6 ເດືອນຕົ້ນປີ 2022 ທົ່ວປະເທດມີຜູ້ເສຍຊີວິດຈາກລະເບີດຕົກຄ້າງ 11 ຄົນ
ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນຮອງປະທານ ຜູ້ປະຈຳການ ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໄດ້ກ່າວວ່າ: ໃນໄລຍະ 6 ເດືອນ ຕົ້ນປີ 2022, ທົ່ວປະເທດ ມີອຸບັດເຫດຈາກລະເບີດບໍ່ທັນແຕກທີ່ຕົກຄ້າງ ຈຳນວນ 10 ຄັ້ງ ມີຜູ້ໄດ້ຮັບເຄາະຮ້າຍ 11 ຄົນ ໃນນີ້ ບາດເຈັບ 9 ຄົນ ແລະ ເສຍຊີວິດ 2 ຄົນ, ຊຶ່ງຈໍານວນຕົວເລກອຸບັດເຫດດັ່ງກ່າວ ແມ່ນການລາຍງານຂອງຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ໃນການຖະແຫຼງຂ່າວ ເນື່ອງໃນໂອກາດ ວັນມີຜົນບັງຄັບໃຊ້ ສົນທິສັນຍາ ວ່າດ້ວຍ ການເກືອດຫ້າມລະ ເບີດລູກຫວ່ານ ໄດ້ໝູນວຽນມາບັນຈົບຄົບຮອບອີກວາລະໜຶ່ງ (1 ສິງຫາ 2010 -1 ສິງຫາ 2022) ຄົບຮອບ 12 ປີ, ຈັດຂຶ້ນໃນວັນທີ 21 ກໍລະກົດ 2022 ຜ່ານມານີ້ ທີ່ນະຄອນຫຼວງວຽງຈັນ.
ສປປ ລາວ ໃນຖານະເປັນປະເທດທີ່ໄດ້ຮັບຜົນກະທົບຈາກລະເບີດລູກຫວ່ານຫຼາຍກວ່າປະເທດອື່ນໃນໂລກຖ້າທຽບໃສ່ຈຳນວນປະຊາກອນ, ໄດ້ສືບຕໍ່ສະແດງຄວາມຮັບຜິດຊອບຂອງຕົນ ດ້ວຍການລົງນາມໃນສົນທິສັນຍາ ສະບັບດັ່ງກ່າວ ໃນວັນທີ 18 ມີນາ 2009 ຊຶ່ງເປັນປະເທດທີ 2 ຖັດຈາກປະເທດນອກແວ ແລະ ກໍໄດ້ໃຫ້ສັດຕະຍາບັນ ໃນວັນທີ 16 ກຸມພາ 2010 ຊຶ່ງມີຜົນບັງຄັບໃຊ້ໃນວັນທີ 1 ສິງຫາ 2010 ແລະ ສປປ ລາວ ກໍໄດ້ຮັບການສະໝັກໃຫ້ເປັນເຈົ້າພາບຈັດກອງປະຊຸມແຫ່ງລັດພາຄີສົນທິສັນຍາ ຄັ້ງທີ I ຂຶ້ນ ໃນວັນທີ 9 – 12 ພະຈິກ ປີ 2010 ທີ່ນະຄອນຫຼວງວຽງຈັນ ແລະ ໃນກອງປະຊຸມລັດພາຄີສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຄັ້ງທີ 9 ປີ 2019 ກອງປະຊຸມໄດ້ຮັບຮອງ ໃຫ້ ລັດຖະບານ ແຫ່ງ ສປປ ລາວ ຕໍ່ອາຍຸສັນຍາ ຂອງ ສປປ ລາວ ໄປຕື່ມອີກ 5 ປີ ແຕ່ປີ 2020 ຫາ ປີ 2025.
ສປປ ລາວ ໃນຖານະເປັນພາຄີ ຂອງວົງຄະນາຍາດສາກົນ ເວລາໃດລັດຖະບານ ກໍໄດ້ຍົກສູງຄວາມເອົາໃຈໃສ່ຢ່າງສະເໝີຕົ້ນສະເໝີປາຍ ເພື່ອປະຕິບັດຕາມພັນທະ ແລະ ຄຳໝາຍໝັ້ນ ຕໍ່ກັບສົນທິສັນຍາ ສະບັບດັ່ງກ່າວ, ລັດຖະບານແຫ່ງ ສປປ ລາວ ໄດ້ເອົາໃຈໃສ່ໃນການໂຄສະນາ, ລະດົມ ແລະ ຂົນຂວາຍ ໃນການຈັດຕັ້ງປະຕິບັດ ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ກັບບັນດາປະເທດໃນໂລກ.
ບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ ບໍ່ພຽງແຕ່ເປັນຄວາມອັນຕະລາຍ ຕໍ່ຮ່າງກາຍ, ຈິດໃຈ ແລະ ຊີວິດ ຂອງ ປະຊາຊົນບັນດາເຜົ່າເທົ່ານັ້ນ, ຍັງເປັນອຸປະສັກຕໍ່ກັບການພັດທະນາປະເທດ ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ 2030, ນັບແຕ່ມີການເກັບກູ້ລະເບີດບໍ່ທັນແຕກທີ່ຕົກຄ້າງໃນປີ 1996 ເປັນຕົ້ນມາ ສາມາດເກັບກູ້ລະເບີດບໍ່ທັນແຕກໄດ້ເກືອບ 1 ເປີເຊັນຂອງຈຳນວນລະເບີດລູກຫວ່ານທີ່ຕົກຄ້າງ.
