ຫັດແອບຝຶກຊ້ອມກອບກູ້ໄພພິບັດ ລາວ-ຈີນ

ວັນທີ 22 ກໍລະກົດ 2022 ນີ້, ສະຫາຍພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ,ຫົວໜ້າຊີ້ນໍາລວມບັ້ນຫັດແອບ, ຝຶກຊ້ອມກອບກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດສຸກເສີນ ແລະ ກິດຈະກໍາບໍລິການດ້ານການແພດ (ຂະບວນລົດໄຟສັນ ຕິພາບ ປີ 2022) ລະຫວ່າງກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ໄດ້ລົງຊີ້ນໍາ, ບັນດາອະນຸກໍາມະການດ້ານຕ່າງໆໃນບັ້ນຫັດແອບ, ຝຶກຊ້ອມກອບກູ້ໄພພິບັດລາວ – ຈີນ ຢູ່ທີ່ໂຮງໝໍພາກສະໜາມ ບ້ານນໍ້າລິນ ເມືອງໂພນໂຮງ ແຂວງວຽງຈັນ ເຊິ່ງມີບັນດາຄະນະຊີ້ນໍາລວມ, ອະນຸກໍາມະການໃນດ້ານຕ່າງໆ ທີ່ກ່ຽວຂ້ອງເຂົ້າຮ່ວມ.

ໂອກາດນີ້, ສະຫາຍພົນຕີ ຄໍາເພັດ ສີຊານົນ ໄດ້ຮຽກຮ້ອງໃຫ້ຄະນະຊີ້ນຳ ແລະ ອະ ນຸກໍາມະການດ້ານຕ່າງໆແຕ່ລະພາກສ່ວນຈົ່ງພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ເຂົ້າໃນການຮັບ ປະກັນໃຫ້ການເຄື່ອນໄຫວຈັດຕັ້ງປະຕິ ບັດແຕ່ລະບາດກ້າວ ຂອງແຜນການຫັດແອບ, ຝຶກຊ້ອມໃນຄັ້ງນີ້ຢ່າງເຂັ້ມງວດ ແລະ ເນັ້ນໜັກໃຫ້ເອົາໃຈໃສ່ກະກຽມຄວາມພ້ອມທາງດ້ານສະຖານທີ່ ພິທີການເປີດ-ປິດ ແລະ ພ້ອມກັນຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ແນໃສ່ເຮັດໃຫ້ການຫັດແອບ, ຝຶກຊ້ອມໃນຄັ້ງນີ້ມີຄວາມສຳເລັດ ແລະ ຮັບປະກັນຄວາມປອດໄພ 100%.

ໃນຕອນທ້າຍ ສະຫາຍພົນຕີ ຄໍາເພັດ ສີຊານົນ ຍັງໄດ້ໂອ້ລົມປຸກລະດົມແນວຄິດຈິດໃຈ ຂອງພະນັກງານ – ແພດໝໍ ແລະ ກໍາລັງນັກສະແດງຈໍາລອງເຫດການໄພ ພິບັດ ໃຫ້ພ້ອມກັນບຸກບືນຫ້າວຫັນ, ສຸມກໍາລັງແຮງກາຍ, ແຮງໃຈເຂົ້າໃນການຫັດແອບ, ຝຶກຊ້ອມ ຮ່ວມກັບຄະນະຊ່ຽວ ຊານແພດ ກອງທັບປົດປ່ອຍປະ ຊາຊົນຈີນ ໃຫ້ສໍາເລັດ ແລະ ໄດ້ຮັບໝາກຜົນສູງຕາມແຜນການຂອງຂັ້ນເທິງວາງໄວ້.