90% ຂອງນັກທ່ອງທ່ຽວທ່ຽວເຂົ້າຫຼວງພະບາງ ແລະ ຜ່ານລົດໄຟລາວ-ຈີນ ແມ່ນນັກທ່ອງທ່ຽວຊາວໄທ
ໄລຍະເຂົ້າພັນສາເປັນວັນພັກລັດຖະການໄທ,ສະເພາະປີ 2022 ລັດຖະບານໄທໄດ້ມີນະໂຍບາຍໃຫ້ພະນັກງານພັກວຽກລັດຖະການ 5 ວັນໄດ້ສ້າງເງື່ອນໄຂໃຫ້ຜູ້ປະກອບອາຊີບກໍຄືພະນັກງານພາຄອບຄົວທ່ຽວ, ໃນນັ້ນແມ່ນເດີນທາງໄປທ່ຽວແຂວງຫລວງພະບາງຂອງສປປ ລາວຜ່ານລົດໄຟລາວ-ຈີນເປັນສ່ວນຫລາຍ, ເຊິ່ງກຳລັງໄດ້ຮັບຄວາມນິຍົມຈາກນັກທ່ອງທ່ຽວໄທເຮັດໃຫ້ການທ່ອງທ່ຽວພາຍໃນເມືອງມໍລະດົກໂລກຫລວງພະບາງກັບມາຄຶກຄື້ນອີກຄັ້ງ.
ທ່ານ ວົງດາວອນ ວົງໄຊຍະລາດ ຫົວໜ້າຂະແໜງໂຄສະນາການທ່ອງທ່ຽວແຂວງຫລວງພະບາງໃຫ້ຮູ້ວ່າ: ໄລຍະເຂົ້າພັນສາ 13 ກໍລະກໍລະກົດນີ້ເປັນຕົ້ນມາ, ບັນຍາກາດການທ່ອງທ່ຽວຢູ່ພາຍໃນແຂວງຫລວງພະບາງກຳລັງຄຶກຄື້ນ ໂຮງແຮມ, ເຮືອນພັກ, ຮ້ານອາຫານແມ່ນຖືກຈອງລ່ວງໜ້າຈາກນັກທ່ອງທ່ຽວຕ່າງປະເທດ. ໃນນັ້ນໂຮງແຮມ, ເຮືອນພັກ 90% ແມ່ນຖືກຈອງຈາກນັກທ່ອງທ່ຽວໄທ.
ຂໍ້ມູນໃຫ້ຮູ້ຕື່ມອີກວ່າ, ນັກທ່ອງທ່ຽວໄທສ່ວນໃຫຍ່ແມ່ນເດີນທາງຜ່ານທາງຂົວມິດຕະພາບລາວ-ໄທແຫ່ງທີ 1 (ນະຄອນຫຼວງວຽງຈັນ-ໜອງຄາຍ) ແລະ ຜ່ານທາງຍົນ, ເປົ້າໝາຍຄືຂີ່ລົດໄຟມາທ່ຽວຫລວງພະບາງ ແລະວັງວຽງ ແລະເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວບໍລິສັດລົດໄຟລາວ-ຈີນ ກໍໄດ້ເພີ່ມຖ້ຽວລົດໄຟ EMU ສອງຂະບວນຕໍ່ໃສ່ກັນຕື່ມອີກຈົນໄປຮອດວັນທີ 17 ກໍລະກົດນີ້, ເຊິ່ງສາມາດບັນຈຸຜູ້ໂດຍສານໄດ້1D350 ຄົນຕໍ່ຖ້ຽວ.
