Apple ກຽມຫລຸດການຈ້າງງານ ບາງໜ່ວຍງານໃນປີ 2023 ຮັບມືກັບເສດຖະກິດຕົກຕ່ຳ ແລະ ບັນຫາເງິນເຟີ້
ຕາມລາຍງານຈາກ: Global Economic Prospects ເມື່ອເດືອນ ມິຖຸນາທີ່ຜ່ານມາ ວ່າ: ຜົນການຄາດຄະເນການເຕີບໃຫ່ຍຂອງເສດຖະກິດໃນທົ່ວໂລກ ເສດຖະກິດໂລກຈະຫລຸດຕົວລົງ 5.7% ໃນປີ 2021 ເປັນ 2.9% ໃນປີນີ້ ສົ່ງຜົນກະທົບເຖິງຫລາຍໆພາກທຸລະກິດ ລວມເຖິງ apple ທີ່ເປັນບໍລິສັດທີ່ມີມູນຄ່າຫລາຍທີ່ສຸດໃນໂລກ.
ສຳນັກຂ່າວ Bloomberg ລາຍງານຫລ້າສຸດໃຫ້ຮູ້ວ່າ: apple ຢືນຢັນການຫລຸດຈ້າງງານ ແລະ ຫລຸດຄ່າໃຊ້ຈ່າຍຈະບໍ່ສົ່ງຜົນກະທົບຕໍ່ການເຮັດວຽກຂອງທຸກຝ່າຍ ແລະ ຍັງຄົງມີແຜນເປີດຕົວສິນຄ້າໃໝ່ໃນປີ 2023 ລວມເຖິງຊຸດຫູຟັງ ທີ່ເປັນໝວດໝູ່ໃໝ່ໃນລາຍການທຳອິດນັບແຕ່ປີ 2015.
ຍ້ອນກັບໄປເບິ່ງປະເດັນທາງດ້ານເສດຖະກິດ ຈະເຫັນວ່າໃນຊ່ວງເດືອນທີ່ຜ່ານມາ ທະນາຄານກາງສະຫະລັດ ສ້າງຄວາມວິຕົກກັງວົນໃຫ້ກັບຜູ້ຄົນ ຫລັງການຂຶ້ນອັດຕາດອກເບ້ຍເພື່ອຄວບຄຸມເງິນເຟີ້ຂຶ້ນສູງ ເຊິ່ງອາດເຮັດໃຫ້ເສດຖະກິດຕົກຕ່ຳ.
Kim forrest ຫົວໜ້າເຈົ້າໜ້າທີ່ການລົງທຶນຂອງ Bokeh Capital Partners ອະທິບາຍວ່າການເຄື່ອນໄຫວຂອງ apple ສະແດງໃຫ້ເຫັນເຖິງການຊ້າຕົວລົງໃນວົງກວ້າງ , ໃນການລົງທຶນໃນສິ່ງໃໝ່ ບໍລິສັດໃໝ່ ແລະ ຜະລິດຕະພັນໃໝ່ຈາກບັນຫາເງິນເຟີ້.
ຂໍ້ມູນຈາກ Canalys ປີ 2022 ສະແດງໃຫ້ເຫັນວ່າ ການຈັດສົ່ງໂທລະສັບມືຖືທົ່ວໂລກຫລຸດລົງເຖິງ 9% ໃນໄຕມາດ 2 ຂອງປີນີ້ ເມື່ອທຽບກັບຊ່ວງເດືອນດຽວກັນຂອງປີກ່ອນ, ເພາະຄວາມຕ້ອງການໂທລະສັບມືຖືເລີ່ມຫລຸດລົງຕາມພາວະເສດຖະກິດ ແລະ ຄວາມບໍ່ແນ່ນອນໃນແຕ່ລະພູມສັນຖານ, ດັ່ງນັ້ນ ແຮງກົດດັນດ້ານລາຄາເຮັດໃຫ້ເກີດຄວາມກັງວົນວ່າລູກຄ້າຈະຫລຸດການໃຊ້ຈ່າຍກັບກຸ່ມສິນຄ້າຟູມເຟືອຍເປັນຕົ້ນໂທລະສັບມືຖື.
ຢ່າງໃດກໍຕາມ, iphone ຂອງ apple ຍັງຄົງເປັນໂທລະສັບມືຖືທີ່ມີຍອດຂາຍຫລາຍທີ່ສຸດໃນໂລກ ຕາມຫລັງຜູ້ນຳ ໂດຍສະເພາະແມ່ນ Samsung ທີ່ຄອງອັນດັບໜຶ່ງດ້ວຍການແບ່ງສ່ວນການຕະຫລາດ 21% ສ່ວນ apple ມາເປັນອັນດັບທີສອງດ້ວຍສ່ວນແບ່ງ 17% ເພາະ iphone13 ຍັງຄົງເປັນສິນຄ້າທີ່ມີຄວາມຕ້ອງການສູງ
