ປະທານາທິບໍດີສີລັງກາ ແຕ່ງຕັ້ງນາຍົກລັດຖະມົນຕີຄົນໃໝ່ແລ້ວ

ວັນທີ 22 ກໍລະກົດ 2022, ປະທານາທິບໍດີ ຣານິລ ວິກຳສິງເຫ ຂອງສີລັງກາ ແຕ່ງຕັ້ງທ່ານ ດິເນຊ ກຸນາວາເດນາ (Dinesh Gunawardena) ລັດຖະມົນຕີທີ່ເຄີຍດຳລົງຕຳແໜ່ງມາແລ້ວຫລາຍກະຊວງ ໂດຍສະເພາະລັດຖະມົນຕີກະຊວງການຕ່າງປະເທດ ແລະ ລັດຖະມົນຕີສຶກສາທິການ ໃຫ້ຂຶ້ນດຳລົງຕຳແໜ່ງນາຍົກລັດຖະມົນຕີຄົນໃໝ່ຂອງສີລັງກາ ເຊິ່ງໃນຂະນະນີ້ຄວບລວມຕຳແໜ່ງລັດຖະມົນຕີບໍລິຫານລັດຖະກິດອີກໜຶ່ງຕຳແໜ່ງ.

ໂດຍທ່ານ ດິເນຊ ເປັນຜູ້ນຳພັກຝ່າຍຊ້າຍຂອງສີລັງກາ ຄືພັກ MEP ຫລື People’s United Front ເຊິ່ງໄດ້ຮັບການແຕ່ງຕັ້ງໃຫ້ດຳລົງຕຳແໜ່ງນາຍົກລັດຖະມົນຕີຄົນທີ 15 ຂອງສີລັງກາ ທ່າມກາງສະຖານະການບ້ານເມືອງຜະເຊີນວິກິດຮອບດ້ານ ຫລັງຈາກໄລຍະເວລາທີ່ຕະກູນຣາຊປັກສາຄອບງຳອຳນາດນຳໃນເກມການເມືອງຂອງສີລັງກາມາເກືອບ 2 ທົດສະຫວັດໄດ້ສິ້ນສຸດລົງ.

ຫລາຍຝ່າຍຫວັງວ່າ: ທັງປະທານາທິບໍດີ ແລະ ນາຍົກລັດຖະມົນຕີຄົນໃໝ່ຂອງສີລັງກາຈະມີບົດບາດ ແລະ ຄວາມສາມາດຢ່າງຫລວງຫລາຍໃນການຊ່ວຍໃຫ້ສີລັງກາຫລຸດພົ້ນວິກິດຄັ້ງໃຫຍ່ຮຸນແຮງທີ່ສຸດ ນັບແຕ່ປະກາດເອກະລາດຈາກອັງກິດ ໃນປີ 1948 ໂດຍຕັ້ງເປົ້າແກ້ໄຂວິກິດ ແລະ ຟື້ນຟູສະຖຽນລະພາບທາງການເມືອງຂອງປະເທດອີກເທື່ອໜຶ່ງ, ພ້ອມກັບມາເດີນໜ້າເຈລະຈາກັບກອງທຶນການເງິນສາກົນ (IMF) ເພື່ອນຳພາສີລັງກາກ້າວຜ່ານວິກິດໃຫຍ່ຄັ້ງນີ້ໃຫ້ໄດ້.