ເປີດການທ່ອງທ່ຽວແລ້ວ ເຮົາຕ້ອງເປັນເຈົ້າການທີ່ດີເພື່ອຮອງຮັບ

ພຽງບໍ່ພໍເທົ່າໃດເດືອນ ຫລັງຈາກພະຍາດໂຄວິດໄດ້ຜ່ານພົ້ນໄປ, ລັດຖະບານເຮົາໄດ້ມີນະໂຍບາຍເປີດປະເທດໄປຄຽງຄູ່ກັບການເປີດການທ່ອງທ່ຽວ ເພື່ອສ້າງລາຍຮັບເຂົ້າປະເທດ ແລະ ສົ່ງເສີມວຽກເຮັດງານທຳຂອງສັງຄົມ ແລະ ກໍເຫັນວ່າມີຫລາຍອັນໄດ້ປ່ຽນແປງດີຂຶ້ນ, ບັນຍາກາດການພັດທະນາເສດຖະກິດ-ສັງຄົມຂອງປະເທດຄ່ອຍໆຄຶກຄື້ນຂຶ້ນມາ, ແຕ່ລະມື້ນັກທ່ອງທ່ຽວກໍໄດ້ທະຍອຍກັນເຂົ້າມາທ່ຽວປະເທດເຮົາຫລາຍຂຶ້ນ ໂດຍສະເພາະແຂກບັນດາປະເທດອ້ອມຂ້າງເຮົາ , ເພື່ອໄດ້ມາສຳຜັດກັບຄວາມຮູ້ສຶກໃໝ່ກັບການຂີ່ລົດໄຟຄວາມໄວສູງ ລາວ-ຈີນ ຈາກນະຄອນຫລວງວຽງຈັນ ຂຶ້ນສູ່ບັນດາແຂວງພາກເໜືອຂອງລາວ.

ນັກທ່ອງທ່ຽວຫລາຍຄົນນັບທັງພາຍໃນແຕ່ລະປະເທດມີຄວາມຮູ້ສຶກທີ່ດີຈາກຂອດບໍລິການຂອງຜູ້ຮັບຜິດຊອບເສັ້ນທາງລົດໄຟດັ່ງກ່າວ. ແຕ່ກໍມີສ່ວນໜຶ່ງໄດ້ສ່ອງແສງມາເຖິງຂອດບໍລິການຕ່າງໆ ເຊິ່ງຍັງບໍ່ສອດຄ່ອງປານໃດ ນັບແຕ່ຂອດຊື້ປີ້ຜູ້ໂດຍສານ, ບາງກໍລະນີມີນັກທ່ອງທ່ຽວມານຳກັນເປັນຄະນະ ແຕ່ບໍ່ໄດ້ນັ່ງໃນຕູ້ລົດໄຟດຽວກັນຢາຍກັນໄປຄົນລະແຫ່ງ ແລະ ຕູ້. ຮ້າຍແຮງແມ່ນການເຂົ້າແຖວຕໍ່ຄິວຂຶ້ນລົດໄຟກໍຈັ່ງແມ່ນລຳບາກຕາກແດດຈົນໜ້າແຫລ້ຫນ້າດໍາ,ກ່ອນຈະຮອດຄິວຂຶ້ນຕູ້ລົດໄຟ. ແຕ່ເຖິງຢ່າງໃດກໍດີນີ້ກໍເປັນພຽງສ່ວນໜ້ອຍໜຶ່ງທີ່ພາກສ່ວນຮັບຜິດຊອບເພິ່ນຈະປັບປຸງແກ້ໄຂ ໂດຍໄວ ເພື່ອຄວາມສະດວກຂອງຜູ້ມາທ່ຽວ.

ເມື່ອເວົ້າມາຮອດນີ້ ຜູ້ຂຽນກໍຂໍມີຄຳເຫັນບາງຢ່າງຕື່ມ ເພື່ອພວກເຮົາຈະໄດ້ປັບປຸງ ຂອດບໍລິການຂອງຂະແໜງການທ່ອງທ່ຽວ ພາຍຫລັງໄດ້ເປີດໂຕຢ່າງເຕັມຮ້ອຍມາແລ້ວ ນັ້ນຄື:
1. ດ້ານເສັ້ນທາງຄົມມະນາຄົມຂົນສົ່ງຜູ້ໂດຍສານກໍຈະໄດ້ປັບປຸງໃຫ້ດີ ແລະ ຂອດບໍລິການລົດໂດຍສານກໍຕ້ອງໃຫ້ຄ່ອງແຄ້ວວ່ອງໄວ, ມີຄຸນນະພາບ, ບໍ່ເອົາລັດເອົາປຽບກັນ, ບໍລິການຢ່າງມີຈັນຍາບັນ ແລະ ມີຄວາມເປັນລະບຽບຮຽບຮ້ອຍ
2. ຂອດບໍລິການໜັງສືຜ່ານແດນຄົນເຂົ້າ-ອອກເມືອງ ໃຫ້ສະດວກສະບາຍ.
3. ໂຮງແຮມ, ເຮືອນພັກ ກໍຕ້ອງໄດ້ເອົາໃຈໃສ່ເຖິງຄວາມສະອາດ, ງົດງາມ, ການບໍລິການມີສະເໜ ເຮັດໃຫ້ຜູ້ໄດ້ມາຢູ່ສະບາຍ, ຜູ້ຈາກໄປຄິດຮອດ.
4. ສັບລັບສະຖານທີ່ທ່ອງທ່ຽວກໍໃຫ້ມີຄວາມພ້ອມເພື່ອດຶງດູດຜູ້ມາທ່ຽວຊົມຈະໄດ້ເບິ່ງຫຍັງ, ເຫັນຫຍັງ ແລະ ມີຫຍັງຈັບອົກຈັບໃຈ ແລະ ມີອັນຕິດໄມ້ຕິດມືກັບບ້ານຢ່າງສຳລານໃຈ.
5. ການບໍລິການອາຫານ ແລະ ເຄື່ອງດື່ມ ກໍຕ້ອງໃຫ້ເປັນທີ່ພໍໃຈຂອງຜູ້ຊົມໃຊ້ ໝາຍວ່າ ຕ້ອງເໝາະສົມ, ບໍ່ແພງເກີນໄປ ແລະ ເຮັດແນວໃດກໍຢ່າໃຫ້ແຂກໄດ້ປຽບທຽບວ່າອາຫານຢູ່ເມືອງເຮົາ ບ້ານເຮົາແພງຫລາຍດັ່ງທີ່ຜ່ານມາ.
6. ຕ້ອງມີການຝຶກອົບຮົມ, ປັບປຸງຜູ້ເຮັດວຽກນຳທ່ຽວໃຫ້ເປັນມືອາຊີບ, ຮູ້ອະທິບາຍສິ່ງງົດງາມຂອງຊາດ ແລະ ວັດທະນະທຳອັນດີເລີດຂອງປະຊາຊົນລາວເຮົາທີ່ມີມາແຕ່ດຶກດຳບັນນັ້ນໃຫ້ຊາວໂລກ ໄດ້ຮັບຮູ້ ແລະ ຈົດຈຳໄວ້ຕະຫລອດໄປ.