສ້າງເງື່ອນໄຂສະດວກໃຫ້ແກ່ການຂະຫຍາຍຖານວິສາຫະກິດ ເປົ້າຫມາຍທີ່ຈະເຂົ້າໃນລະບົບ ອາກອນມູນຄ່າເພີ່ມ ໃຫ້ໄດ້ຕາມລະດັບຄາດຫມາຍ ຫລື ລື່ນແຜນການທີ່ກໍານົດໄວ້, ຊຶ່ງກົມສ່ວຍສາອາກອນ ແລະ ກົມຄຸ້ມຄອງ ບັນຊີ, ກະຊວງການເງິນມີນະໂຍບາຍ ຕິດຕັ້ງໂປຣແກຣມບັນຊີ ສາມາດພິມໃບເກັບເງິນອາກອນມູນຄ່າເພີ່ມ ພ້ອມທັງຝຶກອົບຮົມ ການນໍາໃຊ້ ຟຣີ ຫລື ບໍ່ມີຄ່າໃຊ້ຈ່າຍໃດໆ ໃຫ້ວິສາຫະກິດ ເປົ້າຫມາຍທີ່ຈະເຂົ້າໃນລະບົບອາກອນມູນຄ່າເພີ່ມ, ສະນັ້ນ, ສ່ວຍສາ ອາກອນປະຈໍາເມືອງ ຈື່ງຂໍຖືເປັນກຽດແຈ້ງມາຍັງທ່ານ ຜູ້ປະກອບການ, ຜູ້ອໍານວຍການ ວິສາຫະກິດ ສ່ວນບຸກຄົນ, ນິຕິບຸກຄົນ ທີ່ເປັນນັກລົງທຶນ ທັງພາຍໃນ ແລະ ຕ່າງປະເທດ ໃນຂອບເຂດເມືອງໄຊເສດຖາ ເພື່ອຊາບ ແລະ ຮີບຮ້ອນໄປພົວພັນລົງທະບຽນ ຂໍຕິດຕັ້ງ ແລະ ນໍາໃຊ້ໂປຣແກຣມບັນຊີດັ່ງກ່າວ ຢູ່ສ່ວຍສາອາກອນປະຈໍາເມືອງໄຊເສດຖາ ກ່ອນວັນທີ 05 ສິງຫາ 2022.