ຜູ້ຈັດການ ເປແອສເຊ ບໍ່ຮູ້ອະນາຄົດ ເນມາ ເຖິງວ່າຢາກເກັບເອົາໄວ້ໃຊ້ງານຕໍ່ກໍຕາມ

ຄຣິສຕອຟ ກັລຕີເຢ ຜູ້ຈັດການທີມ ປາຣີສ ແຊັງ ແຊັກແມັງ ເປີດເຜີຍວ່າ ຕົນຢາກເກັບ ເນມາ ໄວ້ໃຊ້ງານຕໍ່ໄປ ແຕ່ຍອມ ຮັບວ່າມີຫລາຍຢ່າງທີ່ຕົນບໍ່ສາມາດຄວບຄຸມເອງໄດ້.

ເນມາ ຕົກເປັນຂ່າວອາດຖືກຜູ້ບໍລິຫານ ເປແອສເຊ ປ່ອຍອອກຈາກທີມຕາມແນວທາງສ້າງຂຸມກຳລັງໃຫມ່ ເຖິງວ່ານັກ ເຕະຈະຢືນຢັນວ່າບໍ່ມີຄວາມຄິດຍ້າຍທີມໄປໃສກໍຕາມ ໂດຍຫລ້າສຸດ ກັລຕີເຢ ເປີດເຜີຍວ່າ ຕົນກໍຍັງບໍ່ຮູ້ກ່ຽວກັບ ອະນາຄົດ ຂອງລູກທີມເຊັ່ນດຽວກັນ.

ກັລຕີເຢ ກ່າວວ່າ : ‘‘ ຂ້ອຍຮູ້ວ່າຈະໃຫ້ ເນມາ ຫລິ້ນບ່ອນໃດ ລາວເປັນນັກເຕະທີ່ມີຄວາມສາມາດໃນການຊີ້ຂາດເກມ ແຕ່ມີ ຫລາຍຢ່າງທີ່ຂ້ອຍບໍ່ສາມາດຄວບຄຸມໄດ້ ເຮົາມີບັນຫາໃນທີມ 26-27 ຄົນ ໂດຍທີ່ຍັງບໍ່ລວມຜູ້ຮັກສາປະຕູ ເຊິ່ງເປັນຈຳນວນທີ່ ຫລາຍ ເຮົາຢາກໃຊ້ງານນັກເຕະໃນລະດູການຈັກ 21 ຄົນ ບວກກັບມີດາວຮຸ່ງອີກຫນ້ອຍຫນຶ່ງ ’’.

ສຳລັບ ເນມາ ຍ້າຍຈາກບາເຊໂລນາ ແຫ່ງ ລາ ລີກາ ສະເປນ ມາຢູ່ກັບ ເປແອສເຊ ຕັ້ງແຕ່ເມື່ອປີ 2017 ຄ່າຕົວເປັນສະຖິຕິໂລກ 222 ລ້ານຢູໂຣ ແຕ່ນັກເຕະກໍມີບັນຫາອາການບາດເຈັບ ແລະ ເລື່ອງຂ່າວລືຕ່າງໆ ເຖິງຕອນນີ້ລົງຫລິ້ນໃຫ້ຕົ້ນສັງກັດໄປ 144 ນັດ ຍິງໄດ້ 100 ປະຕູ.