ທາງການໄທ ເລັ່ງຕາມຫາຕົວຜູ້ຕິດເຊື້ອ ໝາກສຸກລີງ ຄົນທຳອິດ ໜີອອກຈາກໂຮງໝໍ

ວັນທີ 22 ກໍລະກົດ 2022 ເພຈຂ່າວເລື່ອງເລົ່າເຊົ້ານີ້ ຂອງໄທ ໄດ້ລາຍງານຂ່າວວ່າ: ທ່ານ ອະນຸທິນ ຊານວິຣະກຸນ ຮອງນາຍົກລັດຖະມົນຕີ, ລັດຖະມົນຕີກະຊວງສາທາລະນະສຸກຂອງໄທ ກ່າວວ່າ: ໄດ້ຮັບລາຍງານກໍລະນີຊາວໄນຈີເລຍ ທີ່ຕິດເຊື້ອໝາກສຸກລີງ ເຂົ້າປິ່ນປົວຢູ່ໂຮງໝໍແຂວງພູເກັດ ໄດ້ໜີອອກຈາກໂຮງໝໍແລ້ວ ຂະນະນີ້ ຕຳຫລວດພວມຕິດຕາມຊອກຫາຢູ່.

ທ່ານ ອະນຸທິນ ຊານວິຣະກຸນ ກ່າວຕື່ມວ່າ: ກຳລັງເລັ່ງຕິດຕາມຊອກຫາມາໃຫ້ໄດ້ ແລະ ຈະຂຶ້ນຮູບຕາມຫາທົ່ວປະເທດ ໂດຍຈະລົງໂທດຕາມກົດໝາຍທຸກຢ່າງທີ່ມີລວມທັງ ພຣບ ພະຍາດຕິດຕໍ່. ຂະນະດຽວກັນອາດຈະເນລະເທດອອກຈາກປະເທດໄທ.

ສ່ວນການວາງແຜນປ້ອງກັນການແພ່ເຊື້ອຈາກຜູ້ຕິດເຊື້ອຄົນດັ່ງກ່າວນັ້ນ, ທ່ານ ອະນຸທິນ ກ່າວວ່າ: ຈາກຂໍ້ມູນຂອງຫົວໜ້າກົມຄວບຄຸມພະຍາດ ໄດ້ລາຍງານຕອນເຊົ້າມື້ນີ້ ຮູ້ວ່າໄດ້ຕິດຕາມຄົນສຳພັດໃກ້ຊິດຜູ້ຕິດ ເຊື້ອຄົນດັ່ງກ່າວມາກັກຕົວ ແລະ ກວດກາແລ້ວບໍ່ພົບການຕິດເຊື້ອ ແລະ ຢ້ຳວ່າຕາມທີ່ຫົວໜ້າກົມຄວບຄຸມ ພະຍາດລະບຸວ່າບໍ່ໄດ້ຕິດຕໍ່ກັນງ່າຍໆ ແຕ່ຈະຕ້ອງເຝົ້າລະວັງ.