ຄະນະລັດຖະບານ ສີລັງກາ ສາບານຕົວຮັບດຳລົງຕຳແຫນ່ງ

ວິທະຍຸກະຈາຍສຽງຫວຽດນາມລາຍງານ: ວັນທີ 22 ກໍລະກົດຜ່ານມາ, ທ່ານດີເນສ ກູນາວາຣດານາ ນາຍົກ ລັດຖະມົນຕີ ສີລັງກາ ພ້ອມກັບລັດຖະມົນຕີ 17 ທ່ານ ໄດ້ເຂົ້າພິທີສາບານຕົວຮັບດຳລົງຕຳແໜ່ງໂດຍເປັນກຽດຊ້ອງຫນ້າຂອງທ່ານປະທານາທິບໍດີຄົນໃຫມ່ ທ່ານຣານຽວ ວິກົມຊິງເຫ.

ຫ້ອງວ່າການປະທານາທິບໍດີໃຫ້ຮູ້ວ່າ: ບັນຊີລາຍຊື່ໃນຄະນະລັດຖະບານໃຫມ່ມີ ທ່ານອາຣີ ຊາບຣີ ລັດຖະມົນຕີການຕ່າງປະເທດ, ທ່ານຮາຣິນ ເຟີນານໂດ ລັດຖະມົນຕີການທ່ອງທ່ຽວ ແລະ ເຄຫາສະຖານ, ທ່ານນາລິນ ເຟີນານໂດ ລັດຖະມົນຕີການຄ້າ ແລະ ຄ້ຳປະກັນດ້ານສະບຽງອາຫານ ແລະ ທ່ານການຈານາ ວີເຈສເກີຣາ ລັດຖະມົນຕີໄຟຟ້າ ແລະ ພະລັງງານ.

ວິກິດການເງິນຕາຕ່າງປະເທດ ພ້ອມກັບໂລກລະບາດໂຄວິດ 19 ໄດ້ເຮັດໃຫ້ ສີລັງກາ ຕົກເຂົ້າສູ່ສະພາບຂາດໄຟຟ້າທີ່ແກ່ຍາວ ແລະ ໄພເງິນເຟີ້ເພີ່ມຂຶ້ນຢ່າງແຮງ. ປະເທດ ຂາດແຄນສະບຽງອາຫານ, ເຊື້ອໄຟ ແລະ ຢາປົວພະຍາດກໍ່ຂາດເຂີນໃນຫຼາຍເດືອນ. ອີງຕາມກອງທຶນເງິນຕາສາກົນ(IMF), ສີລັງກາ ພວມກູ້ຢຶມ 14 ຕື້ໂດລາຈາກຫຼາຍປະເທດ.