ເປັນເຈົ້າພາບທີ່ດີ ຈຶ່ງຈະມີນັກທ່ອງທ່ຽວ

ໂດຍ: ມຶກບໍ່ແຫ້ງ

ພວກເຮົາຮູ້ດີແລ້ວວ່າ ການລະບາດພະຍາດໂຄວິດ 19 ນັ້ນເຮັດໃຫ້ວຽກງານທ່ອງທ່ຽວມີຄວາມເຈັບປວດຫຼາຍເທົ່າໃດ ແຕ່ມາຮອດຕອນນີ້ ເມືອພະຍາດຮ້າຍດັ່ງກ່າວເລີ່ມຜ່ອນຄາຍຄວາມຮ້າຍແຮງລົງ ແລະ ລັດຖະບານເຮົາ ກໍຄືລັດຖະບານປະເທດຕ່າງໆທົ່ວໂລກ ຄ່ອຍທະຍອຍເປີດປະເທດ ເຮັດໃຫ້ການທ່ອງທ່ຽວຄ່ອຍໆກັບມາມີຊີວິດຊີວາອີກຄັ້ງ.

ໃນໄລຍະການລະບາດຂອງພະຍາດໂຄວິດ 19 ນັ້ນ ເຮັດໃຫ້ຈຳນວນນັກທ່ອງທ່ຽວທີ່ມາທ່ຽວປະເທດເຮົາຫຼຸດລົງ 80% ຫຼືອາດຫຼາຍກວ່ານັ້ນ ເຊິ່ງສົ່ງຜົນກະທົບຕໍ່ລາຍໄດ້ຂອງຜູ້ປະກອບການ, ປະຊາຊົນທ້ອງຖິ່່ນກໍຄືລັດຖະບານເຮົາ, ສົ່ງຜົນກະທົບໂດຍກົງຕໍ່ເສດຖະກິດ ໂດຍສະເພາະ ຄືປະເທດເຮົາທີ່ວຽກງານທ່ອງທ່ຽວ ແມ່ນບູລິມະສິດສຳຄັນລຳດັບຕົ້ນໆໃນຂະແໜງບໍລິການທີ່ສ້າງລາຍໄດ້ໃຫ້ປະເທດ.
ກ່ອນໜ້າທີ່ການເກີດລະບາດຂອງພະຍາດໂຄວິດ 19 ເມື່ອສາມປີກ່ອນນັ້ນ ເສດຖະກິດຂອງປະເທດເຮົາກໍຂື້ນໆລົງ ມີຄວາມຫຍຸ້ງຍາກພໍສົມຄວນຢູ່ແລ້ວ, ມາພໍ້ໂຄວິດທີ່ຕ້ອງປິດປະເທດ ຍິ່ງເພີ່ມຄວາມຫຍຸ້ງຍາກຂື້ນຕື່ມ ແລະບໍ່ພໍເທົ່ານັ້ນ ພາຍຫຼັງ ພະຍາດໂຄວິດ 19 ເລີ່ມຜ່ອນຄາຍລົງ ພວກເຮົາກໍຕ້ອງມາພົບກັບ ໄພເງິນເຟີ້, ຄ່າຄອງຊີບແພງ ຄ່າແຮງຕໍ່າ, ວິກິດການນໍ້າມັນເຊື້ອໄຟຂາດແຄນ ແລະ ອື່ນໆ ເຮັດໃຫ້ພວກເຮົາເຫັນໄດ້ວ່າ ວິກິດທາງເສດຖະກິດນັ້ນ ສ້າງຄວາມລຳບາກພຽງໃດ.

ມາຮອດມື້ນີ້ ທີ່ມີນັກທ່ອງທ່ຽວທະຍອຍຫຼັ່ງໄຫຼມາທ່ຽວປະເທດເຮົາ ໂດຍສະເພາະ ຈາກປະເທດໃກ້ຄຽງຄືໄທນັ້ນ ເປັນນິມິດໝາຍທີ່ດີແກ່ຂະແໜງການທ່ອງທ່ຽວ, ພວກເຮົາຄ່ອຍໆເຫັນ ນັກທ່ອງທ່ຽວຈາກ ເອີຣົບ, ອາເມລິກາ ພາກັນແບກເປ້ເລາະຕາມຫົນທາງ ເບິ່ງຄືວ່າບັນຍາກາດອັນເກົ່າໆເມື່ອສປີກ່ອນນັ້ນກັບມາອີກຄັ້ງ ທີ່ເປັນສັນຍານທີ່ດີນັ້ນ ໄດ້ຄ່ອຍໆກັບຄືນມາ.

ນີ້ແມ່ນໂອກາດ ທີ່ຈະປະກອບສ່ວນໃຫ້ເສດຖະກິດພວກເຮົາຄ່ອຍຟື້ນຕົວຂຶ້ນ, ດຶງດູດເງິນຕາຕ່າງປະເທດໃຫ້ຫຼາຍຂຶ້ນ. ເພື່ອຈະເຮັດໄດ້ແນວນັ້ນ, ປະຊາຊົນລາວພວກເຮົາທຸກຫົ່ວໜ້າ ຈົ່ງພ້ອມພາກັນ ເປັນເຈົ້າພາບທີ່ດີ, ຫຼີກລ່ຽງທີ່ສຸດການເອົາລັດເອົາປຽບນັກທ່ອງທ່ຽວ ບໍ່ວ່າຈະເປັນການຈຳໜ່າຍສິນຄ້າປະເພດຕ່າງ, ຄ່າບໍລິການຕ່າງໆ ຖ້າບໍ່ສາມາດເຮັດໃຫ້ ຄ່າບໍລິການ ລະຫວ່າງຄົນລາວ ແລະຕ່າງປະເທດຄືກັນ ກໍບໍ່ຄວນໃຫ້ແຕກຕ່າງກັນຫຼາຍ, ພວກເຮົາຄວນເອື້ອອຳນວຍ ຄວາມສະດວກຕ່າງໆ ແລະໃຫ້ການຊ່ວຍເຫຼືອນັກທ່ອງທ່ຽວເມື່ອມີບັນຫາ ເຊັ່ນ ເຄື່ອງຂອງຕົກເຮ່ຍເສຍຫາຍ ແລະ ອື່ນໆ.

ຮີບຮ້ອນເລັ່ງການຟື້ນຄືນ ແລະຍົກລະດັບການບໍລິການ ໃນສະຖານທີ່ທ່ອງທ່ຽວ, ບັນດາຮ້ານອາຫານ, ໂຮງແຮມ ເຮືອນພັກ ນັບແຕ່ຄວາມສະອາດຂອງຫ້ອງນໍ້າ, ຫ້ອງພັກ ແລະ ອື່ນໆ, ຍົກສູງຄຸນນະພາບການບໍລິການ ທີ່ເປັນມິດໄມຕີແກ່ນັກທ່ອງທ່ຽວ, ເພີ່ມການຜະລິດສິນຄ້າທີ່ເປັນເອກະລັກພາຍໃນປະເທດເຮົາ ໃຫ້ມີຄວາມຫຼາກຫຼາຍ, ມີຄຸນນະພາບ ເພື່ອສ້າງລາຍໄດ້ແກ່ປະຊາຊົນ ສ້າງຄວາມດືງດູດໃຈແກ່ນັກທ່ອງທ່ຽວ.

ເພີ່ມທະວີການກໍ່ສ້າງພື້ນຖານໂຄງຮ່າງທີ່ຈຳເປັນ ໂດຍສະເພາະ ການເຂົ້າເຖິງນັກທ່ອງທ່ຽວ, ເອື້ອອຳນວຍໃຫ້ ພາກເອກະຊົນ ໄດ້ພັດທະນາເຕັມທີ່ ແລະຫຼຸດຜ່ອນຄວາຫຍຸ້ງຍາກຕ່າງໆແກ່ເຂົາເຈົ້າ.
ອີກບັນຫາໜຶ່ງ ທີ່ຜູ້ຂຽນເຫັນວ່າ ຮີບຮ້ອນປຸງເຊັ່ນກັນ ກໍຄື ການຄຸ້ມຄອງສິ່ງເສດເຫຼືອ, ພວກເຮົາລອງຈິນຕະນາການເບິ່ງດຸວ່າ ແຄມທາງທີ່ມີແຕ່ຖົງຢາງ, ຄວດຢາງ ສິ່ງເສດເຫຼືອອື່ນໆ ຖິ້ມຢາຍຕາງແຄມທາງ ຫຼື ສະຖານທີ່ບໍລິການອື່ນໆ ຈະເຮັດໃຫ້ນັກທ່ອງທ່ຽວ ປະທັບໃຈໄດ້ແນວໃດ, ຄ້າຍກັບວ່າ ເຊີນແຂກມາຢາມ ແຕ່ເຮືອນບໍ່ມ້ຽນ ຊິເປັນບໍ່? ອັນນີ້ ແມ່ນຄວາມຮັບຊອບພວກເຮົາທຸກຄົນ ທີ່ຈະເປັນເຈົ້າພາບທີ່ດີກວ່ານີ້ ຈຶ່ງຈະມີນັກທ່ອງທ່ຽວມາຢ້ຽມຢາມພວກເຮົາເພີ່ມຂຶ້ນ.