ເທນ ຮາກ ວາງ 3 ກອງກາງເປັນເປົ້າຫມາຍເສີມທີມແມນຢູ ແທນ ເດິຢອງ
ການຊື້ຂາຍຂອງ ແຟຣັງກີ ເດິ ຢອງ ກັບແມນເຊສເຕີ ຢູໄນເຕັດ ທີ່ຍັງບໍ່ປະສົບຄວາມສຳເລັດຈັກເທື່ອ ເຮັດໃຫ້ ເອຣິກ ເທນ ຮາກ ຍື່ນອີກ 3 ລາຍຊື່ກອງກາງເພື່ອເສີມແທນ ເດິ ຢອງ.
ທ່າມກາງກະແສຂ່າວວ່າ ບາເຊໂລນາ ໄດ້ຕົກລົງເງື່ອນໄຂກັບ ແມນເຊສເຕີ ຢູໄນເຕັດ ໃນການຂາຍ ແຟຣັງກີ ເດິ ຢອງ ກອງກາງທີມຊາດເນເທີແລນ ໄປໃຫ້ເປັນທີ່ຮຽບຮ້ອຍແລ້ວ ແຕ່ຍັງມີບັນຫາໃນດ້ານຂອງການຕິດຄ່າຈ້າງກັບນັກເຕະ ແລະ ນັກເຕະຍັງບໍ່ໄດ້ຢາກຈະຍ້າຍອອກຈາກສະໂມສອນ.
ຍິ່ງໄປກວ່ານັ້ນ ບາເຊໂລນາ ໄດ້ຂາຍລິດຂະສິດຖ່າຍທອດສົດໃຫ້ Sixth Street ບໍລິສັດສື່ກິລາລະດັບໂລກທີ່ 10 ເປີເຊັນ ເຮັດໃຫ້ທີມມີລາຍໄດ້ລວມເຖິງ 267 ລ້ານຢູໂຣໃນລະດູການນີ້ ກ່ອນທີ່ວັນນີ້ຈະຂາຍເພີ່ມອີກ 15 ເປີເຊັນ ລວມ 25% ໃນສັນຍາຕະຫລອດໄລຍະເວລາ 25 ປີຂ້າງຫນ້າ ເຊິ່ງການຂາຍສ່ວນແບ່ງນີ້ຈະເຮັໃຫ້ສະໂມສອນໄດ້ເງິນມາເພີ່ມອີກ 315 ລ້ານຢູໂຣ ແລະ ມີທ່າອ່ຽງທີ່ຈະຈຳເປັນຕ້ອງປ່ອຍນັັັກເຕະອອກຈາກທີມນຳອີກ.
ເຊິ່ງຫລ້າສຸດ ເດລີ ເມລ ສື່ກິລາຊື່ດັງຂອງອັງກິດລາຍງານວ່າ ເອຣິກ ເທນ ຮາກ ຜູ້ຈັດການທີມຂອງ ແມນເຊສເຕີ ຢູໄນເຕັດ ຈະບໍ່ຖ້າການຊື້ຂາຍນີ້ອີກຕໍ່ໄປ ແລະ ໄດ້ແຈ້ງອີກ 3 ຊື່ໃຫ້ຄະນະບໍລິຫານຂອງທີມພິຈາລະນາແລ້ວ ເຊິ່ງ 3 ກອງກາງດັ່ງກ່າວປະກອບໄປດ້ວຍ ຣູເບນ ເນເວສ ຈາກ ວູບແຮມຕັນ, ຟາບຽນ ຣຸຍ ຈາກ ນາໂປລີ ແລະ ຢູຣິ ຕີເລີມອງ ຈາກ ເລສເຕີ ຊິຕີ ມາແທນ ແຟຣັງກີ ເດິ ຢອງ.
ແມນເຊສເຕີ ຢູໄນເຕັດ ປິດສາກການເຕະອຸ່ນເຄື່ອງໃນທະວີບເອເຊຍດ້ວຍຜົນງານຊະນະ 3 ສະເຫມີ 1 ຍິງ 13 ປະຕູ ເລີ່ມຈາກການຖະຫລົ່ມ ລີເວີພູລ ໃນປະເທດໄທ 4-0 ແລະ ບິນໄປຍິງ ເມລບິນ ວິກຕໍ ເຖິງອອສເຕຣາເລຍ 4-1 ຕໍ່ດ້ວຍຊະນະ ຄຣິສຕັລ ພາເລດ 3-1 ແລະ ປິດທ້າຍດ້ວຍການສະເຫມີ ແອສຕັນ ວິລລາ 2-2 ໂດຍຍິງໄປທັງຫມົດ 13 ປະຕູ ແລະ ເສຍພຽງ 4 ປະຕູເທົ່ານັ້ນ.
