ລະດູຝົນຕ້ອງລະວັງສາຍໄຟ ແລະ ຕົ້ນໄມ້
ໂດຍ: ທ່ຽງທຳ
ເພື່ອນຜູ້ອ່ານທີ່ຮັກແພງ, ຫລາຍຄົນກໍອາດຈະເຫັນສະພາບ ແລະ ຄວາມອັນຕະລາຍລະຫວ່າງຕາຂ່າຍໄຟຟ້າ ແລະ ຕົ້ນໄມ້ແຄມທາງຫລາຍເສັ້ນໃນນະຄອນຫລວງວຽງຈັນ ມີລັກສະນະຕິດໃສ່ສາຍໄຟຟ້າໃກ້ເກີນໄປ, ບາງບ່ອນງ່າໄມ້ໄປກວມເອົາຮອດສາຍໄຟກໍມີ. ເມື່ອຝົນຕົກ ແລະ ຟ້າລົມມາອາດມີຄວາມສ່ຽງສູງທີ່ຈະພາໃຫ້ໄຟຊ໋ອດ ແລະ ຖ້າລົມແຮງກໍອາດສົ່ງຜົນໃຫ້ຕົ້ນໄມ້ ແລະ ງ່າໄມ້ເຫລົ່ານັ້ນຫັກລົງມາທັບເອົາຕາຂ່າຍໄຟຟ້າດັ່ງກ່າວກໍເປັນໄດ້, ເມື່ອມີກໍລະນີແນວນັ້ນກໍອາດສົ່ງຜົນໃຫ້ມີຄວາມສ່ຽງຕໍ່ຊີວິດຂອງປະຊາຊົນຜູ້ຢູ່ໃກ້ຄຽງ ແລະ ອາດນຳຜົນເສຍຫາຍໃຫ້ແກ່ຊັບສິນຂອງລັດເປັນຈຳນວນບໍ່ໜ້ອຍ ເຊິ່ງໃນຜ່ານມາ ເຖິງວ່າກໍລະນີຄວາມສ່ຽງດັ່ງກ່າວຍັງບໍ່ເກີດຂຶ້ນຫລາຍກໍຍ້ອນການເອົາໃຈໃສ່ຕິດຕາມກວດກາຂອງເຈົ້າໜ້າທີ່ໄຟຟ້າ, ໃນການຕັດຮອນຕົ້ນໄມ້ ແລະ ສິ່ງກີດຂວາງຕ່າງໆອອກຈາກຕາຂ່າຍ, ແຕ່ປັດຈຸບັນກໍແມ່ນໄລຍະລະດູຝົນ ເຊິ່ງຄວາມສ່ຽງດັ່ງກ່າວໄດ້ປາກົດມີຂຶ້ນຕໍ່ລະບົບສາຍໄຟຟ້າຫລາຍຈຸດໃນຕົວເມືອງ ແລະ ຖ້າບໍ່ແມ່ນລະບົບສາຍເປື່ອຍກໍຍັງໄຄແດ່. ເອົາລະ ! ແຕ່ເຖິງຢ່າງໃດກໍຮຽກຮ້ອງໃຫ້ພະນັກງານກ່ຽວຂ້ອງເອົາໃຈໃສ່ກວດກາ, ຖ້າບ່ອນໃດຈຸດໃດອາດມີຄວາມສ່ຽງກໍຄວນຕັດຮອນງ່າໄມ້ອອກແມ່ນຈະເປັນການດີທີ່ສຸດ, ພ້ອມນັ້ນ ກໍແມ່ນສະພາບນົກກະຈອກເຂົ້າເຮັດຮັງຢູ່ຈຸດເສົາໄຟໃດທີ່ມີລັກສະນະເປັນປຸ້ມເປັນເປົ້າຢູ່ນັ້ນກໍອາດມີຄວາມສ່ຽງກໍ່ໃຫ້ເກີດໄຟຊ໋ອດ, ໄຟໄໝ້ເກີດຂຶ້ນກໍເປັນໄດ້ ອັນນີ້ກໍຕ້ອງໄດ້ເອົາໃຈໃສ່ບົວລະບັດຮັກສາ ທັງຄວາມປອດໄພ ແລະ ຄວາມສະອາດງາມຕາຂອງຕົວເມືອງ ບົນຈິດໃຈຄຳຂວັນ 6 ສ ຂອງນະຄອນຫລວງປາກົດຜົນເປັນຈິງ ໂດຍສະເພາະ ສ.ສະອາດ ແລະ ສ.ສະຫວ່າງ ໃຫ້ຮັບປະກັນ.
