ວັນເກີດ ຫລຸຍ ບາວ ເດັກຫລອດແກ້ວຄົນທຳອິດຂອງໂລກ

ວັນທີ 25 ກໍລະກົດ 1978 ເປັນວັນກຳເນີດຂອງ ຫລຸຍ ບາວ ເດັກຫລອດແກ້ວຄົນທຳອິດຂອງໂລກ ເຊິ່ງ ຫລຸຍ ບາວ ໄດ້ເກີດຢູ່ທີ່ໂຮງໝໍ Royal Oldham Hospital ໂດຍເປັນຜົນງານຂອງໝໍສອງຄົນຄື: ໂຣເບີດ ເອັດເວິດ  (Robert Edwards)ແລະ ແພດຣິກ ສະເຕັບໂທ  (Patrick Steptoe)ຈາກມະຫາວິທະຍາໄລເເຄມບຣິດ ປະເທດອັງກິດ ປັດຈຸບັນ ບາວ ເຮັດວຽກ ຢູ່ສຳນັກງານໄປສະນີທີ່ເມືອງບຣີສຕອນ ປະເທດອັງກິດ ບາວໄດ້ແຕ່ງງານໃນປີ 2004 ແລະ ໄດ້ໃຫ້ກຳເນີດລູກຊາຍຄົນທຳອິດໃນສອງປີຕໍ່ມາ.

ທັງນີ້ເດັກຫລອດແກ້ວຄືເຕັກນິກຂອງການປະຕິສົນທິສັງເຄາະທີ່ເອີ້ນກັນວ່າIn vitro fertilization ຫລື IVF ໂດຍການນຳອົາອະສຸຈິຂອງພໍ່ ແລະ ໄຂ່ຂອງແມ່ມາເຮັດການປະຕິສົນທິໃນຫລອດທົດລອງ ຈາກນັ້ນ, ຈຶ່ງນຳເອົາຕົວອ່ອນໄປຝັງໃນໝົດລູກເພື່ອໃຫ້ເດັກມີການເຕີບໂຕຕາມທຳມະຊາດ ຕັ້ງແຕ່ນັ້ນມາວິທະຍາສາດທາງດ້ານການຈະເລີນພັນກໍຈະເລີນກ້າວໜ້າຢ່າງວ່ອງໄວ ການທົດລອງປະສົບຄວາມສຳເລັດຫລາຍຂຶ້ນ ແຕ່ໃນຂະນະດຽວກັນນັ້ນກໍໄດ້ມີການປະທ້ວງການເຮັດເດັກຫລອດແກ້ວກັນຢ່າງຫລວງຫລາຍ ໂບດບາງແຫ່ງເຖິງກັບອອກມາປະນາມນັກວິທະຍາສາດວ່າເປັນ “ຊາຕານ” ທີ່ບັງອາດເອົາຕົນເອງໄປທຽບເທົ່າກັບ “ພະເຈົ້າ” ໃນການໃຫ້ກຳເນີດມະນຸດ ເຖິງຢ່າງໃດກໍຕາມເຕັກນິກການເຮັດເດັກຫລອດແກ້ວກໍໄດ້ມີການຢືນຢັນພິສູດແລ້ວວ່າປອດໄພ ແລະ ນັ້ນກໍໄດ້ນຳຄວາມຫວັງມາໃຫ້ພໍແມ່ ທີ່ມີບັນຫາການມີລູກຍາກ ປັດຈຸບັນນີ້ການການປະສົມທຽມໃນຫລອດແກ້ວກາຍເປັນເລື່ອງທຳມະດາຂອງຄູ່ແຕ່ງງານໃນທົ່ວໂລກທີ່ບໍ່ສາມາດມີລູກໄດ້ໂດຍວິທີທຳມະຊາດ.