ທົບທວນຄືນບັນດາໜ້າວຽກ ງານມະຫະກໍາກິລາແຫ່ງຊາດ ຄັ້ງທີ 11ທ້າຍປີ 2022 ໃຫ້ສຳເລັດຜົນຕາມເປົ້າໝາຍ

ວັນທີ 18 ກໍລະກົດ 2022 ນີ້ ຄະນະຮັບຜິດຊອບລະດັບຊາດ ຈັດກອງປະຊຸມຄັ້ງທີ 5 ເພື່ອທົບທວນຄືນບັນດາໜ້າວຽກໃນການຈັດງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໄດ້ຈັດຂຶ້ນໃນ ໂດຍການເປັນປະທານຂອງ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ປະທານຈັດງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ, ມີທ່ານ ນາງ ຂັນທະລີ ສິລິພົງພັນ ຮອງລັດຖະມົນຕີກະຊວງສຶກສາ ທິການ ແລະ ກິລາ, ມີພະແນກການ ແລະ ກົມກອງກ່ຽວຂ້ອງຈ​າກ​ກະ​ຊວງ​ສຶກ​ສາ, ແຂວງເຂົ້າຮ່ວມ.

ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ ໄດ້ລາຍງານການກະກຽມງານກິລາຜ່ານມາ ແລະ ການກະກຽມຄວາມພ້ອມ ເພື່ອສືບຕໍ່ເປັນເຈົ້າພາບຈັດງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນ​ເຈົ້າ​ພາບ ເປັນຕົ້ນດ້ານບຸກຄະລະກອນ, ພື້ນຖານໂຄງລ່າງຮັບໃຊ້ການແຂ່ງຂັນ-ຝຶກຊ້ອມ-ບ່ອນພັກເຊົາ ແລະ ໄລຍະຜ່ານມາໄດ້ຈັດກອງປະຊຸມຄະນະຮັບຜິດຊອບລະດັບຊາດ ງານມະຫະກຳກິລາແຫ່ງຊາດຄັ້ງທີ 11 ສໍາເລັດ 4 ຄັ້ງ, ກອງປະຊຸມວິສາມັນຂອງຄະນະຮັບຜິດຊອບລະດັບຊາດ 4 ຄັ້ງ, ຈັດກອງປະຊຸມປຶກສາຫາລືການສືບຕໍ່ກະກຽມຄວາມພ້ອມ ໃນການເປີດງານ ລະຫວ່າງຄະນະນຳຂອງກະຊວງສຶກສາທິການ ແລະ ກິລາ ຮ່ວມ​ກັບການນຳຂອງແຂວງຊຽງຂວາງ 1 ຄັ້ງ ແລະ ກອງປະຊຸມຂອງກຳມະການອື່ນໆຫຼາຍຄັ້ງ, ທາງດ້ານເນື້ອໃນ, ນິຕິກຳ, ເອກະສານຕ່າງໆຮັບໃຊ້ງານແມ່ນສຳເລັດ, ວຽກງານການຈັດຊື້-ຈັດຈ້າງ ແມ່ນໄດ້ດຳເນີນສຳເລັດຫຼາຍກິດຈະກຳເຊັ່ນ: ການຈັດຊື້ ແລະ ສະໜອງເຄື່ອງບ່ອນນອນໃຫ້ກັບຄູຝຶກ, ນັກກິລາ, ເຄື່ອງນຸ່ງຮັບໃຊ້ຄະນະຮັບຜິດຊອບຈັດງານ ແລະ ກໍາມະການຝ່າຍຕ່າງໆ, ການກະກຽມປະດັບປະດາພິທີເປີດ-ປິດ ແລະ ສະໜາມແຂ່ງຂັນກິລາປະເພດຕ່າງໆ, ການຈັດຊື້ຫຼຽນລາງວັນ, ສັດນຳໂຊກໂຕໃຫຍ່, ສັດນຳໂຊກນົກແອ່ນໂຕນ້ອຍຄູ່ກັບຫຼຽນ, ໂລ້ທີ່ລະນຶກ, ສາຍບັດຄ້ອງຄໍ, ຈັດຊື້ເຄື່ອງຄອມພີວເຕີ, ປິ່ນເຕີ, ຈັກກັອບປີ້ໃຫ້ແຕ່ລະກໍາມະການ, ການຈັດພິມຮ່າງໃບຍ້ອງຍໍ, ຮ່າງໃບກຽດຕິຄຸນ, ຈັດພິມໃບຢັ້ງຢືນ ຫຼຽນແຕ່ລະປະເພດ, ໄດ້ຂຶ້ນທະບຽນກຽມຈັດພິມບັດຄ້ອງຄໍ​ຂອງຄະນະຮັບຜິດຊອບຈັດງານ, ກຳມະການ ແລະ ອະນຸກຳມະການຝ່າຍຕ່າງໆ.

ພ້ອມນີ້ ທີ່ປະຊຸມຍັງໄດ້ຮັບຟັງການລາຍງານຈາກຄະນະຮັບຜິດຊອບ ແຕ່ລະດ້ານເປັນຕົ້ນແມ່ນ ຮູບແບບວິທີຈັດການແຂ່ງຂັນ, ການປັບປຸງຮູບແບບເນື້ອໃນຂອງພິທີເປີດ-ປິດ, ສັງລວມດ້ານການເງິນຮັບໃຊ້ງານມະຫະກໍາກິລາແຫ່ງຊາດຄັ້ງທີ 11, ການກະກຽມຄວາມພ້ອມດ້ານສະຖານທີ່ພັກເຊົາ ແລະ ການສະໜອງເຄື່ອງອຸປະໂພກ-ບໍລິໂພກ, ການຮັກສາສຸຂະພາບ ແລະ ມາດຕະການ ການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ການຈັດການແຂ່ງຂັນກິລາຄົນພິການ ແລະ ວຽກງານອື່ນໆທີ່ປິ່ນອ້ອມ.

ຫຼັງຈາກນັ້ນບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາຄິດ-ຄໍາເຫັນໃສ່ແຕ່ລະວຽກຢ່າງກົງໄປກົງມາ ເພື່ອພ້ອມກັນເປັນເອກະພາບໃນການກໍານົດເອົາເນື້ອໃນ, ຮູບການ ແລະ ປະເພດກິລາແຂ່ງຂັນໃນຄັ້ງນີ້ ແລະ ເພື່ອເຮັດໃຫ້ງານມະຫະກໍາກິລາແຫ່ງຊາດຄັ້ງນີ້ມີຜົນຜົນສໍາເລັດຕາມຈຸດປະສົງ ແລະ ເປົ້າໝາຍທີ່ກໍານົດໄວ້.

ຈຸດປະສົງ ຂອງກອງປະຊຸມແມ່ນເພື່ອທົບທວນຄືນບັນດາໜ້າວຽກຂອງກຳມະການ-ອະນຸກຳມະການຝ່າຍຕ່າງໆ ທີ່ໄດ້ຫ້າງຫາກະກຽມມາກ່ອນໜ້ານີ້ ແລະ ງົບປະມານຮັບໃຊ້ໃນໄລຍະຜ່ານມາ, ເພື່ອເປັນການຄົ້ນຄວ້າເປັນເອກະພາບກັນ ຕົກລົງຮັບຮອງເອົາແຜນດຳເນີນງານ, ຮູບແບບວິທີການ, ບັນດາກິດຈະກຳ, ກຳນົດເວລາ, ງົບປະມານຮັບໃຊ້ໃນການກະກຽມ ແລະ ດຳເນີນການເປີດງານມະຫະກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ທີ່ຈະເປີດຂຶ້ນໃນທ້າຍປີ 2022 ນີ້.