ການຫາປາແບບຍືນຍົງ ຢ່າໃຊ້ວິທີການຫາແບບດັບສູນ

ໄລຍະເຂົ້າພັນສາເປັນເວລາພືດພັນທັນຍາຫານຕາມທຳມະຊາດອຸດົມສົມບູນ, ເປັນໄລຍະແຜ່ພັນຂອງສິ່ງ ມີຊີວິດຕາມທຳມະຊາດໂດຍສະເພາະສັດນໍ້າ-ສັດປ່າທີ່ມີຄຸນຕໍ່ການດຳລົງຊີວິດຂອງຄົນເຮົາ. ເມື່ອເວົ້າເລື່ອງປາ ແລະ ສັດນໍ້າ, ໄລຍະນີ້ການຫາປາຂອງປະຊາຊົນລາວບາງທ້ອງຖິ່ນໝານດີຍ້ອນປາຂຶ້ນຫລາຍ. ແນວ ໃດກໍດີ ມີຫລາຍຄໍາຄິດເຫັນສະແດງຄວາມດີໃຈຕໍ່ຄວາມອຸດົມສົມບູນຂອງທຳມະຊາດ, ແຕ່ຂະນະດຽວກັນກໍຮຽກຮ້ອງໃຫ້ຫາແບບບໍ່ໃຫ້ດັບສູນ.

ຄວາມຈິງແລ້ວນີ້ແມ່ນລະດູການປາໄຂ່-ແພ່ພັນ ໃນຍາມນໍ້ານອງພວກມັນຈະຂຶ້ນຕາມກະແສນໍ້າເພື່ອໄຂ່-ປະສົມພັນ. ຂະນະດຽວກັນເຖິງວ່າປາບາງຊະນິດບໍ່ຢູ່ໃນບັນຊີສັດນໍ້າປະເພດຫວງຫ້າງ ແລະ ຄຸ້ມຄອງ ເຊັ່ນປາສ້ອຍ-ປາກະແຕບ, ປາຮາກກ້ວຍ…, ແຕ່ຖ້າພວກເຮົາຫາກິນແບບດັບສູນ ມັນກໍດັບສູນແທ້, ຍ້ອນວ່າດຽວນີ້ ພົນລະເມືອງເຮົາເພີ່ມຂຶ້ນ, ການຫາປາບໍ່ແມ່ນໃຫ້ພໍກຸ້ມກິນຄືແຕ່ກ່ອນ, ມັນກາຍເປັນຫາເພື່ອເປັນສິນຄ້າ. ການກິນຂອງຄົນລາວເຮົາ ຊໍ້າພັດກິນຕັ້ງແຕ່ສົມໄຂ່ປາ, ປານ້ອຍ-ປາລູກຄອກ, ລູກຮວກ…ໝາຍວ່າເປັນອາຫານ ໄດ້ທຸກສໍ່າຂອງສັດນໍ້າ-ປາ.

ເພື່ອໃຫ້ຮູ້ຊະນິດສັດນໍ້າທີ່ຢູ່ໃນບັນຊີຫວງຫ້າມ, ຄຸ້ມຄອງ ຈຶ່ງຂໍນໍາເອົາບາງເນື້ອໃນຕາມກົດໝາຍວ່າດ້ວຍການປະມົງມາສະເໜີ ຄືສັດນໍ້າປະເພດຫວງຫ້າມບັນຊີ 1 ປະ ກອບມີ ປາຂ່າ, ປາຝາໄລ, ປາບຶກ, ປາໄຫລໄຟຟ້າ, ປາກວາງ, ປາເລີມ, ປາເສືອ, ປາແມວ ແລະ ປາຕີນ ສັດເຄິ່ງບົກເຄິ່ງນໍ້າ (ປະເພດຫວງຫ້າມຕ້ອງໄດ້ຮັບການອະນຸລັກ, ປົກປັກຮັກສາ, ພັດທະນາ ແລະ ບໍ່ອະນຸຍາດໃຫ້ນໍາໃຊ້ສັດນໍ້າປະເພດດັ່ງກ່າວເວັ້ນເສຍແຕ່ໄດ້ຮັບອະນຸຍາດຈາກລັດຖະບານ); ສັດນໍ້າປະເພດ ຄຸ້ມຄອງບັນຊີ 2 ມີ ປາເຄິງ, ປາຊວາຍ, ປາເອິນຂາວ, ປາຄູນ, ປາແດງ, ປານາງແດງ,ປາໝາກຫວາຍ, ປາກະໂຫ ແລະ ປາຝາອອງ (ປະເພດຄຸ້ມຄອງ ຕ້ອງໄດ້ຮັບການອະນຸລັກ, ປົກປັກຮັກສາ, ພັດທະນາ, ຄວບຄຸມ ແລະ ກວດກາການນໍາໃຊ້ສັດປະເພດດັ່ງກ່າວຕາມລະບຽບກົດໝາຍ); ສັດນໍ້າປະເພດທົ່ວໄປບັນ ຊີ 3 ມີ ປາແຂ້, ປານາງເງິນ, ປາຕອງກາຍ, ປາຕອງນາ, ປາໂດ, ປາຈາດ, ປາໂຈກ, ປາວຽນໄຟ, ປາ ປາກຄຳ, ປາເກາະ, ປາກົດໝໍ້, ປາປຶ່ງ, ປາບູ່, ປາພອນ, ປາແກງ, ກຸ້ງ ທຸກຊະນິດ, ກະປູແດງ, ຫອຍທຸກຊະນິດ (ປະເພດທົ່ວໄປ ຕ້ອງໄດ້ຮັບການປົກປັກຮັກສາ, ພັດທະນາ ແລະ ອະນຸຍາດໃຫ້ນໍາໃຊ້ໂດຍຖືກຕ້ອງຕາມລະບຽບກົດໝາຍເພື່ອຮັບປະກັນບໍ່ໃຫ້ສູນພັນພ້ອມທັງມີຜົນກະທົບຕໍ່ສິ່ງແວດລ້ອມ ແລະ ລະ ບົບນິເວດ).

ການຄຸ້ມຄອງສັດນໍ້າ-ສັດປ່າ ຫລື ບັນຫາໃດກໍດີ, ນອກຈາກການໂຄສະນາເຜີຍແຜ່ລະບຽບກົດໝາຍ ຫລື ນິຕິກຳຕ່າງໆໃຫ້ທົ່ວປວງຊົນລາ ຮັບຮູ້ຢ່າງທົ່ວເຖິງເປັນປົກກະຕິ, ຫລຳໄປຫລໍາມາແລ້ວນັ້ນ, ຂອດການຕິດ ຕາມກວດກາກໍສຳຄັນຫລາຍ.
ເຖິງວ່າພວກເຮົາມີລະບຽບກົດໝາຍ ເພື່ອໃຫ້ປະຕິບັດ, ແຕ່ຖ້າຂອດກວດກາຍັງບໍ່ໄດ້ດີ ການປະຕິບັດກົດໝາຍ ກໍບໍ່ໄດ້ຜົນເທົ່າທີ່ຄວນ. ພ້ອມກັນນີ້ພວກເຮົາກໍຕ້ອງໄດ້ພ້ອມກັນປັບປຸງແນວຄິດ-ຄວາມເຊື່ອຂອງການກິນ (ກິນປາຊະນິດນີ້ດີ, ສັດປ່າຊະນິດນີ້ດີຕໍ່…), ເປັນແບບຢ່າງໃຫ້ຄົນຮຸ່ນໜຸ່ມລຸນຫລັງ ເຫັນວ່າພວກເຮົາໄດ້ປະກອບສ່ວນອະນຸລັກ, ປົກປັກຮັກສາ, ຄຸ້ມຄອງ, ພັດທະນາ, ກວດກາສັດນໍ້າ-ສັດປ່າແທ້ ເພື່ອໃຫ້ທຳມະຊາດຍືນຍົງ.