ທ່ານ ໄບເດນ ຈັບມືຜູ້ນຳອິດສະລາແອນ ລົງນາມຂໍ້ຕົກລົງສະກັດອີຣານ ພັດທະນາອາວຸດນິວເຄຼຍ

ປະທານາທິບໍດີ ໂຈ ໄບເດນ ຂອງອາເມລິກາ ແລະ ທ່ານ ຢາອີຣ໌ ລາພິດ ນາຍົກລັດຖະມົນຕີອິດສະລາແອນ ເຫັນພ້ອມຮ່ວມລົງນາມໃນສົນທິສັນຍາການຮ່ວມມືເພື່ອຂັດຂວາງບໍ່ໃຫ້ອີຣານພັດທະນາ ແລະ ມີອາວຸດນິວເຄຼຍໃນຄອບຄອງ ລະຫວ່າງການເດີນທາງຢ້ຽມຢາມອິດສະລາແອນຢ່າງເປັນທາງການຂອງຜູ້ນຳອາເມລິກາ.

ເຈົ້າໜ້າທີ່ອາເມລິກາ ເປີດເຜີຍວ່າ: ສົນທິສັນຍາການຮ່ວມມືທີ່ຈະມີການລົງນາມດັ່ງກ່າວຈະລວມທັງຄວາມພະຍາຍາມໃນການສະກັດກັ້ນການພັດທະນາອາວຸດນິວເຄຼຍຂອງອີຣານ. ໃນຂະນະທີ່ອາເມລິກາຈະໃຫ້ຄຳໝັ້ນວ່າຈະມອບການຊ່ວຍເຫລືອທາງທະຫານແກ່ອິດສະລາແອນຕໍ່ໄປ.

ຖະແຫລງການເຊິ່ງໄດ້ຮັບການເຜີຍແຜ່ອອກມາກ່ອນພິທີລົງນາມຢ່າງເປັນທາງການໄດ້ມີການລະບຸເຖິງການສະໜັບສະໜູນຂອງອາເມລິກາ ໃນການສ້າງຄວາມໄດ້ປຽບທາງທະຫານ ແລະ ເສີມສ້າງຄວາມສາມາດໃນການປ້ອງກັນຕົນເອງໃຫ້ອິດສະລາແອນ.

“ອາເມລິກາ ຂໍເນັ້ນວ່າ ອົງປະກອບສຳຄັນຂອງສົນທິສັນຍາສະບັບນີ້ ຄືຈະບໍ່ຍອມໃຫ້ອີຣານມີອາວຸດນິວເຄຼຍຢູ່ໃນຄອບຄອງ” ຂໍ້ຄວາມໃນຖະແຫລງການລະບຸ.

ທັງນີ້, ສົນທິສັນຍາການຮ່ວມມືເພື່ອສະກັດກັ້ນການພັດທະນາອາວຸດນິວເຄຼຍຂອງອີຣານລະຫວ່າງຜູ້ນຳອາເມລິກາ ແລະ ອິດສະລາແອນໃນຄັ້ງນີ້ ເກີດຂຶ້ນໃນຂະນະທີ່ປະທານາທິບໍດີ ໄບເດນ ກຳລັງຜະເຊີນຄວາມທ້າທາຍຢ່າງໜັກໃນການຊັກຊວນໃຫ້ອີຣານກັບເຂົ້າສູ່ຂໍ້ຕົກລົງນິວເຄຼຍປີ 2015 ອີກເທື່ອໜຶ່ງ ຫລັງຈາກອະດີດປະທານາທິບໍດີ ໂດນັລ ທຣຳ ນຳພາອາເມລິກາຖອນຕົວອອກຈາກຂໍ້ຕົກລົງໃນເດືອນພຶດສະພາ 2019.

ວັນທີ 14 ກໍລະກົດ ເຊິ່ງເປັນວັນທີສອງຂອງການເດີນທາງຢ້ຽມຢາມອິດສະລາແອນ, ຜູ້ນຳອາເມລິກາໄດ້ເຂົ້າຮ່ວມກອງປະຊຸມສຸດຍອດກັບນາຍົກລັດຖະມົນຕີ ລາພິດ ຂອງອິດສະລາແອນ ແລະ ກອງປະຊຸມຂອງຄະນະຜູ້ແທນສອງປະເທດ ແລະ ຈະມີການຖະແຫລງຂ່າວຮ່ວມກັນຫລັງສຳເລັດກອງປະຊຸມ.

ສ່ວນໃນວັນທີ 15 ກໍລະກົດ, ປະທານາທິບໍດີ ໄບເດນ ມີກຳນົດພົບປະກັບປະທານາທິບໍດີ ມາມູດ ອັບບາສ ຜູ້ນຳປາແລັສຕິນ ໃນນະຄອນເບເລເຮມ ໃນເຂດເວສແບງ ກ່ອນຈະເດີນທາງຢ້ຽມຢາມຊາອຸດິອາຣະບີ ເພື່ອປະຊຸມກັບຜູ້ນຳຊາອຸດິອາຣະບີ ແລະ ປະເທດພັນທະມິດໃນພາກພື້ນອ່າວເປີເຊຍ ຢູ່ເມືອງເຈດດາ ໃນວັນທີ 16 ກໍລະກົດນີ້.

ອ້າງອີງ:

https://www.aljazeera.com/…/us-israel-to-commit-to…

https://edition.cnn.com/…/biden-israel-trip…/index.html

https://www.reuters.com/…/us-israel-sign-joint-pledge…/