ການສໍ້ລາດບັງຫລວງ ເກີດຈາກຄົນບາງກຸ່ມ ແຕ່ເດືອດຮ້ອນກັນຖ້ວນໜ້າ

ໂດຍ: ທິດກໍ່າ

ຫາກຕັ້ງໂຈດກັນວ່າ: ບັນຫາການສໍ້ລາດບັງຫລວງຢູ່ວົງການສັງຄົມລາວທີ່ຍັງເປັນພະຍາດຊຳເຮື້ອຕິດແປດມາຮອດທຸກວັນນີ້ມັນມີຕົ້ນເຫດມາຈາກບາງສະຫາຍ, ບາງຄົນ ແລະ ບາງກຸ່ມຄົນທີ່ສັງກັດຢູ່ໃນບາງກົມກອງທ້ອງຖິ່ນ ນັບແຕ່ຂັ້ນສູນກາງລົງຮອດທ້ອງຖິ່ນ. ໃນບາງບຸກຄົນ ແລະ ກຸ່ມຄົນທີ່ໄດ້ກ່າວມານີ້ ຕົວຈິງມັນກໍນອນຢູ່ໃນອົງຄະນະພັກ, ເປັນສະມາຊິກພັກພະນັກງານຫລັກແຫລ່ງການນຳພາຜູ້ທີ່ມີຖານະຕຳແໜ່ງ, ມີສິດອຳນາດໃນກົມກອງນັ້ນໆເປັນຜູ້ພາເຮັດພາທຳ ຫາກບໍ່ແມ່ນພະນັກງານທົ່ວໄປແຕ່ປະການໃດ ຫລື ຖ້າແມ່ນພວກເຂົາເຮັດກໍຕ້ອງໄດ້ຮັບຄຳສັ່ງຊີ້ນຳບັນຊາການຈາກຫົວໜ້າໃນຮູບການສໍ້ລາດບັງຫລວງ ແບບນີ້ເຂົາເອີ້ນວ່າ: ພ້ອມກັນໂກງກິນແບບທີມງານເປັນໝູ່ຄະນະ ຫລືວ່າ ເປັນກຸ່ມກ້ອນ ເຊິ່ງຍາກທີ່ຈະແກ້ໄຂໄດ້ໃນມື້ໜຶ່ງຍາມດຽວ.

ເພາະສະນັ້ນ, ເຮົາຈຶ່ງເຫັນວ່າໃນກອງປະຊຸມສະພາແຕ່ລະຄັ້ງ ບໍ່ວ່າຢູ່ຂັ້ນສູນກາງ ແລະ ທ້ອງຖິ່ນ ເຮົາເຄີຍໄດ້ເຫັນ ແລະ ຮັບຮູ້ຂ່າວຄາວທີ່ເວົ້າເຖິງຜົນເສຍຫາຍຈຳນວນຫລວງຫລາຍຈາກການສໍ້ລາດບັງຫລວງ. ຕົວຢ່າງ: ໃນກອງປະຊຸມສະໄໝສາມັນເທື່ອທີສອງຂອງສະພາແຫ່ງຊາດແຂວງສະຫວັນນະເຂດ ທີ່ໄດ້ຈັດຂຶ້ນໃນວັນທີ 13 ມັງກອນ 2022 ຜ່ານມາ, ທາງອົງການກວດສອບປະຈຳພາກກາງ ແລະ ອົງການກວດກາລັດແຂວງ ໄດ້ພົບເຫັນພະນັກງານສໍ້ລາດບັງຫລວງ 9 ເປົ້າໝາຍ ມີຜົນເສຍຫາຍເຖິງ 34 ຕື້ກີບ, 2 ລ້ານບາດ ແລະ 1 ແສນກວ່າໂດລາສະຫະລັດ. ນີ້ແມ່ນສະເພາະແຕ່ແຂວງດຽວ ແລະ ອາດຍັງມີແຂວງໃນທົ່ວປະເທດທີ່ຕົກຢູ່ໃນສະພາບແບບນີ້.

ນອກຈາກນີ້ແລ້ວ, ໃນກອງປະຊຸມສະພາແຫ່ງຊາດສະໄໝສາມັນແຕ່ລະຄັ້ງ ແຕ່ກໍມີລັກສະນະນີ້ເໝືອນກັນ. ສະຫລຸບແລ້ວ ການສໍ້ລາດບັງຫລວງຢູ່ໃນສັງຄົມເຮົາຍັງເປັນພະຍາດຊຳເຮື້ອມີມາຢູ່ເປັນປະຈຳ ໂດຍບໍ່ຮູ້ວ່າເວລາໃດ, ວັນເດືອນປີໃດ ມັນຈະຫາຍສາບສູນໄປຈາກປະເທດລາວ ສັງຄົມລາວ.

ເຖິງຢ່າງໃດກໍດີ, ໃນໂອກາດພວກເຮົາພວມປະຕິບັດພາລະກິດ 2 ວາລະແຫ່ງຊາດໃນໄລຍະປີເຄິ່ງນີ້ ຄົງຈະເຫັນໝາກຜົນອອກມາໃຫ້ເຫັນຢ່າງເປັນຮູບປະທຳ ໂດຍສະເພາະການປະຕິບັດວາລະແຫ່ງຊາດທາງດ້ານເສດຖະກິດ-ການເງິນ ເພາະບັນຫາການສໍ້ລາດບັງຫລວງໃນຖັນແຖວອົງກອນຂອງລັດແມ່ນໜຶ່ງໃນບັນຫາກົດໜ່ວງບາດກ້າວເດີນຂອງປະເທດຊາດ.