ປະທານາທິບໍດີ ອີຕາລີ ສັ່ງຍຸບສະພາ ເພື່ອເປີດທາງໃຫ້ມີການເລືອກຕັ້ງໃໝ່

ປະທານາທິບໍດີ ອີຕາລີ ທ່ານ Sergio Mattarella ປະກາດມື້ວັນທີ 21 ກໍລະກົດ 2022 ນີ້ວ່າ: “ຕົນເອງໄດ້ອອກຄຳສັ່ງໃຫ້ຍຸບສະພາແລ້ວ ເພື່ອເປີດທາງໃຫ້ມີການເລືອກຕັ້ງໃໝ່ພາຍໃນ 70 ວັນຕາມລັດຖະທຳມະນູນກຳນົດ, ພາຍຫລັງນາຍົກລັດຖະມົນຕີ Mario Draghi ລາອອກຈາກຕຳແໜ່ງ”.

ແຫລ່ງຂ່າວຈາກລັດຖະບານ ອີຕາລີ ໃຫ້ຮູ້ຕື່ມວ່າ: ການເລືອກຕັ້ງຈະມີຂຶ້ນໃນວັນທີ 25 ກັນຍາທີ່ຈະມາເຖິງ. ທ່ານ Draghi ຍັງຈະຮັກສາການນາຍົກລັດຖະມົນຕີຕໍ່ໄປຈົນມີການເລືອກຕັ້ງສຳເລັດ.

ລັດຖະບານ ອີຕາລີ ເລີ່ມມີການແຕກຫັກໃນວັນທີ 20 ກໍລະກົດນີ້, ໃນຂະນະທີ່ 3 ພັກຮ່ວມລັດຖະບານ(ພັກ Forza Italia ຂອງທ່ານ Silvio Berlusconi, ພັກຮ່ວມສຳພັນຂອງ Matteo Salvini ແລະ ພັກ ຈະບວນການ 5 ດາວ(M5S) ຂອງ Giuseppe Conte ທີ່ບໍ່ຍອມລົງຄະແນນສຽງໄວ້ວາງໃຈລັດຖະບານ. ວັນທີ 15 ກໍລະກົດຜ່ານມາ ນາຍົກລັດຖະມົນຕີ Draghi ໄດ້ຍື່ນໃບລາອອກຕໍ່ປະທານາທິບໍດີ Matterella.