U19 ສ້າງປະຫວັດສາດໜ້າໃໝ່ໃຫ້ວົງການກິລາບານເຕະລາວ

ໂດຍ: ທິດກໍ່າ

ນັບແຕ່ຄະນະຮັບຜິດຊອບ ແລະ ບັນດານັກກິລາໄດ້ເຂົ້າຮ່ວມແຂ່ງຂັນໃນລາຍການເຕະບານຊາຍຊີງແຊ້ມອາຊຽນຮຸ້ນອາຍຸບໍ່ເກີນ 19 ປີ ທີ່ປະເທດອິນໂດເນເຊຍເປັນເຈົ້າພາບ ປະຈຳປີ 2022 (AFF U-19 CHAMPIONSHIP 2022) ໂດຍເລີ່ມແຂ່ງມາແຕ່ວັນທີ 3 ກໍລະກົດ 2022 ນັດທຳອິດກໍຊະນະ ຕີມໍເລສເຕ 2 ປະຕູຕໍ່ 0, ຊະນະ ກຳປູເຈຍ 2-1, ຊະນະ ສິງກະໂປ 3-1, ຊະນະ ມາເລເຊຍ 1-0 ແລະ ຊະນະ ໄທ 2 ຕໍ່ 0 ໃນຮອບຮອງຊະນະເລີດຈົນໄດ້ເຂົ້າໄປຊີງຊະນະເລີດກັບມາເລເຊຍໃນວັນທີ 13 ກໍລະກົດ 2022 ຜ່ານມາ, ແຕ່ກໍໜ້າເສຍດາຍເສຍໃຫ້ມາເລເຊຍ 2-0. ສະຫລຸບຜົນການແຂ່ງຂັນ ລາວ ຊະນະລວດ 5 ນັດ ແລະ ເສຍພຽງ 1 ນັດ ໄດ້ເປັນຮອງແຊ້ມໃນລາຍການເຕະບານຊີງແຊ້ມອາຊຽນຮຸ້ນອາຍຸບໍ່ເກີນ 19 ປີ ຢ່າງຍິ່ງໃຫຍ່ ແລະ ໄດ້ຮັບຜົນສຳເລັດເກີນຄາດ.

ແນວໃດກໍດີ, ເຖິງວ່າລາວເຮົາບໍ່ໄດ້ແຊ້ມ ແຕ່ກໍໄດ້ໃຈຄົນລາວທົ່ວປະເທດ ເພາະວ່າຕະຫລອດໄລຍະການແຂ່ງຂັນຢູ-19 ຂອງລາວເຮົສາມາດຍາດເອົາໄຊຊະນະລວດເຖິງ 5 ທີມທີ່ເປັນຕົວເຕັງໃນອາຊຽນ ກາຍເປັນທີໜຶ່ງຂອງກຸ່ມບີ (GROUP B) ແລະ ສາມາດໄດ້ໄປຊີງຊະນະເລີດໃນລາຍການເຕະບານຄັ້ງນີ້ຢ່າງຍິ່ງໃຫຍ່ປຽບເໝືອນໄດ້ສ້າງປະຫວັດສາດແຫ່ງໄຊຊະນະອັນໃໝ່ໃຫ້ວົງການກິລາບານເຕະລາວຫວນມາຄຶກຄັກອີກຄັ້ງ ແລະ ເປັນໜ້າພາກພູມໃຈຂອງປະຊາຊົນບັນດາເຜົ່າທີ່ຢູ່ພາຍໃນ ແລະ ຕ່າງປະເທດ.

ພິເສດສຸດໆ ທີມບານເຕະ U19 ຂອງລາວເຮົາຍັງສາມາດລົ້ມຊ້າງທີ່ເຄີຍມີຊື່ສຽງ ແລະ ເປັນເຕັງໜຶ່ງໃນຊາດອາຊຽນ ຄືທີມຢູ-19 ຂອງໄທໄດ້ຢ່າງສຽບຂາດເຖິງ 2 ປະຕູຕໍ່ 0. ການທີ່ສາມາດຊະນະທີມຊາດຢູ-19 ຂອງໄທເປັນການເຕືອນໃຫ້ຊາວລາວ ແລະ ຊາວໄທຮູ້ວ່າ ມາຮອດປັດຈຸບັນລາວເຮົາກໍສາມາດລົບຄຳເຢີ້ຍຫຍັນນິນທາດູຖູກຂອງພວກເຫັນແກ່ຕົວຈຳນວນໜຶ່ງໃນວົງການບານເຕະຂອງໄທ ແລະ ຄົນໄທທີ່ມີແນວຄິດອະຄະຕິກັບຄົນລາວໂດຍລວມ ແລະ ໂດຍສະເພາະແມ່ນພວກສັນທັດໃນການວິເຄາະ, ວິຈານກິລາບານເຕະຂອງລາວຕະຫລອດມາ. ດັ່ງຄຳເວົ້າຂອງທ່ານ ປີຍະພົງ ຜິວອ່ອນ ທີ່ໄດ້ວິເຄາະກ່ອນລາວກັບໄທຈະລົງແຂ່ງຂັນຮອບຮອງຊະນະເລີດໃນວັນທີ 13 ກໍລະກົດ 2022 ວ່າ: ນັກກິລາລາວແຂ່ງກັບປະເທດໃດ, ທີມໃດໃນອາຊຽນກໍຫລິ້ນໄດ້ດີໝົດຍົກເວັ້ນແຂ່ງກັບໄທ ! ແຕ່ອະນິຈາວິເຄາະວະທະກຳບໍ່ພໍເທົ່າໃດຊົ່ວໂມງຜົນອອກມາ ຢູ-19 ຂອງລາວກໍສາມາດເອົາຊະນະທີມຊາດຂອງໄທໄດ້ເຖິງ 2 ປະຕູຕໍ່ 0. ນີ້ກໍສະແດງໃຫ້ເຫັນວ່າ ຄົນລາວ, ນັກເຕະລາວເຮົາກໍສາມາດເຮັດໄດ້ເໝືອນດັ່ງປະເທດອື່ນໃນອາຊຽນ ກໍຄືຢູ່ໃນໂລກຂໍພຽງແຕ່ວ່າມີໂອກາດ ຫລື ບໍ່, ໃຫ້ໂອກາດ ຫລື ບໍ່, ມີການສົ່ງເສີມຢ່າງຈິງຈັງ ຫລື ບໍ່.

ການທີ່ ຢູ-19 ຂອງລາວເຮົາຍາດໄດ້ໄຊຊະນະມາໃນຄັ້ງນີ້ ມັນບໍ່ພຽງແຕ່ເປັນການສ້າງປະຫວັດສາດໜ້າໃໝ່ໃຫ້ວົງການກິລາບານເຕະລາວເຮົາໃຫ້ຫວນມາຄຶກຄັກອີກຄັ້ງ ແລະ ອີກປະການໜຶ່ງຍັງສ້າງກຽດ ແລະ ຊື່ສຽງມາໃຫ້ປະເທດຊາດ ກໍຄືປະຊາຊົນລາວທຸກທົ່ວໜ້າ.

ເພື່ອຕອບກັບຜົນງານທີມຊາດຢູ-19 ຂອງລາວເຮົາໃຫ້ຍິ່ງໃຫຍ່ ແລະ ສົມສັກສີ ໃນວັນທີ 17 ກໍລະກົດ 2022, ພັກ ແລະ ລັດຖະບານ ກໍຄືຂະແໜງການກ່ຽວຂ້ອງ ຕະຫລອດເຖິງຜູ້ໃຫ້ການສະໜັບສະໜູນ, ກອງຊົມກອງເຊຍ, ຍາດຕິພີ່ນ້ອງ ໄດ້ພາກັນຕ້ອນຮັບຂັບສູ່ໃນການກັບມາຂອງທີມຊາດ U19 ຢ່າງສົມກຽດ ແລະ ມີຫລາຍຫ້າງຮ້ານ ນັບທັງບຸກຄົນ, ນິຕິບຸກຄົນ, ການຈັດຕັ້ງສະຫະພັນບານເຕະແຫ່ງຊາດລາວກໍໄດ້ໃຫ້ການອຸປະຖຳຄ້ຳຊູ, ຊຸກຍູ້ສົ່ງເສີມເພື່ອຕອບສະໜອງຜົນງານ ທັງເປັນຂວັນກຳລັງໃຈເປັນເງິນຫລາຍຕື້ກີບ.

ຂໍຊົມເຊີຍຜົນງານ U19 ທີ່ໄດ້ສ້າງປະຫວັດສາດໜ້າໃໝ່, ສ້າງຊື່ສຽງມາໃຫ້ປະເທດຊາດ ແລະ ປະຊາຊົນຢ່າງໃຫຍ່ຫລວງ. ຂໍໃຫ້ວົງການບານເຕະລາວພັດທະນາກ້າວໄປຢ່າງບໍ່ຢຸດຢັ້ງ.