ຕຳຫລວດ ສ.ເຊັກ ດັດແປງລົດເຟີຣາຣີ ທີ່ຢຶດມາຈາກອາດຊະຍາກອນ ມາເປັນລົດສາຍກວດໄລ່ຈັບຄົນຮ້າຍ

ຕຳຫລວດ ສ.ເຊັກ ອອກແນວຄິດ ປ່ຽນລົດຫລູທີ່ຢຶດໄວ້ມາເປັນລົດສຳລັບໃຊ້ໃນການປະຕິບັດໜ້າທີ່ ໂດຍສະເພາະພາລະກິດທີ່ຕ້ອງໄລ່ລ່າຜູ້ກະທຳຜິດ.

ຕໍ່ໄປນີ້ຄົນຮ້າຍໃນ ສ.ເຊັກ ອາດຮູ້ສຶກຫວັ່ນໆ ຫລັງຈາກກົມຕຳຫລວດຕັດສິນໃຈນຳເອົາລົດ Ferrari 458 Italia ລຸ້ນປີ 2011 ທີ່ມີການຢຶດເອົາໄວ້ຈາກອາດຊະຍາກອນ ມາດັດແປງເປັນລົດສາຍກວດທີ່ສາມາດເລັ່ງຄວາມໄວໄດ້ທັນສຳລັບພາລະກິດຈັບກຸມໃນຄະດີລັກລົດ ຫລື ຈັດແຂ່ງລົດແບບຜິດກົດໝາຍຕາມທ້ອງຖະໜົນ.

ຖະແຫລງການຈາກກົມຕຳຫລວດ ສ.ເຊັກ ເຜີຍວ່າ: ພວກເຂົາໃຊ້ເງິນຄ່າດັດແປງລົດເຟີຣາຣີໜ້ອຍກວ່າການທີ່ຈະຕ້ອງຈັດຊື້ລົດສາຍກວດຄັນໃໝ່ຄື Skoda Scala ທີ່ມີມູນຄ່າ 300.000 ໂຄຣູນາ.

ໃນປີ 2021 ຜ່ານມາ, ຕຳຫລວດ ສ.ເຊັກ ໄດ້ມີການຢຶດລົດເກືອບ 900 ຄັນ ສ່ວນຫລາຍຈະຖືກນຳມາຂາຍເຂົ້າຕະຫລາດເພື່ອຊົດເຊີຍຕໍ່ຄ່າເສຍຫາຍທີ່ເຈົ້າຂອງເກົ່າເປັນຜູ້ສ້າງໄວ້. ຂະນະທີ່ບາງສ່ວນຈຳເກັບໄວ້ໃຊ້ໃນການປະຕິບັດງານຂອງເຈົ້າໜ້າທີ່.

ເຖິງວ່າຈະມີລົດຫລາຍຄັນທີ່ຕຳຫລວດຢຶດໄດ້ ແລະ ນຳເອົາມາໃຊ້ໃນການປະຕິບັດງານ, ແຕ່ບໍ່ເຄີຍມີລົດຄັນໃດທີ່ຫລູເທົ່າກັບເຟີຣາຣີລຸ້ນນີ້ມາກ່ອນ ໂດຍຕຳຫລວດທີ່ຈະມາຂັບລົດຄັນນີ້ ຈະຕ້ອງເປັນເຈົ້າໜ້າທີ່ທີ່ໄດ້ຮັບການຝຶກຝົນມາໂດຍສະເພາະເທົ່ານັ້ນ.

ອ້າງອີງ:

https://www.policie.cz/…/novy-policejni-special-zacina…

https://www.theguardian.com/…/czech-police-turn-seized…