ຍີ່ປຸ່ນພົບຜູ້ຕິດເຊື້ອໂຄວິດ-19 ເກືອບ 200.000 ຄົນໃນວັນດຽວ ສ້າງສະຖິຕິໃໝ່ເປັນວັນທີ 3 ຕິດຕໍ່ກັນ
ຍີ່ປຸ່ນຕິດໂຄວິດວັນດຽວເຖິງ 190.000 ຄົນ ສ້າງສະຖິຕິສູງສຸດເປັນປະຫວັດສາດຕໍ່ເນື່ອງເປັນວັນທີ 3 ທ່າມກາງການແພ່ລະບາດຂອງໄວຣັສໂອມິຄຣອນ ສາຍພັນຍ່ອຍ BA.5.
ກະຊວງສາທາລະນະສຸກຍີ່ປຸ່ນເປີດເຜີຍວ່າ: ໃນຮອບ 24 ຊົ່ວໂມງຜ່ານມາ ໄດ້ຮັບລາຍງານພົບຜູ້ຕິດເຊື້ອໂຄວິດ-19 ໃໝ່ຈຳນວນ 195.161 ຄົນ ເຊິ່ງເປັນຕົວເລກສູງສຸດເປັນປະຫວັດສາດອີກເປັນວັນທີ 3 ຕິດຕໍ່ກັນໃນວັນທີ 22 ກໍລະກົດ ຫລັງຈາກວັນທີ 21 ກໍລະກົດ ພົບຜູ້ຕິດເຊື້ອເພີ່ມຂຶ້ນ 186.246 ຄົນ.
ຂະນະດຽວກັນ, ໃນບັນດາຈຳນວນຜູ້ຕິດເຊື້ອທີ່ມີການລາຍງານ ພົບວ່າມີ 35 ແຂວງຈາກ 47 ແຂວງທົ່ວປະເທດທີ່ມີຈຳນວນຜູ້ຕິດເຊື້ອສູງສຸດສ້າງສະຖິຕິ ໂດຍນະຄອນຫລວງໂຕກຽວພົບຜູ້ຕິດເຊື້ອໂຄວິດ-19 ຈຳນວນ 23.995 ຄົນ ສ້າງສະຖິຕິຈຳນວນຜູ້ຕິດເຊື້ອທີ່ພົບໃນວັນດຽວສູງສຸດເປັນວັນທີ 2 ຫລັງຈາກວັນທີ 21 ກໍລະກົດ ພົບຜູ້ຕິດເຊື້ອໃໝ່ຈຳນວນ 31.878 ຄົນ ເຊິ່ງສູງກວ່າລະດັບສູງສຸດຂອງວັນທີ 2 ກຸມພາ ທີ່ມີຈຳນວນຜູ້ຕິດເຊື້ອ 21.562 ຄົນ.
ການເພີ່ມຂຶ້ນຂອງຈຳນວນຜູ້ຕິດເຊື້ອໂຄວິດ-19 ເກີດຂຶ້ນໃນຂະນະທີ່ຍີ່ປຸ່ນກຳລັງຜະເຊີນການແພ່ລະບາດຮອບທີ 7 ຈາກໄວຣັສໂອມິຄຣອນ ສາຍພັນຍ່ອຍ BA.5 ເຊິ່ງແພ່ກະຈາຍເຊື້ອຢ່າງວ່ອງໄວ ແລະ ຫລົບຫລີກພູມຕານທານໄດ້ດີກວ່າສາຍພັນກ່ອນໆ ສົ່ງຜົນໃຫ້ຈຳນວນຜູ້ຕິດເຊື້ອເພີ່ມຂຶ້ນມາແຕ່ທ້າຍເດືອນມິຖຸນາຜ່ານມາ.
ນາຍົກລັດຖະມົນຕີ ຟູມິໂອະ ຄິຊິດະ ໄດ້ອອກມາເຕືອນໃຫ້ປະຊາຊົນເຝົ້າລະຫວັງສະຖານະການຂັ້ນສູງສຸດ, ແຕ່ຍັງບໍ່ມີການພິຈາລະນາມາດຕະການຄວບຄຸມການລະບາດເພີ່ມຕື່ມ ເນື່ອງຈາກເຫັນວ່າລະບົບສາທາລະນະສຸກຂອງປະເທດຍັງຮັບມືໄດ້ດີ ແລະ ຕ້ອງການຈະຮັກສາສົມດູນຂອງກິດຈະກຳທາງສັງຄົມ ແລະ ເສດຖະກິເອົາໄວ້.
ອ້າງອີງ:
https://english.kyodonews.net/…/76d575608c08-breaking…
https://japantoday.com/…/tokyo-reports-34995…
https://www3.nhk.or.jp/nhkworld/en/news/tags/82/
