ຣັດເຊຍ-ອູແກຣນ ລົງນາມຂໍ້ຕົກລົງ ເປີດທາງສົ່ງອອກທັນຍາພືດໃນທະເລດຳ ຫລຸດຜ່ອນວິກິດອາຫານໂລກ

ຣັດເຊຍ-ອູແກຣນ ຮ່ວມກັນລົງນາມຂໍ້ຕົກລົງປະຫວັດສາດ ເປີດເສັ້ນທາງສົ່ງອອກທັນຍາພືດໃນທະເລດຳ ປົດລັອກວິກິດອາຫານໂລກ.

ການລົງນາມຂໍ້ຕົກລົງສົ່ງອອກທັນຍາພືດຄັ້ງສຳຄັນນີ້ມີຂຶ້ນ ຫລັງຈາກຣັດເຊຍ ແລະ ອູແກຣນ ບັນລຸຂໍ້ຕົກລົງຮ່ວມກັນໃນການດຳເນີນງານເພື່ອເປີດເສັ້ນທາງສົ່ງອອກທັນຍາພືດຂອງອູແກຣນທີ່ຕົກຄ້າງຢູ່ບໍລິເວນທ່າເຮືອທະເລດຳ ຕາມການຊ່ວຍໜູນຂອງອົງການສະຫະປະຊາຊາດ (UN) ໂດຍພິທີລົງນາມໄດ້ຈັດຂຶ້ນຢູ່ພະລາດຊະວັງໂດລມາບາເຊ ໃນນະຄອນອິສຕັນບູລຂອງຕວກກີ.

ທັງນີ້, ຂໍ້ຕົກລົງສົ່ງອອກທັນຍາພືດສະບັບນີ້ຈະມາຊ່ວຍຟື້ນຟູການສົ່ງອອກທັນຍາພືດຈາກອູແກຣນ ແລະ ຣັດເຊຍ ເຊິ່ງເປັນຜູ້ສົ່ງອອກເມັດເຂົ້າສາລີ, ເຂົ້າໂພດ, ນ້ຳມັນພືດ ແລະ ປຸ໋ຍລາຍໃຫຍ່ຂອງໂລກ ເຊິ່ງຈະຊ່ວຍຫລຸດຜ່ອນບັນຫາຕ່ອງໂສ້ອຸປະທານອາຫານທົ່ວໂລກ ໂດຍຈະເປີດທາງໃຫ້ມີການລະບາຍທັນຍາພືດຂອງອູແກຣນຈຳນວນ 20 ລ້ານກວ່າໂຕນທີ່ຍັງຕົກຄ້າງຢູ່ທ່າເຮືອໃນທະເລດຳມາແຕ່ຣັດເຊຍເລີ່ມບຸກອູແກຣນໃນທ້າຍເດືອນກຸມພາຜ່ານມາ.

ພາຍໃຕ້ຂໍ້ຕົກລົງດັ່ງກ່າວ ຣັດເຊຍໄດ້ໃຫ້ຄຳໝັ້ນວ່າຈະບໍ່ໂຈມຕີເຮືອຂົນສົ່ງສິນຄ້າຂອງອູແກຣນໃນທະເລດຳ ໂດຍເຮືອສິນຄ້າທີ່ອອກຈາກທ່າເຮືອອູແກຣນທຸກລຳຈະຕ້ອງຖືກກວດສອບຢູ່ທ່າເຮືອຕວກກີເພື່ອຫລຸດຜ່ອນຄວາມກັງວົນຂອງຣັດເຊຍເລື່ອງການລັກລອບຂົນສົ່ງອາວຸດຂອງອູແກຣນ ກ່ອນຈະຂີ່ຜ່ານຊ່ອງແຄບບອສພໍຣັສຂອງຕວກກີເພື່ອໄປປະເທດຕ່າງໆ.

ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ ກ່າວວ່າ: ຂໍ້ຕົກລົງສົ່ງອອກທັນຍາພືດສະບັບນີ້ຈະຊ່ວຍເປີດທາງໃຫ້ການຂົນສົ່ງອາຫານທາງການຄ້າຈຳນວນຫລາຍຈາກທ່າເຮືອສຳຄັນ 3 ແຫ່ງຂອງອູແກຣນ ໄດ້ແກ່ ໂອເດສຊາ, ເຊີໂນວໍສ ແລະ ຢຸຊນີ ໂດຍອົງການສະຫະປະຊາຊາດຈະຈັດຕັ້ງສູນປະສານງານເພື່ອຕິດຕາມການດຳເນີນງານຕາມຂໍ້ຕົກລົງຕໍ່ໄປ.

ອ້າງອີງ:

https://www.reuters.com/…/ukraines-ports-reopen-under…/

https://edition.cnn.com/…/russia-ukraine-war…/index.html

https://www.straitstimes.com/…/ukraine-russia-ink-deal…